បុរសជនជាតិចិនម្នាក់បានធ្លាក់ចូលក្នុងអណ្ដូងជម្រៅ ១២ម៉ែត្រអស់រយៈពេល ៣ថ្ងៃ ដោយព្យាយាមស្រែករកជំនួយពីអ្នកភូមិជិតនោះ តែសម្រែករបស់លោកបែរជាធ្វើឱ្យអ្នកភូមិភ័ន្តច្រឡំតែថាជាសំឡេងខ្មោចលងទៅវិញ។

តាមរយៈសារព័ត៌មានពីប្រទេសថៃ The Universal Daily News បានចុះផ្សាយថា ឧបទ្ទវហេតុនេះបានកើតឡើងនៅក្នុងខេត្ត តាក ដែលជាព្រំប្រទល់រវាងប្រទេសថៃ និងមីយ៉ាន់ម៉ា ដោយអ្នកភូមិបានរាយការណ៍ទៅកាន់ប៉ូលីសក្នុងតំបន់ថា ពួកគេបានឮសំឡេងចម្លែកចេញពីក្នុងព្រៃដែលនៅក្បែរៗភូមិ។
នៅល្ងាចថ្ងៃដដែលនោះ អ្នកដើរល្បាតម្នាក់បានឮសំឡេងយំ តែនៅមិនទាន់ប្រាកដចិត្តថាជាសំឡេងមនុស្សឬយ៉ាងណា? ទើបប៉ូលីសម្នាក់បានសាកល្បងស្រែករកម្ចាស់សំឡែងម្ដងទៀត មុននឹងទទួលបានការឆ្លើយតបមកវិញ និងចាប់ផ្ដើមស្វែងរកទីតាំងនៃប្រភពសំឡេងនោះ។
ក្នុងរយៈចម្ងាយប្រមាណ ៥០០ម៉ែត្រនៅក្នុងព្រៃដាច់ស្រយាល ក្រុមជួយសង្គ្រោះបានប្រទះឃើញបុរសចិនម្នាក់ ឈ្មោះ Liu Chuanyi បានធ្លាក់ទៅក្នុងបាតអណ្ដូងជម្រៅ ១២ម៉ែត្រ តែជាសំណាងដែលអណ្ដូងនោះរីងទឹកអស់ទៅហើយ និងបានចំណាយពេលយ៉ាងហោចណាស់ ៣០នាទីដើម្បីលើកជនរងគ្រោះឡើងមកវិញ ជាមួយនឹងស្ថានភាពទន់ខ្សោយខ្លាំង ពេញដោយស្នាមជាំជុំវិញខ្លួន និងមានបាក់ដៃខាងឆ្វេងទៀតផង។
The Bangkok Post បានរាយការណ៍ថា ក្រោយបញ្ចូនទៅសម្រាកព្យាបាលនៅមន្ទីរពេទ្យ Mae sot បុរសចិនវ័យ ២២ឆ្នាំរូបនេះ បានប្រាប់អ្នកបកប្រែថា លោកបានជាប់នៅក្នុងអណ្ដូងនេះអស់រយៈពេល ៣ថ្ងៃដោយគ្មានបានបាយទឹក និងសម្រាកនោះទេ។ ដើម្បីរក្សាកម្លាំង លោកបានស្រែកឱ្យគេជួយត្រឹមតែម្ដងក្នុងរយៈពេល ១ម៉ោង។ Liu Chuanyi បន្តដូច្នេះ។

ទន្ទឹមគ្នានេះ អ្នកភូមិបានរៀបរាប់ថា ពួកគេបានឮសំឡេងនេះប៉ុន្មានថ្ងៃមកហើយ និងឮកាន់តែខ្លាំងនៅពេលយប់ ជាមូលហេតុធ្វើឱ្យពួកគេគិតថា ជាសំឡេងរបស់អមនុស្សពីក្នុងព្រៃ។ បន្ថែមពីនេះ អ្នកភូមិបានឱ្យដឹងទៀតថា ពួកគេបានព្យាយាមហាមកូនហាមចៅមិនឱ្យចេញពីផ្ទះនៅពេលយប់នោះទេ និងមិនហ៊ានទៅស្វែងរកប្រភពសំឡេងនោះឡើយ។
បច្ចុប្បន្ន ប៉ូលីសកំពុងតែធ្វើការស៊ើបអង្កេតរកមូលហេតុដែលបុរសចិនខាងលើបានបង្ហាញវត្តមាននៅព្រំដែនរវាងប្រទេសថៃ និងមីយ៉ាន់ម៉ា ក្រោយលោក Liu Chuanyi មិនបានផ្ដល់ចម្លើយច្បាស់លាស់ទៅលើបញ្ហានេះ។
ទន្ទឹមគ្នានេះ មន្ត្រីក្នុងតំបន់ក៏កំពុងរៀបចំធ្វើគម្របដើម្បីបិទអណ្ដូងនោះ ការពារកុំឱ្យមានហេតុការណ៍ដដែលនេះកើតឡើងម្ដងទៀត៕



























Account
Security
Favourite Content