ព័ត៌មានកម្សាន្តប្លែកៗ
រសនិយម
តន្រ្តី
ភាពយន្ត
មាតិកាឌីជីថល
បើកសោជីវិត
ចង់ដឹងរឿងគេ
វនយាត្រា
Cicada Agent
ព្រះនាងកង្កែប
១. ផ្ដល់កិត្តិយស៖ គេផ្ដល់កិត្តិយសឱ្យអ្នកទាំងនៅចំពោះមុខ និងកំបាំងមុខ មិននិយាយបន្ទាបតម្លៃរបស់អ្នក និងមិនបណ្ដែតបណ្ដោយឱ្យអ្នកណាមកនិយាយឌឺដងដាក់អ្នកដោយការរក្សានូវភាពស្ងប់ស្ងាត់ឡើយ។ មនុស្សដែលគួរឱ្យចូលក្នុងជីវិត គឺមនុស្សដែលធ្វើឱ្យអ្នកមានអារម្មណ៍ថាមានសុវត្ថិភាព មិនមែនធ្វើឱ្យអ្នកត្រូវបង្ខំញញឹមដើម្បីរក្សាបរិយាកាសនោះទេ។
២. ទំនាក់ទំនងត្រង់ទៅត្រង់មក៖ គេនិយាយច្បាស់ៗ មិនបាត់ខ្លួន មិនលេងចរិត និងមិនទុកឱ្យអ្នកអង្គុយទាយចិត្តតែម្នាក់ឯង។ បើថ្ងៃណាគេរវល់ ហត់ ឬមិនទាន់រួចរាល់ គេនឹងប្រាប់ មិនមែនប្រើភាពស្ងប់ស្ងាត់ធ្វើឱ្យអ្នកគិតច្រើនរហូតបន្ទោសខ្លួនឯងឡើយ។
៣. ទទួលខុសត្រូវលើពាក្យសម្ដី៖ គេនិយាយហើយធ្វើ មិនសន្យាគ្រាន់តែដើម្បីឱ្យអ្នកសប្បាយចិត្តមួយពេល។ បើធ្វើខុស គេហ៊ានទទួលស្គាល់ មិនទុកឱ្យអ្នករង់ចាំ ហើយមកសុំទោសគ្រាន់តែដើម្បីឱ្យចប់រឿងនោះទេ ព្រោះភាពស្មោះត្រង់វាស់វែងដោយសកម្មភាព។
៤. នៅក្បែរហើយមានអារម្មណ៍ស្រួលចិត្ត៖ នៅជាមួយគេ អ្នកមិនចាំបាច់ធ្វើជាមនុស្សពូកែ ឬរឹងមាំគ្រប់ពេលនោះទេ។ អ្នកអាចទន់ជ្រាយបាន អាចនិយាយរឿងអាក្រក់ៗដែលបានជួបបាន ដោយមិនត្រូវបានគេវាយតម្លៃ ព្រោះគេចង់យល់ពីអ្នក មិនមែនចង់យកឈ្នះអារម្មណ៍របស់អ្នកឡើយ។
៥. គោរពព្រំដែនផ្ទាល់ខ្លួន៖ គេមិនបង្ខំ មិនគាបសង្កត់ និងមិនប្រើពាក្យថា “ស្រឡាញ់” មកដូរនឹងការឱ្យអ្នកយល់ព្រមតាមគេគ្រប់យ៉ាង។ គេយល់ពីពាក្យថា “មិនទាន់ត្រៀមខ្លួនរួចរាល់” និងមិនធ្វើឱ្យអ្នកមានអារម្មណ៍ខុសដែលជ្រើសរើសមើលថែបេះដូងខ្លួនឯងមុន។
៦. ផ្ដល់ឋានៈច្បាស់លាស់៖ គេមិនធ្វើឱ្យអ្នកត្រូវទៅប្រកួតប្រជែងជាមួយអ្នកណា និងមិនធ្វើឱ្យអ្នកសង្ស័យថាខ្លួនឯងឈរនៅត្រង់ណាឡើយ ព្រោះមនុស្សដែលស្មោះត្រង់ នឹងមិនទុកឱ្យមនុស្សដែលគេស្រឡាញ់រស់នៅក្នុងភាពមិនច្បាស់លាស់ឡើយ។
៧. ចេះមើលថែខ្លួនឯង៖ គេចេះចាត់ចែងជីវិតខ្លួនឯង មិនជះអារម្មណ៍មិនល្អ ឬយកបញ្ហាមកគរលើអ្នក ហើយឱ្យអ្នកធ្វើជាអ្នកព្យាបាលតែម្នាក់ឯងឡើយ។ ក្ដីស្រឡាញ់មិនគួរជាបន្ទុកផ្លូវចិត្តនោះទេ។
៨. ផ្ដល់ចន្លោះផ្ទាល់ខ្លួនឱ្យគ្នា៖ គេមិនហួងហែងពេលវេលា ឬជីវិតឯកជនរបស់អ្នកឡើយ។ គេចង់ឃើញអ្នកមានពិភពលោកផ្ទាល់ខ្លួន មានមិត្តភក្តិ មានក្ដីស្រមៃ ហើយត្រឡប់មកប្រាប់គេវិញដោយស្នាមញញឹម មិនមែនត្រឡប់មកវិញជាមួយពាក្យបកស្រាយការពារខ្លួននោះទេ។
៩. សរសើរអ្វីដែលជាអ្នក៖ គេសរសើរនូវអ្វីដែលអ្នកព្យាយាម មិនមែនត្រឹមតែរូបរាងខាងក្រៅ។ គេមើលឃើញភាពនឿយហត់ ការតាំងចិត្ត និងការមិនចុះចាញ់របស់អ្នក។ ពាក្យសរសើរបែបនេះនឹងស្ថិតក្នុងចិត្តអ្នកបានយូរ។
១០. ចេះសុំទោស៖ គេសុំទោសដោយមិនរកលេសដោះសា និងព្យាយាមកែប្រែពិតប្រាកដ។ មិនមែនសុំទោសដើម្បីឱ្យចប់រឿង ប៉ុន្តែសុំទោសដើម្បីកុំឱ្យអ្នកត្រូវឈឺចាប់ក្នុងរឿងដដែលៗទៀត។
១១. មិនលេងល្បែងផ្លូវចិត្ត៖ គេមិនសាកល្បងចិត្ត ឬបាត់ខ្លួនដើម្បីចង់ដឹងថាអ្នកនឹងតាមគេឬអត់ ព្រោះមនុស្សដែលចាស់ទុំ គេមិនយកផ្លូវចិត្តអ្នកដទៃមកធ្វើជាឧបករណ៍បញ្ជាក់តម្លៃខ្លួនឯងឡើយ។
១២. ស្មោះត្រង់៖ គេមិនកុហកសូម្បីតែរឿងតូចតាច និងមិនបង្កើតរូបភាពឱ្យមើលទៅល្អជ្រុល ព្រោះភាពស្មោះត្រង់គឺជាគ្រឹះនៃទំនុកចិត្ត ហើយទំនុកចិត្តគឺជាអ្វីដែលធ្វើឱ្យទំនាក់ទំនងទៅមុខបានយូរអង្វែង។
១៣. ផ្ដល់ឱ្យដោយមិនទាមទារសងគុណ៖ គេស្រឡាញ់អ្នកដោយមិនធ្វើឱ្យអ្នកមានអារម្មណ៍ថាជំពាក់គុណគេ មិនរំលើកអ្វីដែលធ្លាប់ធ្វើមកទាមទារវិញ។ ក្ដីស្រឡាញ់ដ៏ល្អ មិនគួរធ្វើឱ្យអ្នកណាម្នាក់មានអារម្មណ៍ខុសដែលត្រូវបានគេស្រឡាញ់នោះទេ។
១៤. មិនបង្ខំឱ្យបន្ទាបតម្លៃខ្លួនឯង៖ គេមិនធ្វើឱ្យអ្នកត្រូវទ្រាំ ឬប្រាប់ឱ្យអ្នកឈប់គិតច្រើនដើម្បីឱ្យគេស្រួលខ្លួនឡើយ ប៉ុន្តែគេជួយគ្នាស្វែងរកវិធីមើលថែអារម្មណ៍គ្នាទៅវិញទៅមកទាំងសងខាង។
១៥. មិនល្អតែដំបូង៖ គេមិនល្អតែដំបូង ហើយក៏មិនបាត់ខ្លួនរួចត្រឡប់មកវិញជាមួយពាក្យផ្អែមល្ហែមដែរ។ គេនៅដដែលទាំងក្នុងថ្ងៃដែលអ្នកស្រស់ស្រាយ និងថ្ងៃដែលអ្នកហត់នឿយ ព្រោះភាពនឹងនរគឺជាក្ដីស្រឡាញ់ដែលប៉ះពាល់បាន។
១៦. នៅជាមួយហើយមានការរីកចម្រើន៖ នៅជាមួយគេ អ្នកកាន់តែស្រឡាញ់ខ្លួនឯងលើសដើម ហ៊ានសម្រេចចិត្ត ហ៊ានស្រមៃ និងហ៊ានមើលថែអនាគត មិនមែនប្រើកម្លាំងកាយចិត្តទៅលើការសង្ស័យ និងខូចចិត្តដដែលៗឡើយ។
១៧. បង្ហាញក្ដីស្រលាញ់តាមរយៈសកម្មភាព៖ គេស្រលាញ់អ្នកដោយប្រើពេលវេលា ការយកចិត្តទុកដាក់ និងភាពច្បាស់លាស់ មិនមែនត្រឹមតែសម្ដីផ្អែមល្ហែមនោះទេ។ ព្រោះមនុស្សដែលគួរឱ្យចូលមកក្នុងជីវិត នឹងធ្វើឱ្យអ្នកមានភាពជឿជាក់ មិនមែនធ្វើឱ្យអ្នកត្រូវព្យាយាមទាមទារនោះឡើយ ៕
Account
Security
Favourite Content