នាវាមុជទឹក Titan ដឹកនាំយកមនុស្ស ៥ នាក់ទៅទស្សនាខ្មោចកប៉ាល់ Titanic និងបានបាត់ខ្លួន បានក្លាយជាប្រធានបទដែលមនុស្សជុំវិញពិភពលោកតាមដានចង់ដឹង ជាពិសេសពីមូលហេតុដែលធ្វើឱ្យកប៉ាល់នេះបាត់ខ្លួន។ ស្របពេលជាមួយគ្នានេះ អ្នកដឹកនាំរឿង Titanic គឺលោក Jame Cameron ក៏បានទម្លាយប្រាប់ពីរឿងធ្លាប់ជាប់ក្រោមបាតសមុទ្រ ១៦ ម៉ោង ក្រោយព្យាយាមចុះទៅមើល និងផ្ដិតយករូបភាពផ្សេងៗ របស់ខ្មោចកប៉ាល់ Titanic។

យោងតាមប្រភពព័ត៌មាន Marca លោក Jame Cameron បានផ្ដល់បទសម្ភាសន៍និយាយទាក់ទិននឹងការបាត់នាវាមុជទឹក Titan។ លោកបានលើកឡើងថា៖ លោកធ្លាប់ជ្រមុជចុះទៅទីតាំងកប៉ាល់ Titanic ចំនួន ៣៣ ដងរួមមកហើយដើម្បីសិក្សា និងផ្ដិតយករូបភាពពិតៗ មកផលិតរឿង។ ក្នុងចំណោម ៣៣ ដងនោះ មានម្ដងលោកធ្លាប់បានជាប់ក្រោមបាតសមុទ្រដល់ទៅ ១៦ ម៉ោង។ ដោយសារតែចរន្ដក្រោមបាតសមុទ្រមានការហូរខ្លាំងធ្វើឱ្យលោកជាប់គាំងនៅតំបន់ខ្មោចកប៉ាល់ Titanic។ ជាលទ្ធផល លោកត្រូវរង់ចាំនៅទីនោះរយៈពេល ១៦ ម៉ោងទើបអាចត្រឡប់មកវិញ។

លោកបន្ថែមថា៖ កត្ដាដែលគ្រោះថ្នាក់បំផុតនោះគឺនៅពេលនាវាមុជទឹកចុះទៅត្រូវជាប់គាំងជាមួយអ្វីមួយ ឬអាចជួបប្រទះរឿងអ្វីមួយដែលមិនបានគិតទុកមុនពេលចុះទៅដល់ជម្រៅជ្រៅ។
ថ្វីបើការជ្រមុជទឹកចុះទៅជ្រៅ និងសិក្សាពីខ្មោចកប៉ាល់ Titanic មានភាពគ្រោះថ្នាក់ ប៉ុន្ដែលោក James Cameron ធ្លាប់បានលើកឡើងថា៖ លោកមិនអាចមានការស្រមើស្រមៃដ៏អស្ចារ្យបាននោះទេ បើសិនលោកគ្មានភាពក្លាហានក្នុងការផ្សងព្រេង និងទៅមើលអ្វីដែលមនុស្សធម្មតាមិនធ្លាប់ឃើញ។

គួរបញ្ជាក់ថា លោក James Cameroon ត្រូវបានគេចាត់ទុកថាជាអ្នកដឹកនាំរឿងដ៏ល្បីល្បាញ និងអស្ចារ្យម្នាក់ក្នុងប្រវត្ដិសាស្រ្ដ ដោយសារតែភាពយន្ដកុនដែលផលិតចេញពីស្នាដៃរបស់លោកសុទ្ធសឹងតែមានគុណភាព និងរកប្រាក់ចំណូលបានរាប់ពាន់លានដុល្លារអាមេរិកដូចជាភាពយន្ត Titanic និងភាពយន្ត Avatar ទាំង២ភាគ ៕




























Account
Security
Favourite Content