តាមប្រភពរបស់វេបសាយបរទេសមួយបានបង្ហាញថាខេត្តសៀមរាបជាតំបន់ទេសចរណ៍ដ៏ល្អបំផុត សម្រាប់ដំណើរកម្សាន្តបែប SOLO TRIP ក្នុងចំណោមតំបន់ជាច្រើនក្នុងប្រទេសនៅតំបន់អាស៊ីអាគ្នេយ៍ ខណៈតំបន់ទេសចរណ៍មួយត្រូវបានភ្ញៀវបរទេសចាត់ទុកជាទីក្រុងដែលពោរពេញដោយក្ដីស្រលាញ់ និងមានសុជីវធម៌ល្អ ។
ក្នុងបណ្ដាប្រទេសទាំង៦ នៅអាស៊ានដែលមានដូចជា កម្ពុជា សិង្ហបុរី ម៉ាឡេស៊ី វៀតណាម ថៃ និងឥណ្ឌូណេស៊ី មានតំបន់ជាច្រើនដែលអាចឱ្យអ្នកទេសចរធ្វើដំណើរកម្សាន្តបានដូចជា ភីណាង ដាណាង ហាណូយ បាងកក បាលី សៀមរាប និងកន្លែងជាច្រើនទៀត។
យ៉ាងណាមិញ សៀមរាបត្រូវបានចាត់ចូលជាទីក្រុងតូចដែលពោរពេញដោយក្ដីស្រលាញ់ និងសុជីវធម៌ ខណៈប្រទេស សិង្ហបុរី គួរត្រូវបានជ្រើសជាប្រទេសទី១ សម្រាប់ដំណើរកម្សាន្តបែបសូឡូទ្រីប រីឯប៉េងណាំង-ម៉ាឡេស៊ី ត្រូវបានចាត់ជាតំបន់អាហារតាមផ្លូវដ៏មានប្រជាប្រិយភាពនិងវប្បធម៌ក្នុងស្រុកដ៏ទាក់ទាញ។ សម្រាប់ ដាណាង-វៀតណាម ជាកន្លែងដែលមានឆ្នេរសមុទ្ទស្រស់ស្អាតដែលអាចឱ្យអ្នកទទួលយកបទពិសោធន៍ថ្មី និងប្លែកពីក្នុងតំបន់មួយនោះ រីឯហាណូយជាទីក្រុងដែលបង្កើតអារម្មណ៍រំជើបរំជួលសម្រាប់ភ្ញៀវទេសចរ ខណៈ បាលី-ឥណ្ឌូណេស៊ី ជាតំបន់ល្អបំផុតសម្រាប់វិស្សមកាល។
ចុងក្រោយ សៀមរាប ត្រូវបានចាត់ជាទីក្រុងតូចដែលសម្បូរទៅដោយក្ដីស្រលាញ់ ពោរពេញដោយសុជីវធម៌។ វេបសាយបរទេសមួយនេះក៏បានបង្ហាញតំបន់ប្រាសាទមួយចំនួនផងដែរដូចជា ប្រាសាទតាព្រហ្ម ប្រាសាទបន្ទាយស្រី ជាពិសេសស្ថាបត្យកម្មសំណង់ដ៏អស្ចារ្យនោះគឺ ប្រាសាទអង្គរវត្ត ។ ខេត្តមួយនេះត្រូវបានភ្ញៀវបរទេសវាយតម្លៃខ្ពស់លើសេវាកម្មរត់ tuk-tuk ដែលអាចផ្ដល់ជូនពួកគេនូវតម្លៃមួយដ៏សមរម្យក្រោយការតថ្លៃ ជាមួយការប្រើប្រាស់ពាក្យសម្ដីទន់ភ្លន់ជាមួយភ្ញៀវ ។ ផាប់ស្ត្រីត ជាកន្លែងប្រមូលផ្ដុំទៅដោយកន្លែងកម្សាន្ត បារ ដែលអាចឱ្យភ្ញៀវទេសចរអង្គុយ CHILL រំសាយភាពហត់នឿយពីការដើរមើលប្រាសាទនាពេលថ្ងៃ៕
វេបសាយ ៖ The Lonely Planet