ថ្មីៗនេះតារាសម្ដែងស្រី Park Min Young បានធ្វើឱ្យមហាជន និងអ្នកគាំទ្ររបស់នាងភ្ញាក់ផ្អើលជាខ្លាំងក្រោយនាងបានព្យាយាមសម្រកមកសល់ត្រឹម ៣៧គីឡូ ដើម្បីថតរឿងថ្មីដែលមានចំណងជើងថា Marry My Husband ដោយតម្រូវឱ្យនាងដើរតួជាអ្នកជំងឺ។

នៅក្នុងរឿងនោះ គេអាចឃើញថានាងមានរូបរាងស្គមស្គាំង ទឹកមុខស្លេកស្លាំងសមជាអ្នកជំងឺពិតៗ ប៉ុន្តែទោះស្រកទម្ងន់ខ្លាំងថ្នាក់ណាក៏មិនបានធ្វើឱ្យប៉ះពាល់ដល់សម្រស់សុខភាពស្បែករបស់នាងដែរដែលនេះក៏បានធ្វើឱ្យទស្សនិកជនសរសើរមិនដាច់ពីមាត់ឡើយ។ ចំពោះអាថ៌កំបាំងថែស្បែកតារាស្រី Park Min Young បានចែករំលែកថា៖

- មិនភ្លេចឡេការពារកម្ដៅថ្ងៃ៖ តារាស្រីរូបនេះបានប្រាប់អ្នកសារព័ត៌មានកូរ៉េថានាងមានទម្លាប់លាបឡេការពារកម្ដៅថ្ងៃតាំងពីនៅថ្នាក់វិទ្យាល័យមកម្ល៉េះ ហើយក៏បានរក្សាទម្លាប់នេះមកដល់សព្វថ្ងៃដែរ។ ការលាបឡេការពារកម្ដៅថ្ងៃជួយការពារស្បែករបស់នាងពីពន្លឺព្រះអាទិត្យ និងកាត់បន្ថយភាពចាស់មុនអាយុ។
- ប្រើប្រាស់ម៉ាសបំប៉នស្បែក៖ នៅក្នុងឆាណែលយូធូបរបស់នាង តារាស្រី Park Min Young ធ្លាប់បាននិយាយថាពេលខ្លះនាងត្រូវផាត់មុខច្រើនម៉ោង ដូច្នេះនាងបានព្យាយាមជម្រះគ្រឿងសម្អាងរាល់ពេលសម្រាកថតរឿង និងឆ្លៀតបិតម៉ាសផងដែរ។ នាងក៏បានបន្ដទៀតថាថ្ងៃនេះនាងបានប្រើរហូតដល់ ២-៣ ដងក្នុងមួយថ្ងៃទៀតផង។
- ប្រើម៉ាសផ្ដល់សំណើមជារៀងរាល់ថ្ងៃ៖ អាថ៌កំបាំងមួយទៀតដើម្បីជួយឱ្យស្បែករបស់តារាស្រីរូបនេះនៅតែភ្លឺរលោង គ្មានស្នាមជ្រួញគឺការប្រើម៉ាសដែលមានមុខងារផ្ដល់សំណើមជារៀងរាល់ថ្ងៃ។ មិនត្រឹមប៉ុណ្ណេះ នាងក៏មិនភ្លេចប្រើម៉ាសដែលមានមុខងារជួយឱ្យស្បែក ស ផងដែរ។
- ផាត់មុខបែបធម្មជាតិ៖ បើជាអ្នកគាំទ្ររបស់តារាស្រី Park Min Young ប្រាកដជាដឹងហើយថានាងកម្រនឹងផាត់មុខបែបក្រាស់ៗខ្លាំងណាស់។ ផ្ទុយទៅវិញ នាងចូលចិត្តផាត់មុខបែបស្ដែងស្រាល មើលទៅធម្មជាតិដោយនាងគិតថាស្ទីលតុបតែងមុខបែបនេះនឹងរំលេចភាពស្រស់ស្អាត ស្បែកភ្លឺថ្លា និងក្មេងជាងវ័យ ៕



























Account
Security
Favourite Content