ផ្អែកតាមសេចក្ដីរាយការណ៍ពីសារព័ត៌មាន Hollywood Reporter កាលពីពេលថ្មីៗ Netflix បានបង់ប្រាក់រង្វាន់ឱ្យក្រុមហ៊ុន Sony Pictures ចំនួន 15 លានដុល្លារសម្រាប់ភាពជោគជ័យនៃភាពយន្តគំនូរជីវចល «K-Pop: Demon Hunters»។ ប្រភពដដែលបញ្ជាក់ថា ការទូទាត់នេះត្រូវបានធ្វើឡើងជារង្វាន់សម្រាប់ភាពជោគជ័យដ៏លេចធ្លោរបស់ខ្សែភាពយន្តនេះនៅលើវេទិកា Netflix។

ប្រាក់រង្វាន់ចុងក្រោយ ធ្វើឱ្យប្រាក់ចំណេញសរុបរបស់ Sony Pictures ពីគម្រោងភាពយន្តនេះឈានដល់ 40 លានដុល្លារអាមេរិក ដោយមុននេះ Sony បានទទួលប្រហែល 25 លានដុល្លារអាមេរិករួចទៅហើយពី Netflix បន្ថែមពីថ្លៃដើមសម្រាប់ផលិតចំនួន 100 លានដុល្លារអាមេរិក។
របាយការណ៍ក៏បានបង្ហាញផងដែរថា Netflix និង Sony Pictures បានចុះហត្ថលេខាលើកិច្ចព្រមព្រៀងសម្រាប់ភាគបន្តនៃរឿង ‘K-Pop: Demon Hunters’ ដែលបច្ចុប្បន្នគ្រោងនឹងចេញផ្សាយនៅឆ្នាំ 2029។ យោងតាមសារព័ត៌មាន Variety ភាគីទាំងពីរបានឈានដល់កិច្ចព្រមព្រៀង ខណៈពេលនេះកំពុងពិចារណាលើពេលវេលាផលិតរយៈពេលវែងដែលជាធម្មតាគឺជាតម្រូវការចាំបាច់សម្រាប់ប្រភេទភាពយន្តគំនូរជីវចល។
គួរបញ្ជាក់ថា ភាពយន្ត “K-Pop: Demon Hunters” ដើមឡើយត្រូវបានគ្រោងសម្រាប់ការចេញបញ្ចាំងក្នុងរោងភាពយន្ត ប៉ុន្តែ Sony Pictures បានលក់សិទ្ធិចែកចាយទៅឱ្យ Netflix ក្នុងឆ្នាំ 2021 បន្ទាប់ពីការរាតត្បាតជំងឺ COVID-19 ។
ចេញផ្សាយទូទាំងពិភពលោកនៅលើ Netflix ក្នុងខែមិថុនា ឆ្នាំ 2024 ភាពយន្តនេះបានក្លាយជាមាតិកាពេញនិយមយ៉ាងខ្លាំង ដោយមានការទស្សនាលើសពី 300 លានដង និងជាខ្សែភាពយន្ត Netflix ដែលមានអ្នកទស្សនាច្រើនបំផុតក្នុងប្រវត្តិសាស្ត្រ។
មិនតែប៉ុណ្ណោះ បទចម្រៀងប្រកបក្នុងរឿងនេះក៏ទទួលបានជោគជ័យទូទាំងពិភពលោកផងដែរ។ ជាក់ស្ដែង បទចម្រៀងមានចំណងជើងថា “Golden” បានឈរនៅចំណាត់ថ្នាក់កំពូលនៃតារាង Billboard Hot 100 របស់សហរដ្ឋអាមេរិក និងតារាង UK Official Singles Chart ថែមទាំងបានជាប់ក្នុងបញ្ជីបេក្ខភាពពានរង្វាន់ Grammy ចំនួនប្រាំពានរង្វាន់ថែមទៀតកាលពីពេលថ្មីៗ ៕


























Account
Security
Favourite Content