ក្រុមហ៊ុន Universal Picture ទើបតែបញ្ចេញវីដេអូ Trailer ដំបូងសម្រាប់កំពូលភាពយន្តដាយណូស័រ “Jurassic World” វគ្គថ្មីកាលពីថ្ងៃទី៥ ខែកុម្ភៈ ដោយវគ្គថ្មីនេះមានចំណងជើងថា “Jurassic World Rebirth”។
បន្ទាប់ពីអាចរកចំណូលបានខ្ទង់រាប់ពាន់លានដុល្លារគ្រប់វគ្គ Franchise ភាពយន្តពិភពដាយណូស័រដ៏ល្បីល្បាញមួយនេះបាននិងកំពុងត្រៀមខ្លួនត្រលប់មកវិញជាមួយវគ្គទី៤ ដែលជាវគ្គបន្តពីភាពយន្ត “Jurassic World Dominion” កាលពីឆ្នាំ២០២២។
វគ្គថ្មីនេះនឹងបង្ហាញពីហេតុការណ៍កើតឡើងក្នុងរយៈពេល ៥ ឆ្នាំបន្ទាប់ពីវគ្គមុន ប៉ុន្តែសាច់រឿងនឹងមិនពាក់ព័ន្ធនឹងវគ្គមុនៗនោះឡើយ ខណៈតួសម្ដែងគឺសុទ្ធតែតួថ្មីទាំងអស់។ តួឯកសំខាន់ចំនួន ៣ រូបក្នុងវគ្គនេះរួមមាន តារាស្រីពីស៊េរីភាពយន្ត “Avengers” Scarlett Johansson និងតារាប្រុសពីររូបទៀតគឺ Jonathan Bailey និង Mahershala Ali ដោយអ្នកទាំង ៣ ត្រូវចុះបំពេញបេសកកម្មសម្ងាត់ដើម្បីស្វែងរកហ្សែនពីដាយណូស័រធំបំផុតទាំងបីរបស់ពិភពលោក ដែលមានសារធាតុអាចជួយសង្គ្រោះជីវិតមនុស្សបាន ក្នុងទីដាច់ស្រយាល ។ នៅតាមផ្លូវពួកគេបានជួបនឹងគ្រួសារមួយដែលកំពុងធ្វើដំណើរផ្សងព្រេងលើទូក ប៉ុន្តែក្រោយមកទូករបស់ពួកគេក៏ត្រូវបានពួកដាយណូស័រក្នុងទឹកវាយប្រហារ ធ្វើឱ្យពួកគេត្រូវជាប់គាំងនៅលើកោះដាច់ស្រយាលនោះទាំងអស់គ្នា។
គួរបញ្ជាក់ថា សាច់រឿងសម្រាប់ភាពយន្តថ្មីនេះគឺជាស្នាដៃនិពន្ធរបស់លោក David Koepp ដែលជាអ្នកនិពន្ធភាពយន្ត “Jurassic Park” កាលពីឆ្នាំ១៩៩៣ និងភាពយន្ត “The Lost World: Jurassic Park” កាលពីឆ្នាំ១៩៩៧ ដូចគ្នា។ សម្រាប់ទីតាំងថត ឈុតភាគច្រើនក្នុងរឿងនេះត្រូវបានថតក្នុងប្រទេសថៃ ក្នុងខេត្ត Krabi និងខេត្ត Phang Nga ។
ភាពយន្ត “Jurassic World Rebirth” នឹងចាប់ផ្ដើមបញ្ចាំងក្នុងសហរដ្ឋអាមេរិកនៅថ្ងៃទី២ ខែកក្កដា ឆ្នាំ២០២៥ ៕



























Account
Security
Favourite Content