ថ្មីៗនេះ តារាសម្តែង Jet Li (លី លានជា) បានធ្វើឱ្យអ្នកគាំទ្រមានការព្រួយបារម្ភ បន្ទាប់ពីលោកបានបង្ហោះរូបថត និងវីដេអូជាបន្តបន្ទាប់នៅលើគណនី Douyin ដោយបង្ហាញថារូបលោកកំពុងសម្រាកព្យាបាលនៅមន្ទីរពេទ្យ។ កាលពីថ្ងៃទី១៧ ខែសីហា តារាវ័យ ៦២ ឆ្នាំរូបនេះបានបង្ហោះរូបភាពដែលខ្លួនកំពុងសម្រាកនៅលើគ្រែមន្ទីរពេទ្យ ដោយភ្ជាប់ជាមួយនឹង caption វីដេអូថា “ថ្មីៗនេះខ្ញុំបានប្រឈមមុខនឹងបញ្ហាដែលមិននឹកស្មានដល់” ។


ក្នុងវីដេអូមួយទៀត លោក Li ត្រូវបានគេរុញចូលទៅក្នុងបន្ទប់វះកាត់មួយ ដែលលោកនិយាយលេងសើចអំពីការពាក់ “មួកក្រហមដ៏ទាន់សម័យ”។ ក្រោយមក លោកត្រូវបានគេឃើញជួបជាមួយក្រុមការងារពេលកំពុងអង្គុយលើគ្រែមន្ទីរពេទ្យ។ តារាសម្ដែងរូបនេះបានបន្ថែមថាលោក “មានអារម្មណ៍ស្វាហាប់ជាងមុន” ។
ចូលទៅកាន់គណនី Weibo វិញ Jet Li បានប្រាប់អ្នកគាំទ្រថា “មិនចាំបាច់បារម្ភខ្លាំងពេកទេ” អំពីលោក។ តារាក្បាច់គុនដើមកំណើតចិនរូបនេះ បានសរសេរថា “មានបញ្ហា Hardware បន្តិចបន្តួច ដូច្នេះត្រូវបញ្ជូនទៅរោងចក្រវិញដើម្បីជួសជុល។ សូមអរគុណអ្នកទាំងអស់គ្នា ចំពោះការព្រួយបារម្ភ។ មិនចាំបាច់បារម្ភពីខ្ញុំពេកទេ ខ្ញុំគ្រាន់តែសម្រាកបន្តិចប៉ុណ្ណោះ” ។
នៅក្នុងការបង្ហោះបន្ទាប់ទៀតលើ Weibo កាលពីថ្ងៃច័ន្ទ លោកបានបង្ហោះរូបភាពខ្លួនឯងកំពុងហូបមី និងអរគុណអ្នកគាំទ្រចំពោះការជូនពររបស់ពួកគេ។ លោកបានសរសេរថា “អរគុណអ្នកទាំងអស់គ្នាសម្រាប់ការបារម្ភ និងជូនពរ។ ខ្ញុំបានធ្វើឱ្យអ្នករាល់គ្នាព្រួយបារម្ភ។ ខ្ញុំបានចេញពីមន្ទីរពេទ្យហើយ និងកំពុងហូបរបស់ឆ្ងាញ់។ សូមជូនពរឱ្យគ្រប់គ្នាមានសុខភាពល្អ សន្តិភាព និងសុភមង្គល” ។
យោងតាមការចុះផ្សាយរបស់កាសែតតៃវ៉ាន់ The China Times តារាសម្ដែង Jet Li ត្រូវបានបញ្ជូនទៅមន្ទីរពេទ្យដើម្បីវះកាត់ដុំសាច់តូចមួយចេញ ៕

































Account
Security
Favourite Content