ពានរង្វាន់ MAMA ឆ្នាំ ២០២៥ នឹងចាប់ផ្ដើមប្រារព្ធឡើងនៅទីក្រុងហុងកុងនៅថ្ងៃសុក្រ ទី២៨ ខែវិច្ឆិកានេះដូចការកំណត់ ដោយអ្នករៀបចំកម្មវិធីនិយាយថា ព្រឹត្តិការណ៍ប្រចាំឆ្នាំនេះនឹងផ្តោតលើការកាន់ទុក្ខដល់ជនរងគ្រោះនៃអគ្គិភ័យដ៏សាហាវដែលបានលេបត្របាក់អគារអាផាតមិនជាច្រើន និងបានចូលរួមបរិច្ចាគដល់កិច្ចខិតខំប្រឹងប្រែងសង្គ្រោះក្នុងហេតុការណ៍នេះផងដែរ។


ក្រុមហ៊ុនកម្សាន្តកូរ៉េ CJ ENM ដែលជាអ្នករៀបចំកម្មវិធីប្រគល់ពានរង្វាន់ K-pop ប្រចាំឆ្នាំមួយនេះ បាននិយាយថា ខ្លួននឹងរៀបចំពេលវេលាក្នុងកំលុងពេលព្រឹត្តិការណ៍រយៈពេលពីរថ្ងៃនេះ ដើម្បីគោរពវិញ្ញាណក្ខន្ធដល់ជនរងគ្រោះ និងធ្វើការបរិច្ចាគដើម្បីគាំទ្រដល់កិច្ចខិតខំប្រឹងប្រែងសង្គ្រោះ។
ស្របពេលក្រុមហ៊ុន CJ ENM មិនបានបញ្ចេញតួលេខថវិកាដែលខ្លួននឹងបរិច្ចាគ ខាងផលិតកម្ម SM Entertainment បានប្រកាសថា ពួកគេបានចូលរួមបរិច្ចាគចំនួន ១ លានដុល្លារហុងកុង (១២៨ ០០០ដុល្លារអាមេរិក) ដល់កាកបាទក្រហមហុងកុងដើម្បីជួយដល់ការពន្លត់អគ្គិភ័យ ការសង្គ្រោះ និងការឧបត្ថម្ភសម្ភារៈប្រើប្រាស់ប្រចាំថ្ងៃ ស្របពេលសិល្បកររបស់ខ្លួនដូចជាក្រុម aespa ចូលរួមបរិច្ចាគ ៥០ ម៉ឺនដុល្លារហុងកុង និង Riize ចូលរួមបរិច្ចាគ ២៥ ម៉ឺនដុល្លារហុងកុង។
បច្ចុប្បន្ន តួលេខអ្នកស្លាប់ក្នុងហេតុការណ៍អគ្គិភ័យខាងលើបានឡើងដល់យ៉ាងតិច ៩៤ នាក់ និងរបួស ៧៦ នាក់។ នេះបើផ្អែកតាមសេចក្ដីរាយការណ៍របស់ BBC នៅព្រឹកថ្ងៃសុក្រនេះ។
ក្រុមហ៊ុនបាននិយាយថា “ស្របតាមបរិយាកាសនៃការកាន់ទុក្ខក្នុងស្រុក ព្រឹត្តិការណ៍កម្រាលព្រំក្រហមត្រូវបានលុបចោល” ដោយបន្ថែមថាពិធីសំខាន់នឹងនៅតែត្រូវបានផ្សាយផ្ទាល់តាមកាលវិភាគ។
អ្នករៀបចំកម្មវិធីបាននិយាយថា ការផលិតកម្មវិធីត្រូវបានកែសម្រួលឡើងវិញដើម្បីផ្តោតលើ “ការរំលែកទុក្ខ និងផ្ដល់ក្តីសង្ឃឹម” ជាជាងការសម្តែងគគ្រឹកគគ្រេង ស្របពេលការរៀបចំឆាក និងការសម្តែងមួយចំនួនត្រូវបានរំពឹងថានឹងមានការផ្លាស់ប្តូរ។
ពានរង្វាន់ MAMA ឬ Mnet Asian Music Awards ដែលជាព្រឹត្តិការណ៍ដ៏ធំបំផុតមួយនៅសម្រាប់វិស័យ K-pop នឹងត្រូវធ្វើឡើងនៅពហុកីឡដ្ឋាន Kai Tak រហូតដល់ថ្ងៃសៅរ៍ ដោយចាប់ផ្តើមនៅម៉ោង ៧ និង ៣០ នាទី យប់ (ម៉ោងនៅកូរ៉េ) ខណៈឆ្នាំនេះកម្មវិធីបានវិលត្រឡប់មករៀបចំនៅទីក្រុងហុងកុងវិញជាលើកដំបូងក្នុងរយៈពេលប្រាំពីរឆ្នាំ។
សិល្បករ ក្រុមចម្រៀងល្បីៗដែលនឹងចូលរួមសម្ដែងក្នុងឆ្នាំនេះរួមមាន Babymonster, Enhypen, Hearts2Hearts, TWS, Stray Kids, Zerobaseone និង G-Dragon ៕


























Account
Security
Favourite Content