Rosé បង្ហើបរឿងរ៉ាវដែលនាងបានជួបក្នុងទំនាក់ទំនងស្នេហា និងភាពឈឺចាប់បញ្ចូលទៅក្នុងអាល់ប៊ុមទោលថ្មីរបស់ខ្លួន “rosie” ដែលគ្រោងនឹងចេញនៅថ្ងៃទី ៦ ខែវិច្ឆិកាខាងមុខនេះ។

តាមរយៈកិច្ចសម្ភាសជាមួយនឹងទស្សនាវដ្ដី PAPER តារាចម្រៀងខេប៉ុបរូបនេះបានរៀបរាប់សាច់រឿងពីក្រោយអាល់ប៊ុមថ្មីរបស់ខ្លួន មិនថាពីដំណើរការនៃការសរសេរ និងអត្ថន័យរបស់ចម្រៀងដែលនាងបានតែងនោះទេ។ Rosé និយាយថា ដំបូងនាងគ្មានគម្រោងច្បាស់លាស់សម្រាប់ជំហានបន្ទាប់របស់ខ្លួនឡើយ ហេតុដូចនេះហើយទើបព័ត៌មានពីបទថ្មីរបស់ខ្លួនក្រចេញដូច្នេះ។
ជាក់ស្ដែង កម្លាំងជំរុញចិត្តដំបូងរបស់នាង គឺដោយសារតែការលើកសរសើររបស់មិត្តភ័ក្ដិ ក្រោយសមាជិក BLACKPINK រូបនេះបានបើកចម្រៀងដែលខ្លួនបានតែងនៅពេលចូលសិក្សាវគ្គនិពន្ធចម្រៀងបានប៉ុន្មានវគ្គនៅឯទីក្រុង Los Angeles។ ក្រោយពីមិត្តលើកទឹកចិត្ត Rosé ត្រឡប់ទៅរៀនម្ដងទៀត រហូតសម្រេចចិត្តចុះកិច្ចសន្យាជាមួយនឹង Atlantic Records ដើម្បីផលិតអាល់ប៊ុមមួយនេះចេញមក។

ម្ចាស់បទ APT. បានប្រាប់ថា ខ្លួនបានចាប់ផ្ដើមធ្វើអាល់ប៊ុមដែលនិយាយពីរឿងរ៉ាវស្នេហាខកបំណងតាំងតែពីឆ្នាំមុនមកម៉្លេះ។ ដោយនាងបានប្រាប់ពីប្រធានបទគោលរបស់អាល់ប៊ុមនេះថា៖ “ខ្ញុំពិតជារីករាយដែលធ្លាប់បានឆ្លងកាត់នូវទំនាក់ទំនងស្នេហាមួយចំនួន ដូចជាមនុស្សស្រីវ័យ២០ឆ្នាំធម្មតាម្នាក់។ ខ្ញុំពិតជាចង់ឱ្យអ្នកដទៃយល់ថា ខ្ញុំមិនខុសគ្នាប៉ុន្មានទេពីសង្សាររបស់អ្នក ឬមនុស្សស្រីវ័យ ២៣ឆ្នាំដទៃទៀត។ អ្នកប្រហែលជាអាចស្គាល់ខ្ញុំច្បាស់ជាងមុន នៅពេលស្ដាប់បទទាំងនោះ ឬធ្លាប់ជួបនឹងទំនាក់ទំនង toxic កន្លងមក”។
Rosé បន្តថា វ័យ ២០ឆ្នាំជាពេលដ៏ពិបាកមួយនៅក្នុងជីវិតដែលមនុស្សម្នាក់ៗនៅស្រពេចស្រពិលនឹងជីវិតរបស់ខ្លួននៅឡើយ ហើយទាំងអស់នេះជាអ្វីដែលនាងចង់ច្រៀងចេញមក។ បន្ថែមពីនេះទៀត តារាខេប៉ុបរូបនេះ ក៏បានរៀបរាប់ពីការរិះគន់នានាដែលធ្លាប់កើតមានចំពោះខ្លួនផងដែរ។
ក្នុងវ័យ ២៧ឆ្នាំ Rosé ហៅអាល់ប៊ុមរបស់ខ្លួនថា “អំពីរឿរ៉ាវដ៏គួរឱ្យខ្លាចក្នុងវ័យ ២០ឆ្នាំ” និងបង្ហាញពីគោលបំណងដែលចង់ឱ្យអ្នកដទៃស្វែងយល់ពីនាងដោយគ្មានការវិនិច្ឆ័យ។ Rosé បានចែករំលែកថា នាងមានទម្លាប់អាក្រក់មួយដែលចូលចិត្តមើលការបញ្ចេញមតិអាក្រក់នានាមកលើនាងនៅពេលយប់ជ្រៅ។ ដូចនេះហើយ បានជាសិល្បកររួបនេះ សម្រេចចិត្តសរសេរតាក់តែងចម្រៀងមួយបទដែលអាចបង្ហាញថា នាងក៏ត្រូវការសេចក្ដីស្រឡាញ់ និងការយល់ចិត្តដូចគេដូចឯងដែរ៕
































Account
Security
Favourite Content