យុវវ័យនិយមគាំទ្រវិស័យចម្រៀងរ៉េបនៅកម្ពុជាពិតដឹងច្បាស់ហើយថា កាល ៤ ថ្ងៃមុន តារាចម្រៀងរ៉េបវ័យក្មេង ទេព ពិសិដ្ឋ បានទម្លាក់ស្នាដៃចម្រៀងថ្មីមួយបទ ចំណងជើងថា «20’OUTNOW» ជាការបកស្រាយរួមគ្នាជាមួយ RICKY, CHANNTY , NPN។
នឹកស្មានមិនដល់ រយៈពេលត្រឹម៤ ថ្ងៃប៉ុណ្ណោះ បទ «20’OUTNOW» ទទួលបានការគាំទ្រយ៉ាងខ្លាំងពីសំណាក់មហាជន ពិសេសគឺយុវវ័យដែលនិយមចម្រៀងចង្វាក់រ៉េប និង hip hop តែម្តង សូម្បីតារាៗល្បីជាច្រើនក៏សរសើរស្នាដៃបទថ្មីនេះផងដែរ។ ។ មិនត្រឹមតែទទួលបានការចាប់អារម្មណ៍ខ្លាំងប៉ុណ្ណោះទេ បទនេះត្រូវបានគេយកទៅលេង Tik Tok យ៉ាងព្រោងព្រាតថែមទៀតផង។
សន្ទុះគាំទ្រយ៉ាងខ្លាំងក្លាបានជួយឱ្យឆានែលយូធូបរបស់ Tep Piseth កើនចំនួន subscriber ឡើងស្រឺតៗតែម្តង។ គេបានឃើញហ្វេនៗ និងតារាល្បីៗជាច្រើន នាំគ្នាចូលទៅ Comment លើកសរសើរស្នាដៃបទថ្មីរបស់ កំលោះសង្ហា ទេព ពិសិដ្ឋ និងទឹកដមសំនៀងរបស់តារារ៉េបវ័យក្មេងនេះ រួមទាំងសមត្ថភាពក្នុងការតែងនិពន្ធសាច់ភ្លេង និងអត្ថន័យបទចម្រៀង ធ្វើឱ្យបទនេះស្តាប់ទៅរឹតតែទាក់ទាញថែមមួយកម្រិតទៀត។
ដោយសារសមត្ថភាព ទេពកោសល្យ និងដុងការច្រៀងចម្រៀងរ៉េបរបស់ ពិសិដ្ឋ ធ្វើឱ្យមហាជនសម្លឹងឃើញថា ទេព ពិសិដ្ឋ ជាពន្លកថ្មីខាងវិស័យចម្រៀងរ៉េបអាចនឹងបន្តតំណែងពី វណ្ណដា ទៀតផង រហូតអ្នកខ្លះហៅលោកថា វណ្ណដា ទី២ ។
សូមជម្រាបថា ម្ចាស់បទ «20’OUTNOW» ទេព ពិសិដ្ឋ ជាម្ចាស់ជយលាភីកម្មវិធីប្រឡងចម្រៀងលំដាប់ពិភពលោក The Voice Kids Cambodia រដូវកាលទី២ អំឡុងឆ្នាំ ២០១៨។ ក្រោយជាប់ជាម្ចាស់ជយលាភី ទេព ពិសិដ្ឋ បានក្លាយជាតារាចម្រៀងអាជីពក្នុងទ្រនំរស្មីហង្សមាស ដូចក្នុងកុងត្រា។ ពិសិដ្ឋ មានស្នាដៃចម្រៀងផ្ទាល់ខ្លួនជាច្រើនបទ ដែលសុទ្ធតែទទួលបានការគាំទ្រខ្លាំងពីសំណាក់មហាជនគ្រប់ស្រទាប់វណ្ណៈ។ ហើយពេលនេះបទ «20’OUTNOW» កំពុងជួយច្បាបប្រជាប្រិយភាពឱ្យកំលោះសង្ហានេះឱ្យឡើងខ្ពស់ត្រដែត ក្លាយជាតារារ៉េបវ័យក្មេងមានឈ្មោះបោះសម្លេងនាពេលបច្ចុប្បន្ននេះ៕