នៅថ្ងៃទី១៤ ខែវិច្ឆិកានេះ ក្រុមហ៊ុនដែលជាម្ចាស់ភាគហ៊ុនចំនួន ៥ បានដកហ៊ុនពីទីភ្នាក់ងារ Galaxy Cool Entertainment បន្ទាប់ពី Zhao Lusi បានសម្រេចចិត្តផ្លាស់ប្ដូរទ្រនំថ្មី ព្រោះបញ្ហាចម្រូងចម្រាស់ផ្ទៃក្នុង។

យោងតាម Tianyancha ដែលជាវេទិកាព័ត៌មានអាជីវកម្មក្នុងស្រុកចិន ទីភ្នាក់ងារ Galaxy Cool Entertainment ដែលដើមឡើយមានម្ចាស់ភាគហ៊ុនចំនួន ៨ បច្ចុប្បន្នមានអ្នកកាន់កាប់ភាគហ៊ុនត្រឹមតែ ៣ប៉ុណ្ណោះ ខណៈការចាកចេញនេះក៏បានផ្លាស់ប្ដូរអ្នកដឹកនាំសំខាន់ៗនៅក្នុងក្រុមហ៊ុនផងដែរ។
ការដកហ៊ុននេះកើតឡើង ក្រោយពី Zhao Lusi បានចាកចេញពីទីភ្នាក់ងារខាងលើ ព្រោះបញ្ហាជម្លោះ។ ជាក់ស្ដែងដើមហេតុពីក្រោយនោះ គឺគួររំឭកដល់ការបង្ហោះនៅលើគណនី Weibo របស់តារាស្រីវ័យ ២៧ឆ្នាំ កាលពីខែសីហា កន្លងទៅ ដោយនាងបានចែករំលែកថា ព្រោះតែនាងបានធ្លាក់ខ្លួនឈឺធ្ងន់កាលពីខែវិច្ឆិកា ឆ្នាំ២០២៤ ទើបទីភ្នាក់ងារបានបង្ខំឱ្យនាងបញ្ចប់ការងារជាមួយនឹងក្រុមហ៊ុនមួយចំនួន ដើម្បីកាត់បន្ថយសម្ពាធ ខណៈទីភ្នាក់ងារបានសន្យថា នឹងរ៉ាប់រងលើការខូចខាត។

គ្រានោះ តារាស្រីបានចែករំលែកបន្តថា យ៉ាងណាមិញ ជាក់ស្ដែង នាងគឺជាអ្នកទទួលខុសត្រូវដោយខ្លួនឯង ខណៈដែលទីភ្នាក់ងារបានឱ្យនាងបង់ប្រាក់ជាង ៤០០លានយ៉ន់ ខ្ទង់ ៥៦លានដុល្លារអាមេរិកដើម្បីបញ្ចប់កិច្ចសន្យាដែលនៅសល់ ៤ឆ្នាំទៀត។ បន្ថែមពីនេះ ក្រុមហ៊ុនក៏បានផ្ទេរប្រាក់ចំនួន ២.០៥លានយ៉ន់ ឬប្រមាណ ២៩ម៉ឺនដុល្លារអាមេរិកពីគណនីរបស់នាងដោយគ្មានការអនុញ្ញាតផងដែរ។
លុះមកដល់ដើមខែវិច្ឆិកានេះ ទើបមានការរាយការណ៍ថា តួឯកស្រីពីរឿង Love’s Ambition បានបញ្ចប់កិច្ចសន្យាជាមួយនឹង Galaxy Cool Entertainment រួចរាល់ហើយ ដោយមិនមានបង់ប្រាក់សំណងអ្វីទេ។ បន្តដោយថ្ងៃទី៨ ខែតែមួយ ទើបនាងបានប្រកាសចាប់ផ្ដើមជាមួយទីភ្នាក់ងារថ្មីជាផ្លូវការនៅចំពោះមុខអ្នកគាំទ្រ គ្រាកំពុងប្រគំតន្រ្តីអបអរដល់ថ្ងៃកំណើតរបស់នាងផ្ទាល់៕


























Account
Security
Favourite Content