សារព័ត៌មានឈានមុខផ្នែកតន្ត្រីរបស់អាមេរិក Billboard បានដាក់ឈ្មោះតារាចម្រៀង Beyoncé ជាតារាប៉ុបដ៏អស្ចារ្យបំផុតនៃសតវត្សទី ២១ ដោយសារតែឥទ្ធិពលដ៏ធំធេងរបស់នាងលើឧស្សាហកម្មតន្ត្រីក្នុងរយៈពេល ២៥ ឆ្នាំកន្លងមក។
នៅក្នុងអត្ថបទរបស់ខ្លួន Billboard បានរៀបរាប់ថា Beyoncé បានផ្តួល Taylor Swift ដែលជាប់ចំណាត់ថ្នាក់ទី ២ នៅក្នុងបញ្ជី Greatest Pop Star of the 21st Century សម្រាប់ឥទ្ធិពលដែលនាងបានបង្កើតសម្រាប់ឧស្សាហកម្មតន្ត្រី តាំងតែពីពេលនាងចាប់ផ្ដើមអាជីពជាសមាជិកក្រុម Destiny’s Child រហូតមកដល់ពេលនេះដែលមនុស្សជុំវិញពិភពលោកឱ្យរហស្សនាមនាងថា ‘Queen B’ Beyoncé។
Billboard បញ្ជាក់បន្ថែមថា បើទោះបីជា Taylor Swift គឺជាតារាប៉ុបដែលជោគជ័យជាងគេលើតួលេខលក់អាល់ប៊ុម តួលេខស្ដាប់ចម្រៀង និងការលក់សំបុត្រតន្ត្រីទេសចរណ៍ក៏ដោយ ប៉ុន្តែឈ្មោះរបស់ Beyoncé គឺជាសិល្បករដែលក្រុមការីនិពន្ធរបស់ខ្លួនជ្រើសរើសឱ្យជាប់ចំណាត់ថ្នាក់លេខ១ ក្នុងបញ្ជីនេះដោយសារតែវិថីអាជីពរយៈពេល ២៥ឆ្នាំរបស់នាងគឺពោរពេញទៅដោយការអភិវឌ្ឍ និងមានឥទ្ធិពលខ្លាំងជាងគេទៅលើវិស័យតន្ត្រីប៉ុប។
មិនតែប៉ុណ្ណោះ Billboard ក៏ពណ៌នាថាជា បទចម្រៀងជាច្រើនរបស់ម្ចាស់បទ “Run the World” បានក្លាយជាបទពេញនិយមដែលមនុស្សទូទាំងពិភពលោកស្គាល់ ហើយអាល់ប៊ុមរបស់នាងបានទទួលជោគជ័យយ៉ាងខ្លាំង ទាំងផ្នែកពានរង្វាន់ និងចំណាត់ថ្នាក់លើតារាងចម្រៀងនានារួមទាំង Billboard ខណៈទទួលបានការសរសើរថាជាស្នាដៃដ៏ល្អមករហូត។
ក្រៅពីលេខ១ និងលេខ២ បានទៅ Beyoncé និង Taylor Swift ចំណាត់ថ្នាក់លេខ ៣ ក្នុងបញ្ជីនេះបានទៅតារាចម្រៀង និងសហគ្រិនស្រីដ៏ល្បី Rihanna ស្របពេលលេខ ៤ បានទៅតារារ៉េប Drake លេខ ៥ បានទៅ Lady Gaga លេខ ៦ Britney Spears លេខ ៧ Kanye West លេខ ៨ Justin Bieber លេខ ៩ Ariana Grande និងលេខ ១០ គឺ Adele ៕