អ្នកដឹកនាំរឿងហូលីវូដដ៏ល្បីឈ្មោះ លោក James Cameron កំពុងរៀបចំផលិតរឿងថ្មីនិយាយពីការទម្លាក់គ្រាប់បែកបរមាណូនៅទីក្រុង Hiroshima បន្ទាប់ពីបញ្ចប់គម្រោងភាពយន្ត “Avatar” វគ្គ៣។

សារព័ត៌មាន The Hollywood Reporter បានរាយការណ៍កាលពីពេលថ្មីៗនេះថា លោក James Cameron កំពុងរៀបចំគម្រោងផលិតកុនថ្មីបន្ទាប់ពី “Avatar” ដោយបានទិញសិទ្ធិលើសៀវភៅ “Ghosts Of Hiroshima” ក្នុងគោលបំណងបម្លែងសាច់រឿងប្រលោមលោកដែលនិយាយអំពីគ្រាប់បែកបរមាណូមួយនេះឱ្យក្លាយជាខ្សែភាពយន្ត។
គ្រោងចេញលក់ក្នុងខែសីហា ឆ្នាំ ២០២៥ ប្រលោមលោក “Ghosts Of Hiroshima” គឺជាស្នាដៃរបស់អ្នកនិពន្ធ Charles Pellegrino និងជាភាគបន្តពីប្រលោមលោក “Last Train From Hiroshima” របស់អ្នកនិពន្ធរូបនេះដូចគ្នា ដែលបានចេញផ្សាយកាលពីឆ្នាំ២០១៥។
ខ្សែភាពយន្តថ្មីដែលផលិតករ James Cameron ជ្រើសផលិតនេះនឹងបង្ហាញពីរឿងពិតរបស់វិស្វករអាយុ ២៩ ឆ្នាំឈ្មោះ Tsutomu Yamaguchi ជាមនុស្សតែម្នាក់គត់ដែលបានរួចជីវិតពីគ្រាប់បែកបរមាណូទាំងពីរដែលបានទម្លាក់លើប្រទេសជប៉ុនក្នុងអំឡុងសង្គ្រាមលោកលើកទីពីរ។ មានមនុស្សពី ១១ម៉ឺន ទៅ ២១ម៉ឺននាក់ត្រូវបានសន្និដ្ឋានថាបានស្លាប់ ដោយសារការទម្លាក់គ្រាប់បែកនេះ។
គួរបញ្ជាក់ថា James Cameron គឺជាអ្នកដឹកនាំរឿងល្បីបំផុតលើពិភពលោក ខណៈត្រូវបានស្គាល់សម្រាប់ការដឹកនាំភាពយន្តរកចំណូលបានច្រើនបំផុតក្នុងប្រវត្តិសាស្ត្រដល់ទៅ ៣ រឿងរួមមានភាពយន្ត Avatar វគ្គ១ ភាពយន្ត Avatar វគ្គ២ និងភាពយន្តកប៉ាល់ Titanic ។
ភាពយន្ត Avatar វគ្គ៣ មានចំណងជើងថា “Avatar: Fire and Ash” ដែលជាស្នាដៃដឹកនាំចុងក្រោយរបស់លោកគ្រោងនឹងចេញបញ្ចាំងក្នុងខែធ្នូ ឆ្នាំ២០២៥ ខាងមុខ ៕



























Account
Security
Favourite Content