ផលិតករវ័យក្មេងកញ្ញា រិទ្ធី លំអរពេជ្រ នឹងចូលរួមចែករំលែកវិធីសាស្ត្រ និងតិចនិកក្នុងដំណើរការផលិតខ្សែភាពយន្តដោយស្ម័គ្រចិត្តតាមរយៈកម្មវិធី ស៊ីណេក្លឹប ដែលរៀបចំធ្វើមជ្ឈមណ្ឌលធនធានសោតទស្សន៍បុប្ផាណានាថ្ងៃចន្ទសប្ដាហ៍ក្រោយនេះ។

តាមការឱ្យដឹងនៅក្នុងផេកផ្លូវការរបស់មជ្ឈមណ្ឌលបុប្ផាណា នៅថ្ងៃ ១៧ កុម្ភៈ ឆ្នាំ ២០២៥ ខាងមុខនេះសមិទ្ធិករភាពយន្ត រិទ្ធី លំអរពេជ្រ (YuKi) នឹងចូលរួមចែករំលែកចំណេះដឹងលើវិស័យភាពយន្តក្រោមប្រធានបទស្ដីអំពី «ផ្ដើមពីគំនិតទៅកាន់ការសរសេរ និងទស្សនីយភាព» តាមរយៈកម្មវិធី ស៊ីណេក្លឹប ដែលការបង្ហាញមួយនេះនឹងផ្ដោតលើជំហាននៃដំណើរការផលិតភាពយន្ត សម្រាប់សមិទ្ធិករភាពយន្តវ័យក្មេងដែលមានបំណងចង់បន្តអាជីពក្នុងវិស័យភាពយន្ត។ ការចូលរួមចែករំលែករបស់ផលិតករវ័យក្មេងរូបនេះធ្វើឡើងជាភាសាខ្មែរ នៅក្នុងទីតាំងនៃមជ្ឈមណ្ឌលបុប្ផាណា ចាប់ពីម៉ោង៦ល្ងាចតទៅ សម្រាប់សាធារណជនចូលរួមដោយសេរី។





រិទ្ធី លំអរពេជ្រ (YuKi) គឺជាសមិទ្ធករភាពយន្តស្រ្ដីមួយរូបដែលមានបទពិសោធច្រើនក្នុងវិស័យភាពយន្ត ដែលស្នាដៃភាគច្រើនផ្ដោតលើការប៉ះទង្គិចផ្លូវចិត្តតជំនាន់ អត្តសញ្ញាណភេទ និងទិដ្ឋភាពស៊ីជម្រៅនៃជីវិតគ្រួសារកម្ពុជា ដោយផ្តោតលើមនុស្សវ័យជំទង់។ ដោយឡែក ផលិតករវ័យក្មេងពោរពេញដោយទេពកោសល្យរូបនេះក៏ធ្លាប់បាននាំយកស្នាដៃភាពយន្តរបស់ខ្លួនដាក់បង្ហាញលើឆាកអន្តរជាតិក្នុងកម្មវិធីធំៗជាច្រើនផងដែរ៕
ប្រភពរូបភាព ៖ Lomorpich Rithy























Account
Security
Favourite Content