ដំណឹងនៃការវិលត្រលប់របស់តារាសម្ដែងតួ Iron Man លោក Robert Downey Jr. មកកាន់ចក្រវាលភាពយន្ត Marvel បានបង្កភាពភ្ញាក់ផ្អើលខ្លាំងសម្រាប់អ្នកគាំទ្រភាពយន្តជុំវិញពិភពលោក ខណៈស្ទូឌីយោ Marvel ដែលជាអ្នកផលិតស៊េរីភាពយន្ត Avengers បានធ្វើការប្រកាសក្នុងកម្មវិធី San Diego Comic-Con 2024 កាលពីចុងសប្ដាហ៍ថាលោកនឹងចូលសម្ដែងជាតួអង្គថ្មីមានឈ្មោះថា Doctor Doom។

យ៉ាងណាមិញ ការទាក់ទងលោកឱ្យត្រលប់មកសម្ដែងភាពយន្ត Avengers ភាគថ្មីៗនេះហាក់មិនមែនជារឿងងាយស្រួលនោះឡើយ ដោយសារព័ត៌មានហូលីវូដ Variety បានរាយការណ៍ថា Marvel ត្រូវចំណាយប្រាក់ជាង ៨០ លានដុល្លារដើម្បីឱ្យលោកមកសម្ដែងតួអង្គនេះ។
ប្រភពព័ត៌មានដដែលនេះបានបញ្ជាក់ថា Robert Downey Jr. មានលក្ខខណ្ឌមួយចំនួនសម្រាប់ការវិលត្រលប់មកសម្ដែងភាពយន្តរបស់ Marvel វិញដូចជា ខាងស្ទូឌីយោត្រូវត្រៀមយន្តហោះឯកជន ក្រុមការពារសន្តិសុខ និងការសម្រួលផ្សេងៗទៀតនៅខណៈពេលថត ហើយលក្ខខណ្ឌដែលសំខាន់ជាងគេនោះគឺ ត្រូវមានអ្នកដឹកនាំបងប្អូន Russo ជាអ្នកដឹកនាំរឿង “Avengers: Doomsday” និង “Avengers: Secret Wars” ដែលគ្រោងនឹងចេញបញ្ចាំងនៅឆ្នាំ២០២៦ និង ២០២៧នោះ។ ដោយសារលក្ខខណ្ឌទាំងអស់នេះហើយទើបធ្វើឱ្យ Marvel ត្រូវបណ្ដាក់ទុនជាង ៨០ លានដុល្លារ ឬច្រើនជាងនេះ។
គួរបញ្ជាក់ថា Robert Downey Jr. គឺជាតារាសម្ដែងដែលមានតម្លៃខ្លួនខ្ពស់ជាងគេក្នុងចំណោមតួរឿង Avengers ទាំងអស់ ដោយកន្លងមកលោកត្រូវបានគេដឹងថាអាចទទួលបានតម្លៃខ្លួនចន្លោះ ៥០០ ទៅ ៦០០ លានដុល្លារពីភាពយន្ត Marvel គ្រប់ភាគដែលលោកបានចូលសម្ដែង រួមមានភាពយន្ត Avengers ចំនួន ៤ វគ្គ, ភាពយន្ត Iron Man ចំនួន ៣ វគ្គ រួមទាំងការលេចមុខបន្តិចៗក្នុងភាពយន្ត The Incredible Hulk, Captain America និង Spider-Man: Homecoming។ ដូច្នេះការដែលលោកវិលមកសម្ដែងជាតួ Doctor Doom ក៏ត្រូវបានគេជឿថាទទួលបានតម្លៃខ្លួនមហាសាលដូចគ្នាដែរ ៕



























Account
Security
Favourite Content