បន្ទាប់ពីចេញបទចម្រៀង Pre release មានចំណងជើងថា “GO!” កាលពីសប្តាហ៍មុន នៅពេលនេះក្រុមចម្រៀងប្រុសថ្មីរបស់ Big Hit មានឈ្មោះថា CORTIS ក៏បានធ្វើការបង្ហាញខ្លួនជាផ្លូវការ ជាមួយបទចម្រៀង “What You Want” ជាបទចម្រៀងនាំមុខសម្រាប់អាល់ប៊ុមដំបូងរបស់ពួកគេ “COLOR OUTSIDE THE LINES” ដែលនឹងចេញលក់នៅថ្ងៃទី ៨ ខែកញ្ញា។

បទចម្រៀង “What You Want” បានចេញមកជាមួយវីដេអូ Conceptual Performance ចេញផ្សាយនៅលើឆានែល YouTube របស់ HYBE LABELS ។ បទចម្រៀងនេះគឺជាការលាយបញ្ចូលគ្នានៃតន្ត្រីមិនធម្មតាសម្រាប់បទចម្រៀង K-pop ដោយរួមបញ្ចូលគ្នានូវហ្គីតារ៉ុកបែបទសវត្សរ៍ឆ្នាំ ១៩៦០ ជាមួយនឹងចង្វាក់ហ៊ីបហប។ សមាជិកទាំងប្រាំនាក់រួមមាន MARTIN, JUHOON, SEONGHYEON, KEONHO, និង JAMES ក៏បានចូលរួមក្នុងការបង្កើតក្បាច់រាំផងដែរ។ ទំនុកបទចម្រៀងបានបង្ហាញពីភាពក្លាហានក្នុងការស្វែងនូវអ្វីដែលខ្លួនប៉ងប្រាថ្នា មិនថាជាស្នេហា សេរីភាព សុភមង្គល លុយកាក់ ឬសន្តិភាពក្នុងជីវិត។
សមាជិកក្រុមក៏បានបង្ហាញផងដែរថាបទចម្រៀងនេះត្រូវបានជ្រើសរើសយ៉ាងយកចិត្តទុកដាក់ក្នុងចំណោមបទចម្រៀង Demo ជាង ៣០០ បទដែលពួកគេបានផលិត។ ដូច្នេះហើយបទនេះពិតជាសំខាន់ខ្លាំងសម្រាប់ពួកគេ ខណៈតំណាងឱ្យចក្ខុវិស័យ ទិសដៅសិល្បៈ និងតន្ត្រីរបស់ក្រុម។


គួរបញ្ជាក់ថា CORTIS គឺជាក្រុមថ្មីដំបូងរបស់ BIGHIT MUSIC ក្នុងរយៈពេលជាច្រើនឆ្នាំមកនេះ ពោលគឺចាប់តាំងពី TXT បានចេញកាលពីប្រាំមួយឆ្នាំមុន ថែមទាំងមានក្រុមចម្រៀងប្រុសលំដាប់ពិភពលោកដូចជា BTS ជាសិស្សច្បងរួមទ្រនំផងដែរ។
នៅពេលអ្នកកាសែតសួរអំពីដំបូន្មានដែលពួកគេបានទទួលពីសិល្បករ HYBE ផ្សេងទៀត Seonghyeon បានចែករំលែកថាពួកគេបានជួបទាំង BTS និង TXT ដោយនិយាយថា “សមាជិកក្រុម BTS ពិតជាបានលើកទឹកចិត្តពួកយើង និងគាំទ្រពួកយើងពេញទំហឹង”។
Seonghyeon បានបន្ថែមថា “ពួកយើងបានសម្តែងនៅចំពោះមុខ TXT និងទទួលបានមតិកែលម្អជាក់ស្តែងពីពួកគេ។ មតិទាំងនោះពិតជាសំខាន់សម្រាប់ការបង្ហាញខ្លួនលើកដំបូងរបស់យើង”។ បន្ទាប់មក Martin បានចែករំលែកថា j-hope បានប្រាប់ពួកគេឱ្យ “ចេះដឹងគុណ ឱនលំទោន និងបន្តអភិវឌ្ឍសមត្ថភាពនៅពេលទទួលបានភាពល្បីល្បាញ” ៕





























Account
Security
Favourite Content