ក្រុមចម្រៀងបុរស ZEROBASEONE អាចលក់បានដល់ ១ លានច្បាប់ សម្រាប់អាល់ប៊ុមចុងក្រោយរបស់ខ្លួនមានចំណងជើងថា “Blue Paradise” ធ្វើឱ្យអាល់ប៊ុមនេះក្លាយជាអាល់ប៊ុមទី៥ជាប់ៗគ្នារបស់ពួកគេដែលលក់ដាច់ខ្ទង់លានច្បាប់។

យោងតាមភ្នាក់ងាររបស់ក្រុមចម្រៀងនេះគឺ WakeOne Entertainment បានឱ្យដឹងនៅថ្ងៃអង្គារទី២៥ ខែកុម្ភៈនេះថា អាល់ប៊ុមទី ៥ របស់ ZEROBASEONE ដែលបានចេញផ្សាយកាលពីថ្ងៃចន្ទអាចលក់ដាច់ជាង ១,០១ លានច្បាប់ក្នុងរយៈពេលមួយថ្ងៃដំបូង។
មិនតែប៉ុណ្ណោះ បទចម្រៀងទាំងប្រាំមួយបទពីអាល់ប៊ុម “Blue Paradise” បានជាប់ចំណាត់ថ្នាក់ក្នុងតារាង Hot 100 និង Top 100 នៃតារាងក្នុងស្រុក Melon គិតត្រឹមថ្ងៃអង្គារ ខណៈការ Stream (ស្ដាប់) បទចម្រៀងក្នុងអាល់ប៊ុមបានឡើងដល់លើស ១ លានដងក្នុងរយៈពេល ៩ ម៉ោងនិង ៣០នាទីក្រោយចេញផ្សាយ។



នៅលើវេទិកាអន្តរជាតិ អាល់ប៊ុមនេះក៏បានឈរនៅចំណាត់ថ្នាក់លេខ ៣ នៅលើតារាង Worldwide iTunes Album ក៏ដូចជាតារាង iTunes Top Album Chart នៅក្នុង ១២ ប្រទេសនិងតំបន់ជុំវិញពិភពលោក រួមទាំងទីក្រុងហុងកុង ឥណ្ឌូណេស៊ី និងម៉ាឡេស៊ីផងដែរ ស្របពេលដែលវីដេអូចម្រៀងសម្រាប់បទ “Blue” ដែលជាបទនាំមុខបានទទួលការចូលទស្សនាដល់ ១១ លានដងលើ Youtube ក្នុងរយៈពេល២៤ម៉ោងដំបូង។
គួររំឭកថា ក្រុម ZEROBASEONE ត្រូវបានបង្កើតឡើងតាមរយៈកម្មវិធីប្រឡង “Boys Planet” របស់ប៉ុស្តិ៍ Mnet កាលពីឆ្នាំ២០២៣ ហើយពួកគេគ្រោងនឹងបន្តសកម្មភាពជាក្រុមបែបនេះរហូតដល់ខែមករាឆ្នាំក្រោយ។
ក្នុងកំលុងកម្មវិធី Showcase សម្ពោធអាល់ប៊ុមថ្មីនេះកាលពីថ្ងៃចន្ទ នៅពេលត្រូវបានសួរអំពីគម្រោងអនាគតរបស់ពួកគេ សមាជិកក្រុមបាននិយាយថាពួកគេផ្តល់អាទិភាពដល់ Zerose ដែលជាអ្នកគាំទ្រ និងកំពុងពិភាក្សាស្វែងរកផ្លូវដែលល្អបំផុតសម្រាប់គ្រប់គ្នា ៕
























Account
Security
Favourite Content