ក្រុមចម្រៀងបុរសជំនាន់ថ្មី RIIZE បានបង្ហាញភាពជោគជ័យមួយកម្រិតទៀតក្នុងអាជីពរបស់ខ្លួន ខណៈអាល់ប៊ុមខ្នាតពេញដំបូងរបស់ពួកគេអាចលក់ដាច់ដល់ ៨ សែនបន្ទះដោយប្រើរយៈពេលត្រឹមមួយថ្ងៃ។
កាលពីថ្ងៃទី១៩ ខែឧសភា RIIZE បានចេញផ្សាយអាល់ប៊ុមពេញដំបូងរបស់ខ្លួនមានចំណងជើងថា ODYSSEY ជាមួយបទចម្រៀងនាំមុខមានចំណងជើងថា “Fly Up”។ នៅថ្ងៃបន្ទាប់ គេហទំព័រកត់ត្រាការលក់អាល់ប៊ុមរបស់កូរ៉េខាងត្បូង Hanteo Chart ក៏បានរាយការណ៍ថាអាល់ប៊ុមនេះអាចលក់បានជាង ៨ សែនច្បាប់ សម្រាប់ថ្ងៃចេញផ្សាយដំបូង ដែលត្រូវបានគេចាត់ទុកថាជាកំណត់ត្រាថ្មីមួយសម្រាប់ក្រុមចម្រៀងនេះ។
គួរបញ្ជាក់ថា ពីមុនមកក្រុមចម្រៀងពីផលិតកម្ម SM Entertainment មួយនេះបានបង្កើតកំណត់ត្រាលក់អាល់ប៊ុមបានចំនួន ៦៦០ ០០០ ច្បាប់ សម្រាប់អាល់ប៊ុមខ្នាតតូចរបស់ពួកគេមានចំណងជើងថា RIIZING ដូច្នេះហើយចំនួនលក់សម្រាប់អាល់ប៊ុម ODYSSEY គឺជាកំណត់ត្រាថ្មីមួយរបស់ពួកគេ និងជាការឆ្លុះបញ្ចាំងឱ្យឃើញថាអាល់ប៊ុមថ្មីរបស់ក្រុមចម្រៀងដែលមានសមាជិក ៦ នាក់នេះ បានទទួលជោគជ័យជាទីគាប់ចិត្ត ហើយក៏ធ្វើឱ្យពួកគេមានឱកាសរីកចម្រើនកាន់តែខ្លាំងដូចគ្នា។
មិនតែប៉ុណ្ណោះ អាល់ប៊ុមថ្មីនេះក៏ជាអាល់ប៊ុម K-pop ដែលលក់ដាច់បំផុតលំដាប់ទី ២ ក្នុងឆ្នាំ ២០២៥ ផងដែរ ខណៈលំដាប់ទី១ គឺអាល់ប៊ុម BLUE PARADISE របស់ក្រុមចម្រៀងប្រុស ZEROBASEONE។
ODYSSEY – The 1st Album គឺជាអាល់ប៊ុមខ្នាតពេញដំបូងពីក្រុម RIIZE ដែលមានបទចម្រៀងសរុប ១០ បទរួមមានបទ “Odyssey,” “Bag Bad Back,” “Ember to Solar,” “Fly Up,” “Show Me Love,” “Passage,” “Midnight Mirage,” “The End of the Day,” “Inside My Love,” និងបទ “Another Life”។ បទចម្រៀងនីមួយៗមានស្ទីលតន្ត្រីផ្សេងៗគ្នា ដោយមានទាំង ប៉ុប មនោសញ្ចេតនា ហ៊ីបហប Retro ថែមទាំងមានចង្វាក់ Rock & Roll ដែលល្បីល្បាញតាំងពីទសវត្សរ៍ ១៩៥០ ផងដែរ ៕
























Account
Security
Favourite Content