ជាធម្មតាមិត្តភក្ដិគឺប្រៀបដូចជាសាច់ញាតិរបស់យើងដែលអាចនៅក្បែរគ្នា ដើម្បីប្រឹក្សា ចែករំលែករឿងក្នុងចិត្ត និងធ្វើរឿងជាច្រើនជាមួយគ្នា។ ប៉ុន្តែការរាប់អានមិត្តភក្ដិក៏ចាំបាច់ត្រូវតែសង្កេតមើលឱ្យច្បាស់ដែរ បើមិនដូច្នោះទេគឺប្រៀបដូចជាយើងកំពុងនាំទុក្ខយកជិតខ្លួនដែរ។ ដូច្នេះហើយថ្ងៃនេះ AMS នឹងចែករំលែកនូវមនុស្ស ៣ ប្រភេទដែលមិនយកមកជិតខ្លួនឡើយ៖
១. មនុស្សលោភលន់

ក្នុងជីវិតមនុស្សជឿជាក់ថាអ្នកណាម្នាក់ក៏ចង់មានចង់បានដោយមិនមានការខ្វះខាតដែរ។ ប៉ុន្តែការចង់មានចង់បានទាំងនោះគឺត្រូវតែមានដែនកំណត់ដូចគ្នា។ នៅពេលដែលមនុស្សម្នាក់ចេះតែចង់បានខ្លាំងពេករហូតដល់កើតជាភាពលោភលន់មិនចេះគ្រប់គ្រាន់ហើយ ច្បាស់ណាស់មនុស្សម្នាក់នោះនឹងស្ដាយក្រោយក្នុងការលះបង់មិត្តភាពឡើយ។ ទន្ទឹមនឹងនេះ ប្រសិនបើរាប់អានជាមួយមនុស្សប្រភេទនេះពិតជាមានតែរឿងអន់ចិត្ត និងខាតពេលប៉ុណ្ណោះ។
២. មនុស្សមិនចេះព្រលែង
គ្មានអ្នកណាម្នាក់នៅលើលោកដែលមិនចេះជួបបញ្ហាទុក្ខព្រួយឡើយ គ្រាន់តែក្នុងរូបភាព និងកាលៈទេសៈខុសគ្នាប៉ុណ្ណោះ។ ការដែលឱបទុក្ខជាប់ខ្លួនពេកគឺប្រៀបដូចជាឱបដំថ្មដ៏ធំមួយដុំ ហើយលោតចូលរណ្ដៅមួយដូច្នោះដែរ។ ដូច្នេះការរាប់អានមនុស្សដែលមិនចេះព្រលែងបញ្ហាចេញទាល់តែសោះ នឹងជួបតែបញ្ហាបាំងមុខ មិនស្រស់ស្រាយ ហើយជីវិតគឺមានតែភាពវិលវល់ជាដើម។
៣. មនុស្សលេចលង់ក្នុងអតីតកាល

ជីវិតមនុស្សនឹងចាប់ផ្ដើមជាថ្មីនៅពេលដែលថ្ងៃថ្មីឈានចូលមកដល់។ ដូច្នេះរឿងរ៉ាវដែលកើតឡើងនៅថ្ងៃចាស់មួយចំនួនក៏គួរតែបោះចោលតាមហ្នឹងដែរ។ ការរស់នៅកប់ក្នុងអតីតកាល គឺមិនមានអ្វីប្រសើរឡើងឡើយ ផ្ទុយទៅវិញវាមានតែបន្សល់ទុកនូវភាពសោកសៅ និងបញ្ហាដែលចាក់ស្រេះមិនចេះចប់ហើយកាន់តែធ្វើឱ្យមានភាពតែនឿយហត់ក្នុងជីវិតដែរ។ ដូច្នេះមនុស្សប្រភេទនេះ ប្រសិនបើជួយហើយនៅតែមិនអាចក្រោកឈរបានទៀត ច្បាស់ណាស់ពួកគេនឹងនាំតែភាពសោកសៅមកឱ្យតែប៉ុណ្ណោះ៕

























Account
Security
Favourite Content