ក្នុងគ្រួសារនីមួយៗ គ្រួសារក៏ចង់បានស្នាមញញឹម ភាពរីករាយ ភាពកក់ក្ដៅ និងសុភមង្គលផងដែរ។ ចំណុចដែលបានរៀបរាប់ទាំងអស់នេះ សុទ្ធតែការសាងឡើងដោយផ្ទាល់ពីសមាជិកក្នុងគ្រួសារ។ ដូច្នេះហើយ ថ្ងៃនេះ AMS សូមចែករំលែកជូន ៤ ចំណុចដែលគ្រួសារនីមួយៗគួរធ្វើដើម្បីបង្កើតសុភមង្គល៖
១. ភាពសុខដុមក្នុងគ្រួសារ
បរិយាកាសរស់នៅរបស់គ្រួសារនីមួយៗគឺជារឿងសំខាន់បំផុតក្នុងកសាងភាពសុខដុម។ ផ្ទុយទៅវិញ ប្រសិនបើក្នុងគ្រួសារចេះតែមានជម្លោះទាស់ទែងគ្នា ប្រកែកគ្នារាល់ថ្ងៃ នោះមិនមានឡើយពាក្យថាសុខដុម។ លើសពីនេះការរក្សាទង្វើល្អៗបែបនេះក៏ជាទម្លាប់ល្អ និងមានឥទ្ធិពលមួយដែលយើងអាចបង្ហាត់បង្ហាញទៅដល់ក្មេងៗជំនាន់ក្រោយផងដែរ។
២. សម្ព័ន្ធភាពប្ដីប្រពន្ធ
ប្ដីប្រពន្ធគឺប្រៀបបាននឹងដៃទាំងគូដែលចាំឱបក្រសោបក្ដីសុខក្នុងគ្រួសារ។ អ្នកទាំងពីរច្បាស់ណាស់ត្រូវសហការគ្នាបង្កើតស្នាមញញឹម និងភាពកក់ក្ដៅ។ ដូច្នេះវាជារឿងចាំបាច់ដែលអ្នកទាំងពីរចេះយោគយល់ពីគ្នា លើកទឹកចិត្តគ្នា កាត់បន្ថយជម្លោះ ជួយគ្នា និងព្យាយាមស្វែងរកចំណុចកណ្ដាលល្អមួយដើម្បីរស់នៅឱ្យកាន់តែចុះសម្រុងជាមួយគ្នាឱ្យបានយូរអង្វែង។
៣. ការបង្ហាត់បង្ហាញកូនចៅ
ឪពុកម្ដាយគឺជាគ្រួដំបូងបង្អស់របស់កូនៗ ដូច្នេះហើយអ្នកទាំងពីរត្រូវតែធ្វើខ្លួនឱ្យល្អជាគំរូទៅដល់ក្មេងៗជំនាន់ក្រោយ។ ប្រសិនបើកូនចៅរបស់យើងចាប់ផ្ដើមមានទម្លាប់ចេះគិតវែងឆ្ងាយ ឧស្សាហ៍ព្យាយាម ចេះលើកទឹកចិត្ត រក្សាទង្វើល្អ និងមានសីលធម៌រស់នៅល្អជាដើម នោះគឺមូលដ្ឋានដ៏រឹងមាំដែលអាចឱ្យពួកគេយល់ដឹងពីរបៀបបង្កើតជីវិតប្រកបដោយសុភមង្គលជាមិនខាន។
៤. ទំនាក់ទំនង
ច្បាស់ណាស់ថានៅក្នុងគ្រួសារជៀសមិនផុតពីការទំនាក់ទំនងគ្នានោះទេ។ ប៉ុន្តែត្រូវមើលដែរថាតើទំនាក់ទំនងមួយនោះជាការប្រាស្រ័យទាក់ទងរបៀបណា។ ប្រសិនបើទំនាក់ទំនងនោះជិតស្និទ្ធ មានសីលធម៌ មានភាពវិជ្ជមានច្រើន នោះវាគឺគំរូដ៏ល្អមួយសម្រាប់ក្មេងៗជំនាន់ក្រោយអនុវត្តនាពេលអនាគត។ ប៉ុន្តែប្រសិនបើទំនាក់ទំនងមួយនោះមានតែភាពរកាំរកូសមិនចេះចប់ នោះច្បាស់ណាស់ថាទោះមានទ្រព្យសម្បត្តិមហាសាលច្រើនប៉ុណ្ណា ក៏មិនអាចទិញពាក្យថាភាពកក់ក្ដៅបានដែរ៕