ក្រុមហ៊ុន ADOR បានជូនដំណឹងដល់សមាជិកក្រុម NewJeans គឺ Danielle អំពីការបញ្ចប់កិច្ចសន្យាផ្តាច់មុខរបស់នាង និងបានប្រកាសពីផែនការប្ដឹងទាមទារការបង់ប្រាក់ពិន័យ និងសំណងយ៉ាងច្រើនមហាសាលពីសមាជិករូបនេះ។ នេះបើផ្អែកតាមការចុះផ្សាយរបស់សារព័ត៌មាន Allkpop។


កាលពីថ្ងៃទី ២៩ ខែធ្នូ ក្រុមហ៊ុន ADOR បានចេញសេចក្តីថ្លែងការណ៍ជាផ្លូវការមួយដោយនិយាយថា ក្រុមហ៊ុនមានការពិបាកក្នុងការបន្តធ្វើការជាមួយ Danielle ក្នុងនាមជាសមាជិកក្រុម NewJeans និងជាសិល្បករ ADOR ដូច្នេះហើយពួកគេបានចេញសេចក្តីជូនដំណឹងអំពីការបញ្ចប់កិច្ចសន្យា។ ទីភ្នាក់ងារនេះបានបន្ថែមថា ពួកគេមានគម្រោងស្វែងរកការទទួលខុសត្រូវតាមផ្លូវច្បាប់ពីសមាជិកម្នាក់នៃក្រុមគ្រួសាររបស់ Danielle និងអតីតនាយកប្រតិបត្តិ Min Hee Jin ដោយលើកឡើងថាពួកគេមានចំណែកធំក្នុងការបង្កជម្លោះ និងពន្យារពេលសកម្មភាព ក៏ដូចជាការវិលត្រឡប់របស់ NewJeans។
មន្ត្រី ADOR ម្នាក់បានពន្យល់ថា Danielle ត្រូវបានគេចោទប្រកាន់ថាបានប្រព្រឹត្តខុសកិច្ចព្រមព្រៀងផ្តាច់មុខរបស់នាង ឬបានចូលរួមក្នុងសកម្មភាពការងារឯករាជ្យ។ ទោះបីជាមានការស្នើសុំកែតម្រូវពីខាងក្រុមហ៊ុនក៏ដោយ ប៉ុន្តែតារាស្រីរូបនេះមិនបានបង្ហាញសកម្មភាពកែតម្រូវណាមួយក្នុងរយៈពេលដែលបានកំណត់ ដែលនាំឱ្យមានការជូនដំណឹងបញ្ចប់កិច្ចសន្យានេះ។ ខណៈពេលដែលចំនួនពិតប្រាកដនៃការពិន័យ និងសំណងមិនត្រូវបានបង្ហាញ ទីភ្នាក់ងារបាននិយាយថា ខ្លួននឹងអនុវត្តតាមរូបមន្តគណនាដែលបានកំណត់ទុកជាមុន។
យ៉ាងណាក៏ដោយ អ្នកជំនាញក្នុងវិស័យបានប៉ាន់ប្រមាណថា ការពិន័យ និងសំណងខូចខាតអាចឡើងដល់ ១០៨ ពាន់លានវ៉ុន (ប្រហែល ៨០ លានដុល្លារអាមេរិក)។ កាលពីខែមុន មេធាវី Ahn Hee Chul មកពីក្រុមហ៊ុនច្បាប់ DLG បានប៉ាន់ប្រមាណថា សមាជិក NewJeans ម្នាក់អាចប្រឈមមុខនឹងការពិន័យរហូតដល់ ១០៨ ពាន់លានវ៉ុន ដោយផ្អែកលើប្រាក់ចំណូលប្រចាំខែជាមធ្យមរបស់ ADOR និងរយៈពេលកិច្ចសន្យាដែលនៅសល់។ ទោះជាយ៉ាងណាក៏ដោយ លោកបានកត់សម្គាល់ថា តុលាការអាចកាត់បន្ថយចំនួនទឹកប្រាក់ ប្រសិនបើចាត់ទុកថាអយុត្តិធម៌ហួសហេតុ។
មុននេះ សមាជិក NewJeans ទាំងប្រាំនាក់បានបង្ហាញពីចេតនារបស់ពួកគេក្នុងការបន្តសកម្មភាពក្រុមក្រោម ADOR។ យ៉ាងណាក៏ដោយ បន្ទាប់ពី Danielle ត្រូវបានបញ្ចប់កិច្ចសន្យា សាធារណជននៅតែព្រួយបារម្ភនិងសង្ស័យថាអនាគត NewJeans ដែលនៅសល់សមាជិកតែ ៤ នាក់នោះនឹងត្រូវបន្តទៅមុខបែបណា ៕
























Account
Security
Favourite Content