នៅពេលដែលគិតដល់ជំងឺ និងមេរោគផ្សេងៗ មនុស្សទូទៅតែងតែគិតដល់ចំណីអាហារដែលមានផ្ទុកសារធាតុគីមី ឬមិនបានចម្អិនឱ្យបានត្រឹមត្រូវ។ យ៉ាងណាមិញ ឧបករណ៍ដែលអ្នកប្រើប្រាស់ដើម្បីចម្អិន ទទួលទាន និងសម្អាត ក៏អាចជាផ្លូវមួយនៃការនាំយកមេរោគ និងជំងឺចូលរាងកាយផងដែរ។
ខាងក្រោមនេះ គឺជាសម្ភារផ្ទះបាយចំនួន ៣ ដែលមនុស្សតែងត្រូវការប្រើប្រាស់ជាប្រចំាថ្ងៃ តែមិនដែលចាប់អារម្មណ៍ពីផលប៉ះពាល់ចំពោះសុខភាពដែលអាចកើតមានពីសម្ភារទាំងនោះទេ៖
១. ខ្ទះ Teflon

ខ្ទះ Teflon គឺជាប្រភេទខ្ទះឆាដែលពេញនិយមមួយសម្រាប់មេផ្ទះទូទៅ ព្រោះខ្ទះនេះមានស្រោបនូវសារធាតុការពារមិនឱ្យអាហារជាប់នឹងខ្ទះ ងាយស្រួលសម្រាប់ការចម្អិនអាហារ និងជាពិសេសមិនងាយនឹងធ្វើឱ្យអាហារខ្លោចដូចជាខ្ទះដទៃ។
ដ្បិតសារធាតុស្រោបលើខ្ទះដែលមានឈ្មោះថា Polytetrafluoroethylene (PTFE) ឬទូទៅស្គាល់ថាជា Teflon នេះ ធន់នឹងកម្ដៅ និងមានសុវត្ថិភាពសម្រាប់ប្រើប្រាស់ក្នុងការចម្អិនអាហារក៏ពិតមែន តែបើសិនជាខ្ទះនោះមានការកកិត ឬឆ្កូតដែលធ្វើឱ្យសារធាតុគីមីមួយប្រភេទនេះដាច់រហែកចូលទៅក្នុងអាហារ វាក៏អាចបង្កគ្រោះថ្នាក់ដល់សុខភាពផងដែរ។
យោងតាមសារព័ត៌មាន Jimu ពីប្រទេសចិន ការទទួលទានអាហារដែលមានសារធាតុគីមីននេះឡាយឡំ អាចបណ្ដាលឱ្យកើតមានការរលាក ផលប៉ះពាល់ទៅលើថ្លើម សួត ប្រព័ន្ធរំលាយអាហារ និងអរម៉ូនក្នុងរាងកាយជាដើម។ ដូច្នេះ អ្នកគួរជៀសវាងប្រើប្រាស់ខ្ទះ Teflon ដែលមានស្នាមកកិត និងដាច់រហែក ស្របពេលដែលអ្នកអាចថែរក្សាខ្ទះប្រភេទនេះ ដោយការប្រើប្រាស់វែកឆាដែលធ្វើពីឈើ ឬស៊ីលីកូន និងលាងសម្អាតដោយអេប៉ុងលាងចានទន់ៗ ជំនួសៗដោយអាចម៍ដែក។
២. ចង្កឹះឈើ

ចង្កឹះឈើ គឺជាចង្កឹះមួយប្រភទដែលមនុស្សទូទៅចូលចិត្តប្រើប្រាស់ ព្រោះតែអត្ថប្រយោជន៍ដែលងាយស្រួលចាប់ម្ហូបអាហារជាងចង្កឹះដែក និងធន់កម្ដៅជាងចង្កឹះជ័រ។ យ៉ាងណាមិញ នៅពេលដែលប្រើប្រាស់ក្នុងរយៈពេលយូរ សាច់ឈើអាចនឹងប្រេះបែក និងមានកម្ទេចកម្ទីអាហារតោងជាប់ ក្លាយជាទីកន្លែងដែលប្រមូលផ្ដុំទៅដោយមេរោគ ផ្សិត ក៏ដូចជាសារធាតុពុល Aflatoxin ដែលអង្គការសុខភាពពិភពលោក ចាត់ទុកជាសារធាតុបង្កជំងឺមហារីក បើសិនជាបន្តទទួលទានក្នុងរយៈពេលយូរ។
អ្នកជំនាញផ្នែកសុវត្ថិភាពចំណីអាហាររបស់ចិនបានណែនាំថា ចង្កឹះឈើត្រូវលាងសម្អាត និងដាក់សម្ងួតឱ្យបានស្ងួតល្អ ដើម្បីកាត់បន្ថយហានិភ័យនៃការកើតមេរោគផ្សិត និងធ្វើការផ្លាស់ប្ដូរចង្កឹះថ្មី នៅរៀងរាល់ ៦ ខែម្ដង។
៣. អេប៉ុងលាងចាន

អេប៉ុងលាងចាន គឺជាវត្ថុដែលយើងប្រើប្រាស់ដើម្បីកម្ចាត់ភាពកខ្វក់ និងតែងតែមានសំណើមជាប់ជាប្រចាំ។ កត្តានេះហើយ គឺជាកត្ដាអំណោយផលសម្រាប់មេរោគនានា ក្នុងការស្នាក់អាស្រ័យនៅលើអេប៉ុងលាងចាន។
ការស្រាវជ្រាវពីសាកលវិទ្យាល័យ Giessen និងវិទ្យាស្ថាន Helmholz ក្នុងទីក្រុង Munich ប្រទេសអាឡឺម៉ង់ បានរកឃើញថា អេប៉ុងលាងចាន មានផ្ទុកបាក់តេរីបង្កជំងឺដល់ទៅ ៣៦២ប្រភេទ ដោយក្នុងមួយសង់ទីម៉ែត្រការ៉េអាចផ្ទុកបាក់តេរីដល់ទៅ ៥៤ ពាន់លានបាក់តេរី ច្រើនជាងបាក់តេរីដែលមានក្នុងចានបង្គន់ចំនួន ២សែនដង។
មេរោគដែលអាចរកឃើញនៅក្នុងអេប៉ុងលាងចានជាទូទៅ រួមមាន E. coli, Salmonella និងបាក់តេរីបង្កគ្រោះថ្នាក់ជាច្រើនផ្សេងទៀត ដែលអាចបណ្តាលឱ្យមានការឆ្លងមេរោគ និងបញ្ហាក្រពះពោះវៀន។
លើសពីនេះ ការសិក្សាពីឆ្នាំ ២០១៧ ដែលចេញផ្សាយនៅក្នុងទស្សនាវដ្តី Nature បានរកឃើញថា អេប៉ុងលាងចានដែលប្រើឡើងវិញជាញឹកញាប់ មានផ្ទុកបាក់តេរី Moraxella Osloensis ដែលបង្កគ្រោះថ្នាក់ដល់អ្នកដែលមានប្រព័ន្ធការពាររាងកាយចុះខ្សោយ ហើយអាចបង្កើនហានិភ័យនៃការឆ្លងមេរោគ។
វេជ្ជបណ្ឌិត Chu Tuxiao ពីនាយកដ្ឋានជំងឺឆ្លងនៃមន្ទីរពេទ្យ Xihua នៃសាកលវិទ្យាល័យ Sichuan ប្រទេសចិន បានណែនាំថា ដើម្បីសុវត្ថិភាព អ្នកគួរលាងសម្អាតអេប៉ុងលាងចានជាមួយនឹងសាប៊ូជារៀងរាល់ថ្ងៃ ពូតឱ្យស្ងួត ហើយទុកក្នុងកន្លែងដែលមានខ្យល់ចេញចូល និងពន្លឺល្អ។ បន្ថែមពីនេះ អ្នកគួរផ្លាស់ប្ដូរអេប៉ុងលាងចាន យ៉ាងណាស់ ១ដងក្នុងមួយខែ៕


























Account
Security
Favourite Content