ព័ត៌មានកម្សាន្តប្លែកៗ
រសនិយម
តន្រ្តី
ភាពយន្ត
មាតិកាឌីជីថល
បើកសោជីវិត
ចង់ដឹងរឿងគេ
វនយាត្រា
Cicada Agent
ព្រះនាងកង្កែប
ស្ថិតនៅភូមិសាស្ត្រសហគមន៍ភ្នំទ័ពជាងនៃឧទ្យាជាតិជួរភ្នំក្រវាញខាងត្បូង ឃុំដងពែង ស្រុកស្រែអំបិល ខេត្តកោះកុង តំបន់ទឹកធ្លាក់ស្ទឹងពង្រូល គឺជាប្រភពសម្បូណ៍ទៅដោយធនធានធម្មជាតិ សត្វព្រៃនិងទឹកធ្លាក់ជាទីកម្សាន្តដ៏មនោរម្យ។
ដើម្បីទៅដល់ទឹកធ្លាក់ដ៏ស្រស់ត្រកាលនេះអ្នកទេសចរអាចធ្វើដំណើរតាមផ្លូវចំនួន ៣ ខ្សែ រួមមានផ្លូវទី១ផ្លូវចូលតាមស្រុក ស្រែអំបិល និងចំណែក២ខ្សែទៀតគឺគេអាចចូលតាមស្រុកកំពង់សិលាមានចម្ងាយជិត ៣០គីឡូម៉ែត្រពីផ្លូវជាតិលេខ ៤។ ទឹកធ្លាក់ស្ទឹងពង្រូលមាន២ដំណាក់គឺទឹកធ្លាក់ផ្នែកខាងលើ និងផ្នែកខាងក្រោម។ ទឹកធ្លាក់នៅផ្នែកខាងលើគេចាំបាច់ត្រូវធ្វើដំណើរឡើងលើកំពូលភ្នំដែលមានប្រវែងប្រមាណ១គីឡូម៉ែត្រ។
ពាក់ព័ន្ធប្រវត្តិនៃឈ្មោះស្ទឹងពង្រូលនេះ លោក ឆាយ ធារ៉ា អនុប្រធានសមាគមន៍តំបន់ការពារធម្មជាតិភ្នំទ័ពជាង បានឱ្យដឹងថាដោយសារពីដើមឡើយទីនេះសម្បូរទៅដោយសត្វពង្រូល ទើបចាស់ៗសម័យមុនបានដាក់ឈ្មោះជាទឹកធ្លាក់ស្ទឹងពង្រូលមកដល់សព្វថ្ងៃ ហើយរហូតមកដល់បច្ចុប្បន្នសត្វពង្រូលក៏នៅតែមានវត្តមានច្រើននៅទីកន្លែងនេះនៅឡើយដែរ ដោយពួកវាចូលចិត្តរស់នៅតាមមាត់ស្ទឹងដែលសម្បូណ៍ទៅដោយចំណីអាហារ និងកន្លែងលាក់បំពួនខ្លួនបានយ៉ាងងាយស្រួល។ លោកបានបន្ថែមថា នៅតាមដងស្ទឹងពង្រូលអ្នកទេសចរគេអាចមកបោះតង់សម្រាកពេលយប់ ដើម្បីស្តាប់សត្វយំ មើលពពកលើភ្នំ និងទទួលនូវខ្យល់បរិសុទ្ធប្រកបដោយភាពសប្បាយរីករាយយ៉ាងជាប់ចិត្តពីទីកន្លែងនៃសម្រស់ធម្មជាតិគ្មានពីរមួយកន្លែងនេះ។
អ្វីជាទីចាប់អារម្មណ៍របស់ក្រុមអ្នកទេសចរគឺផ្ទាំងថ្មធំៗដែលផ្ទាំងខ្លះមានទំហំរហូតដល់១០ម៉ែត្រ មានស្នាមប្រេះរហែកតាមកាលវេលាច្រើនឆ្នាំមកហើយ ធ្វើឱ្យទឹកហូរជ្រែកប្រដេញគ្នាធ្លាក់ពីលើ ចុះមកក្រោមបែកផ្សែងទឹកសំពោងនិងមានស្នូរសំឡេងគួរជាទីសប្បាយរីករាយ។ ទឹកនៅទីកន្លែងនេះមានសភាពត្រជាក់ស្រេង និងថ្លាដូចកញ្ចក់ បើបានចុះងូតហើយមិនចង់ងើបចេញវិញសោះឡើយ។
ភាពស្រស់ស្អាតនៃធម្មជាតិទឹកធ្លាក់កន្លែងនេះបង្កើតនូវទស្សនីយភាពអស្ចារ្យផ្នែកធម្មជាតិនិងមានសភាពរស់រវើកគួរជាទីកន្លែងសម្រាប់សម្រាកលំហែកាយដែលគ្មានគូរប្រៀប។ ក្រៅពីនេះនៅតំបន់ជុំវិញទឹកធ្លាក់ក៏អមទៅដោយដើមរុក្ខជាតិតូចធំដុះប្រជ្រៀតគ្នាធ្វើឱ្យយើងគយគន់មើលហើយស្ទើរអត់សរសើរពីសម្រប់ធម្មជាតិបង្កើតមកយ៉ាងអស្ចារ្យនៅតំបន់មួយកន្លែងនេះពុំបាន។
ទឹកធ្លាក់ស្ទឹងពង្រូលបច្ចុប្បន្នស្ថិតនៅក្នុងតំបន់អភិរក្សរបស់សហគមន៍នៃឧទ្យានជាតិជួរភ្នំក្រវាញខាងត្បូងដែលត្រូវបានបង្កើតឡើងក្នុងគោលបំណងសំខាន់ក្នុងការអភិរក្ស ព្រៃឈើ សត្វព្រៃ និងសម្បត្តិធម្មជាតិតាំងតែពីបុរាណកាលរបស់ដូនតាឱ្យស្ថិតនៅគង់វង្សយូរអង្វែងដល់កូនចៅជំនាន់ក្រោយបន្តទៅទៀត ៕
រូបភាព៖ ក្រុមប្រមាញ់រូបភាពជីវៈចម្រុះកម្ពុជា – ម៉ក់ ភារៈ
Account
Security
Favourite Content