មនុស្សភាគច្រើនបានផ្ដោតខ្លាំងទៅលើការលាងសម្អាតមុខក្នុងរដូវក្ដៅដើម្បីជៀសវាងការឡើងមុន និងជាំជាដើម។ ប៉ុន្តែកុំភ្លេចថាដំណក់ទឹកភ្លៀងដែលធ្លាក់ចុះមកប៉ះនឹងស្បែកមុខរបស់យើងមិនមានអនាម័យនោះទេ ហើយវាក៏មានហានិភ័យខ្ពស់ក្នុងការឆ្លងមេរោគ ឬបាក់តេរីចូលស្រទាប់ស្បែកបានយ៉ាងងាយ។ ដូច្នេះថ្ងៃនេះ A M S សូមចែករំលែកនូវ ៦ តិចនិកលាងមុខឱ្យស្អាតក្នុងរដូវភ្លៀង៖
១. ស្ទីមមុខ៖ ការស្ទីមមុខជាមួយចំហាយទឹកគឺជាមធ្យោបាយដ៏ពេញនិយមដើម្បីរក្សាជាតិសំណើម និងធ្វើឱ្យមុខភ្លឺថ្លាក្នុងរដូវភ្លៀង។ ប្រសិនបើយើងស្ទីមមុខឱ្យបានទៀងទាត់យ៉ាងហោចណាស់ ៥ នាទីក៏អាចជួយកម្ចាត់សារធាតុកខ្វក់ចេញ និងបង្រួមរន្ធញើសផងដែរ។
២. ប្រើ toner៖ សម្រាប់ toner វិញក៏មានប្រសិទ្ធភាពខ្ពស់ក្នុងការសម្អាតស្បែកក្នុងរដូវវស្សាមិនចាញ់រដូវក្ដៅឡើយ។ ជាទូទៅ យើងក៏អាចប្រើនូវទឹកប៉េងប៉ោះស្រស់ ទឹកក្រូចឆ្មារ ឬទឹកក្រូចជា toner ធម្មជាតិដើម្បីសម្អាតស្បែកបានដែរ។
៣. បិតម៉ាស៖ មិនថាយើងមានស្បែកមុខប្រភេទណានោះទេ ក៏ការប្រើប្រាស់នៅតែជាជម្រើសមួយដ៏ល្អបំផុត។ មិនត្រឹមតែអាចជួយបឺតយកជាតិកខ្វក់បានជ្រៅក្រោយត្រូវទឹកភ្លៀងនោះទេ វាថែមទាំងជួយរក្សាសំណើម និងពង្រឹងរបាំងការពារស្បែកទៀតផង។ លើសពីនេះ ការប្រើប្រាស់ជាមួយម៉ាសធម្មជាតិរឹតតែជាជម្រើសល្អបន្ថែមទៀត។
៤. ស្រ្កាប់ស្បែក៖ វាជារឿងចាំបាច់ក្នុងការជម្រុះកោសិកាចាស់ៗចោលដែលជួយកាត់បន្ថយភាពខ្មៅស្រអាប់ ក្រៀមស្ងួត និងបំប៉នស្បែកឱ្យកាន់ភ្លឺថ្លាផងដែរ។ ប្រសិនបើអាចប្រើប្រាស់ជាមួយគ្រឿងផ្សំបែបធម្មជាតិ នោះប្រសិទ្ធភាព និងអត្ថប្រយោជន៍មានកាន់ច្រើន។
៥. ប្រើទឺកដោះគោត្រជាក់៖ ជាធម្មតាយើងតែងតែប្រើប្រាស់នូវហ្វូមលាងមុខដែលជាមួយប្រភេទស្បែកដើម្បីជម្រះជាតិកខ្វក់។ ក្នុងករណីដែលយើងមិនចង់ប្រើប្រាស់នូវសាប៊ូលាងសម្អាតមុខ យើងអាចជំនួសយកសំឡីទៅជ្រលក់ជាមួយទឹកដោះគោត្រជាក់ហើយបិតទុកលើមុខប្រហែល ១៥ នាទីរួចលាងទឹកចេញ។
៦. លាងមុខជាមួយទឹកត្រជាក់៖ ជាទូទៅស្បែករបស់យើងអាចនឹងប្រឈមនឹងការឡើងខ្លាញ់ ឬស្ងួតខ្លាំងអំឡុងរដូវវស្សា។ ដូច្នេះយើងគួរតែប្រើទឹកត្រជាក់ដើម្បីលាងសម្អាតជាតិកខ្វក់ ហើយវាថែមទាំងជួយឱ្យឈាមរត់បានស្រួល ស្បែកភ្លឺថ្លា និងសុខភាពល្អផងដែរ៕