បវរកញ្ញាកម្ពុជាក្រោម ឆន ស្រីណេត បានចេញវីដេអូភ្លាមៗ បន្ទាប់ពីឃើញមតិរិះគន់ថាកម្ពុជាក្រោមជាយួន តាមរយៈវីដេអូសម្ភាសបេក្ខភាព Supranational Cambodia 2025 ថាច់ ខេមរា កូនខ្មែររស់នៅកម្ពុជាក្រោម។

ឆន ស្រីណេត គឺជាបេក្ខភាពឆ្នើមមួយរូប និងជាលំដាប់រងទី១ នៃកម្មវិធីប្រកួត Miss Universe Cambodia កាលឆ្នាំ ២០២១ ព្រមទាំងជាម្ចាស់មកុដ Miss Tourism International Cambodia 2022 ផងដែរ។ ដោយឡែក កាលពីពេលកន្លងទៅថ្មីៗ នេះបវរកញ្ញាដែលមានឈាមជ័រកម្ពុជាក្រោមរូបនេះ បានចេញវីដេអូរៀបរាប់ទាំងទឹកភ្នែក និងសែនហួសចិត្តបន្ទាប់ពីបានឃើញពាក្យសម្ដីវាយប្រហារថាកម្ពុជាក្រោមសុទ្ធតែជាយួន ថែមទាំងពោលពាក្យមិនសមរម្យយ៉ាងច្រើនដែលធ្វើឱ្យប៉ះពាល់ប្រជាជនខ្មែរទាំងអស់ដែលរស់នៅលើទឹកដីកម្ពុជាក្រោម។
ពិតណាស់ ក៏ព្រោះតែនេះមិនមែនជាលើកដំបូងដែលកម្ពុជាក្រោមទទួលរងការប្រមាថពីសំណាក់ជនដែលពុំបានស្គាល់ច្បាស់ពីកំណើតនៃប្រជាជនកម្ពុជាក្រោម ទើបស្រីស្រស់រូបនេះបានចេញវីដេអូទាំងក្ដៅគគុក និងរៀបរាប់ទាំងទឹកភ្នែកដក់លើផែនថ្ពាល់បែបនេះថា៖ « បងប្អូនខ្មែរក្រោមគឺជាខ្មែរសុទ្ធ មានឈាមជ័រជាខ្មែរ អ្វីដែលកាន់តែសំខាន់គឺពួកគាត់មិនបានភ្លេចកំណើតខ្លួនឯងដែលជាខ្មែរ មានដូនតាជាខ្មែរ មានម្ដាយឪពុកជាខ្មែរ។ វាពិតជាឈឺចាប់ណាស់នៅពេលដែលខ្លួនជាខ្មែរតែបែរជាត្រូវគេចោទថាជាវៀតណាម។ អារម្មណ៍ដែលមិនមានអ្នកណាទទួលស្គាល់វាប្រៀបបីដូចជាកូនកំព្រាយ៉ាងអ៊ីចឹង។ អ្នកទាំងអស់គ្នាដឹងទេ នៅទីនោះវៀតណាមហៅពួកខ្ញុំថាខ្មែរ តែពេលមកដល់ទីនេះខ្មែរគ្នាឯងបែរជាហៅពួកខ្ញុំថាជាវៀតណាមទៅវិញទាំងដែលខ្លួនមានឈាមជ័រជាខ្មែរបែរជាត្រូវគេចោទ ចុះបើកើតឡើងលើបងប្អូនតើមានអារម្មណ៍យ៉ាងមិច? ការរិះគន់បែបនេះពិតជាបានធ្វើឱ្យកូនខ្មែរ និងប្រជាជនខ្មែរដែលរស់នៅលើទឹកដីកម្ពុជាក្រោមមានការឈឺចាប់ខ្លាំងណាស់»។








ក្រោយការចេញវីដេអូរៀបរាប់ច្បាស់ៗទាក់ទិនបញ្ហាខាងលើ បណ្ដាអ្នកគាំទ្រ និងអ្នកប្រើប្រាស់បណ្ដាញសង្គមបានចូលខមិនសម្ដែងការសោកស្ដាយចំពោះរឿងមួយនេះ។ បន្ថែមពីនេះ ពួកគេក៏បានលើកទឹកចិត្តបវរកញ្ញាកម្ពុជាក្រោមរូបនេះឱ្យរឹងមាំ និងកុំបាក់ទឹកចិត្តជាមួយសម្ដីដែលចេញពីមនុស្សដែលមិនស្គាល់ច្បាស់ពីជាតិសាសន៍របស់ខ្មែរ៕
សូមចុចទីនេះ ដើម្បីទស្សនាវីដេអូ ៖ https://www.facebook.com/neth.son.37/videos/1422302592264548
ប្រភពរូបភាព ៖ ហ្វេសបុក Chhon Sreynet – ឆន ស្រីណេត























Account
Security
Favourite Content