ព័ត៌មានកម្សាន្តប្លែកៗ
រសនិយម
តន្រ្តី
ភាពយន្ត
មាតិកាឌីជីថល
បើកសោជីវិត
ចង់ដឹងរឿងគេ
វនយាត្រា
Cicada Agent
ព្រះនាងកង្កែប
ពេលនិយាយដល់សួនផ្កា មនុស្សភាគច្រើននឹងនឹកស្រមៃពេលវេលាមួយដ៏ស្រស់ស្រាយ ស្ងប់ស្ងាត់ និងរ៉ូមែនទិកជាមិនខាន។ ជាពិសេសកន្លែងទាំងនោះច្រើនមាននៅក្នុងរឿងនិទានដែលជាកន្លែងតួឯកប្រុសស្រីបង្កើតអនុស្សាវរីយ៍ផ្អែមល្ហែមជាមួយគ្នាផងដែរ។ ដូច្នេះហើយប្រិយមិត្តមានដឹងអត់ថាការពិតនៅលើពិភពលោកយើងនេះក៏មានកន្លែងទាំង ៥ នេះដែលមានសម្រស់ស្អាតមិនខុសពីក្នុងរឿងនិទាននោះទេ។
១. ឧទ្យាន Versailles ប្រទេសបារាំង
ផ្អែកលើឯកសារយោងទូទាំងពិភពលោកចាប់តាំងពីសតវត្សរ៍ទី ១៧ សួនច្បារមួយនេះត្រូវបានរចនាឡើងដោយ André Le Nôtre អមជាមួយប្រឡាយទឹកជាច្រើន និងគ្រប់គ្រងដោយស្ដេច Louis XIV។ ស្នាដៃសិល្បៈមួយនេះគឺជាឋានសួគ៌តំណាងឱ្យមហិច្ឆតារបស់ Louis XIV កាលទ្រង់នៅស្ដេចវ័យក្មេង។ ព្រះអង្គត្រូវបានគេល្បីល្បាញថាជាបុរសដែលឈ្លក់វង្វេងនឹងភាពអស្ចារ្យ។ សួនច្បារ Versailles ត្រូវបានសាងសង់ឡើងនៅដីទំហំជិត ២០០០ ហិចតាមានទម្រង់ជាឈើឆ្កាងដោយបង្កប់លក្ខណៈពិសេសជាមួយរូបចម្លាក់ទេវកថាមិនតិចជាង ៤០០ រូបដែលធ្វើឱ្យសួន Versailles សារមន្ទីរបើកចំហររូបចម្លាក់ធំបំផុតនៅលើពិភពលោក។ លើសពីនេះសួនច្បារមួយនេះក៏មានបេតិកភណ្ឌពិភពលោករបស់អង្គការយូណេស្កូ និងដើមឈើប្រមាណជាង ២០ ម៉ឺនដើមផងដែរ។ យោងតាម Palace of Versailles បានបង្ហាញ ជារៀងរាល់ឆ្នាំសួនច្បារដ៏ស្រស់ស្អាតមួយនេះស្វាគមន៍ភ្ញៀវទេសចរដល់ទៅជិត ១០ លាននាក់ឯណោះ។ អ្វីដែលគួរឱ្យចាប់អារម្មណ៍ទៅទៀតនោះ ឧទ្យាន Versailles នឹងអនុញ្ញាតឱ្យអ្នកទស្សនាដោយថ្មើរជើង និងជិះកង់ចូលលេងដោយឥតគិតថ្លៃចាប់ពីខែវិច្ឆិកាដល់ខែមីនាផងដែរ។
២. ឧទ្យាន Keukenhof ប្រទេសហូឡង់
សួនច្បារ Keukenhof ត្រូវបានគេហៅមួយទៀតថាជា «សួននិទាឃរដូវដ៏ស្រស់ស្អាតបំផុតក្នុងពិភពលោក» ហើយនេះគឺជាការពិតដែលមិនអាចប្រកែកបាន។ នៅក្នុងសួនផ្កាសម្បូរទៅដោយផ្កា crocuses, daffodils, hyacinths ជាពិសេសគឺផ្កា tulips តែម្ដង។ ដូច្នេះហើយជារៀងរាល់ខែមីនា ភ្ញៀវទេសចរដែលបានទៅលេងកម្សាន្ដនៅទីនោះបានឃើញនូវសម្រស់ដើមផ្កាជាង ៧ លានដើមរីកលូតលាស់ឡើងបង្អួតភាពស្រស់ស្អាតនៅលើផ្ទៃដី ៨០ ហិចតា។ សួនផ្កាដ៏ស្រស់ស្អាតមួយនេះត្រូវបានផ្ដួចផ្ដើមគំនិតធ្វើឡើងនៅឆ្នាំ ១៩៤៩ ដោយក្រុមអ្នកដាំផ្កាចំនួន ២០ នាក់នាំគ្នាបង្កើតផែនការប្រើប្រាស់នូវអចលនវត្ថុណាមួយដើម្បីដាក់តាំងបង្ហាញនូវពូជផ្កានិទាឃរដូវ ដែលនេះហើយគឺជាកំណើតនៃសួនច្បារ Keukenhof ។ ក្រោយមកនៅឆ្នាំ ១៩៥០ ឧទ្យានមួយនេះក៏ចាប់ផ្ដើមទទួលបានភាពជោគជ័យភ្លាមៗដោយទទួលបានអ្នកចូលទៅទស្សនាចំនួន ២៣៦ ០០០ នាក់ក្នុងឆ្នាំដំបូង។ រហូតដល់បច្ចុប្បន្នឧទ្យាន Keukenhof បានស្វាគមន៍អ្នកទស្សនាច្រើនជាងមួយលាននាក់ជារៀងរាល់ឆ្នាំដោយសំបុត្រចូលទស្សនាមានតម្លៃ ២០ អឺរ៉ូប្រហែលជាង ២១ ដុល្លារអាមេរិក។
៣.ឧទ្យាន Butchart ប្រទេសកាណាដា
ឧទ្យាន Butchart ត្រូវបានគេកំណត់ជាតំបន់ប្រវត្តិសាស្រ្តជាតិនៃប្រទេសកាណាដានៅក្នុងឆ្នាំ ២០០៤ ដោយសព្វថ្ងៃនេះឧទ្យានមួយនេះនៅតែជាកម្មសិទ្ធិរបស់គ្រួសារលោកស្រី Butchart ដដែល។ បកត្រឡប់ទៅឆ្នាំ ១៩០៤ លោកស្រី Jennie Butchart ជាភរិយាក្រោយរបស់មហាសេដ្ឋី Robert បានចាប់ផ្ដើមគំនិតជាមួយចក្ខុវិស័យ និងចំណង់ចំណូលចិត្តដោយប្រែក្លាយពីថ្មកំបោរនៅខាងក្រោយផ្ទះទៅបង្កើតសួនច្បារមានរូបរាងប្លែកៗជាច្រើនទៅតាមរចនាបថនៃសម័យកាលនីមួយៗ ដើម្បីជំរុញឱ្យមានសោភ័ណភាពប្លែកភ្នែកប្រកបដោយគំនិតសិល្បៈសម្រាប់អ្នកទស្សនា និងមនុស្សជំនាន់ក្រោយផងដែរ។ នៅក្នុងឧទ្យាន Butchart សម្បូរទៅដោយប្រភេទផ្កានិទាឃរដូវដូចជាផ្ការ៉ូដឌឺដុន ផ្កាធូលីប ផ្កា Daffodil ផ្កា Ornamental Cherry ផ្កាម៉ាណូលីយ៉ា និងផ្កាផូនី។ ជាធម្មតាពេលវេលាល្អបំផុតក្នុងការទៅទស្សនាសួនផ្កានិទាឃរដូវមួយនេះគឺនៅចន្លោះដើមខែមេសាដល់សប្ដាហ៍ដំបូងនៃខែឧសភា។ ជារៀងរាល់ឆ្នាំឧទ្យាន Butchart ស្វាគមន៍ភ្ញៀវទេសចរប្រមាណជិតមួយលាននាក់ដោយតម្លៃសំបុត្រគឺខុសៗគ្នាទៅតាមអាយុនៃអ្នកទស្សនា។
៤. ឧទ្យាន Taj Mahal ប្រទេសឥណ្ឌា
ឧទ្យាន Taj Mahal ត្រូវបានចាប់ផ្ដើមសាងសង់ឡើងនៅឆ្នាំ ១៦៣២ នៃគ.សដោយស្ដេច Mughal Emperor Shah Jahan ដើម្បីរំលឹកទៅភរិយារបស់ទ្រង់ Mumtaz Mahal ដែលបានលាចាកលោកដោយសារការសម្រាលបុត្រនៅក្នុងឆ្នាំ ១៦៣១។ ការសាងសង់ឧទ្យាននេះឡើងបានធ្វើឱ្យទ្រង់ទាំង ២ ក្លាយជាគូស្នេហ៍អធិរាជដែលមិនអាចបំបែកបានចាប់តាំងពីការរៀបអាពាហ៍ពិពាហ៍នៅឆ្នាំ ១៦១២។ ឧទ្យាននេះផងដែរបានបញ្ចប់ការសាងសង់ជាស្ថាពរនៅឆ្នាំ ១៦៥៣ នៃគ.សដោយចំណាយពេលអស់ ២៣ ឆ្នាំនៅលើផ្ទៃដី ៣០០ ម៉ែត្រការ៉េជាមួយនឹងវិហារឥស្លាម ផ្ទះស្នាក់ ខ្លោងទ្វារសំខាន់ និងទីធ្លាខាងក្រៅជាដើម។ នៅក្នុងឧទ្យាន Taj Mahal សម្បូរដោយរុក្ខជាតិប្រភេទ geophytes រួមមាន tulip, narcissus និង iris។ ជាងនេះទៅទៀតស្ថាបត្យកម្ម សួនច្បារ និងការតុបតែងត្រូវបានចាត់ទុកជាកំពូលសិល្បៈ Indo-Mughal (ឥណ្ឌូ-មុងហាល) ផងដែរ។ ពេលវេលាល្អបំផុតដើម្បីទៅទស្សនាឧទ្យាន Taj Mahal គឺចាប់ពីខែវិច្ឆិកាដល់ខែកុម្ភៈ នៅពេលដែលអាកាសធាតុក្នុងប្រទេសឥណ្ឌាមានកម្រិតសមល្មម មិនក្ដៅពេក មិនត្រជាក់ពេក និងមិនភ្លៀងពេក។ ចំពោះតម្លៃសំបុត្រគឺ ៥០ រ៉ូពីប្រហែល ០.៦០ ដុល្លារអាមេរិកសម្រាប់ពលរដ្ឋឥណ្ឌា និង ១១០០ រ៉ូពីប្រហែល ១៣ ដុល្លារអាមេរិកសម្រាប់ភ្ញៀវអន្តរជាតិ។ ប្រសិនបើចង់ចូលទស្សនាក្នុងព្រះវិហារ នោះតម្រូវឱ្យ ២០០ រ៉ូពីប្រមាណជាង ២ ដុល្លារបន្ថែមទៀត។
៥. ឧទ្យាន Kirstenbosch ប្រទេសអាហ្វិកខាងត្បូង
បើទោះបីជាស្ថិតនៅក្នុងប្រទេសអាហ្វ្រិកខាងត្បូងពិតមែន ប៉ុន្តែសម្រស់នៃការរៀបចំរបស់សួនរុក្ខសាស្រ្ត Kirstenbosch ដែលស្ថិតនៅជើងភ្នំ Table Mountain គឺកម្រនឹងមានឧទ្យានណាមួយយកឈ្នះបានមែនទែន។ សួនរុក្ខសាស្រ្តមួយនេះបានក្លាយជាកន្លែងទាក់ទាញដ៏សំខាន់សម្រាប់អ្នកទេសចរដែលអាចរុករករុក្ខជាតិរបស់ជនជាតិដើមភាគតិច និងរុក្ខជាតិបរទេសមួយចំនួនផ្សេងទៀតនៅក្នុងកន្លែងអភិរក្សដ៏ធំមួយនេះ។ ទន្ទឹមនឹងនេះឧទ្យាន Kirstenbosch បានក្លាយជាសួនរុក្ខសាស្រ្តដ៏ធំបំផុតក្នុងពិភពលោកមួយដែលមានទំហំ ៥២៨ ហិចតាជិតទីក្រុង Cape Town ខេត្ត Western Cape ប្រទេសអាហ្វ្រិកខាងត្បូង។ ងាកទៅឆ្នាំ ១៩០៣ លោក Henry Harold Welch Pearson ជាអ្នករុក្ខសាស្ត្រមកពីសាកលវិទ្យាល័យ Cambridge បានធ្វើដំណើរមក Cape Colony ដើម្បីទទួលមុខតំណែងជាសាស្រ្តាចារ្យប្រធានផ្នែករុក្ខសាស្ត្រដែលទើបបង្កើតថ្មីនៅមហាវិទ្យាល័យ South African College បានផ្ដើមគំនិតបង្កើតសួននេះឡើង។ នៅពេលដែលឧទ្យាន Kirstenbosch ត្រូវបានបង្កើតឡើងជាផ្លូវការក្នុងឆ្នាំ ១៩១៣ បានធ្វើឱ្យតំបន់នេះក្លាយជាកន្លែងការពាររុក្ខជាតិដែលមានដើមកំណើតលើទឹកដីអាហ្វ្រិកខាងត្បូង។ ពេលវេលាដ៏ល្អបំផុតដើម្បីទស្សនាគឺនៅចុងបញ្ចប់នៃរដូវរងាដល់ដើមរដូវក្តៅ (ខែសីហា – វិច្ឆិកា) ដោយសាររដូវនោះគឺសម្បូរទៅដោយផ្កាស្រស់ស្អាតទាក់ទាញ និងរុក្ខជាតិគួរឱ្យចាប់អារម្មណ៍ជាច្រើន។ ចំពោះតម្លៃសំបុត្រវិញគឺសម្រាប់ពលរដ្ឋពេញវ័យក្នុងស្រុកគឺប្រហែល ៦ ដុល្លារអាមេរិក និងកូនក្មេងជាង ២ ដុល្លារអាមេរិក។ ចំណែកឯជនបរទេសវិញ មនុស្សពេញវ័យប្រហែល ១២ ដុល្លារ និងកូនក្មេងជាង ២ ដុល្លារដូចគ្នាដែរ។
គួរបញ្ជាក់ផងដែរ ក្រៅពីឧទ្យានទាំង ៥ ខាងលើនេះហើយក៏នៅមានឧទ្យានស្អាតៗជាច្រើនដូចជា៖
- ឧទ្យាន Gardens by the Bay នៅប្រទេសសាំងហ្គាពួរ
- ឧទ្យាន Shinjuku Gyoen ទីក្រុងតូក្យូ ប្រទេសជប៉ុន
- ឧទ្យាន Boboli Gardens ប្រទេសអ៊ីតាលីជាដើម៕
Account
Security
Favourite Content