ចាប់តាំងពីចាកចេញពី TVB កាលពីឆ្នាំមុន តារាសម្ដែងស្រីហុងកុង Mandy Wong ក៏បានចុះកិច្ចសន្យាថ្មីជាមួយ Supreme Art Entertainment ដែលជាក្រុមហ៊ុនតំណាងឱ្យតារាសម្ដែង Athena Chu និង Ada Choi ជាដើម។ ដើម្បីរក្សាតុល្យភាពការងារ និងជីវិត តារាស្រីវ័យ ៤១ឆ្នាំរូបនេះបានបន្ថយការងារ ហើយងាកមកផ្តោតលើសុខភាពផ្លូវកាយ និងផ្លូវចិត្តរបស់ខ្លួនវិញ។

ក្នុងបទសម្ភាសមួយកាលពីពេលថ្មីៗ Mandy បានកោតសរសើរតារាស្រី Jia Ling ដែលអាចស្រកទម្ងន់ជាង ៤៥ គីឡូដើម្បីសម្ដែងភាពយន្ត “YOLO” រឿងនេះ និងសង្ឃឹមថាថ្ងៃណាមួយនាងនឹងត្រូវបានទាក់ទងឱ្យដើរតួមួយដែលគ្មាននរណាម្នាក់អាចចំណាំនាងបានបែបនេះដែរ។
រយៈពេលមួយឆ្នាំកន្លងទៅ Mandy បានផ្តោតលើការអភិវឌ្ឍជំនាញសម្ដែងរបស់នាង និងបានផ្លាស់ប្តូរទៅសម្ដែងតួអង្គដែលនាងមិនធ្លាប់សម្ដែងពីមុន ដូចជាក្នុងរឿង “In Bed With A Stranger” ដែលជាស្នាដៃចុងក្រោយរបស់នាងមុនពេលចាកចេញពី TVB នាងបានសម្ដែងជាស្ត្រីមានជំងឺភ្លេចភ្លាំងម្នាក់។ ទោះបីជា ការសម្ដែងតួអង្គបែបនេះលំបាកខ្លាំងក៏ដោយ ប៉ុន្តែ Mandy សប្បាយចិត្តចំពោះការពិសោធន៍សមត្ថភាពខ្លួនឯងបែបនេះ។


តារាស្រីដែលលេចមុខក្នុងរឿងភាគល្បីៗជាច្រើនដូចជា “កំពូលប៉ូលីសបំបែកក្ដី 01/27” និង “បេសកកម្មគ្រូពេទ្យសង្គ្រោះបន្ទាន់” និយាយថា តាំងពីចាកចេញពី TVB មក នាងមានអារម្មណ៍ថាមានសេរីភាព ដោយគ្មានអ្វីត្រូវព្រួយបារម្ភ ឬភ័យខ្លាចចំពោះមុខទៀតទេ។ Mandy បានរៀបការកាលពីឆ្នាំមុន និងបាននិយាយអរគុណដល់ស្វាមីនាងដែលបានក្លាយជាអ្នកគាំទ្រដ៏ធំបំផុតចំពោះអាជីពនាង។ នាងនិយាយថា៖ “ឥឡូវនេះ ខ្ញុំមានពេលច្រើនទៀតដើម្បីគិតអំពីគ្រួសារ និងផ្ទះរបស់ខ្ញុំ។ កាលពីមុន ខ្ញុំបានទៅផ្ទះតែមួយភ្លែតៗ ហើយក៏ងូតទឹកចេញទៅធ្វើការវិញភ្លាមៗ។ តែនៅពេលនេះការមានផ្ទះដ៏កក់ក្ដៅគឺជាជម្រើសត្រឹមត្រូវបំផុត”។ នៅពេលត្រូវបានសួរពីផែនការយកកូនវិញ តារាស្រីរូបនេះនិយាយថាបណ្ដោយតាមព្រេងវាសនា ខណៈនាងក៏មិនបានរៀបចំផែនការអ្វីវែងឆ្ងាយនោះដែរ ៕



























Account
Security
Favourite Content