បង្គា គឺជាអាហារសមុទ្រដែលទទួលបានប្រជាប្រិយភាព ខណៈវាមានរសជាតិឆ្ងាញ់ និងសម្បូរទៅដោយប្រូតេអ៊ីនដែលរាងកាយមនុស្សត្រូវការ។ យ៉ាងណាមិញ បុគ្គលមួយចំនួននៅសង្ស័យថា សរសៃខ្មៅនៅខាងខ្នងបង្គានោះគឺជាអ្វី? ហើយវាមានសុវត្ថិភាពក្នុងការបរិភោគ ឬក៏យ៉ាងណា?
លោកស្រី Tori Stivers អ្នកឯកទេសផ្នែកអាហារសមុទ្រនៅសាកលវិទ្យាល័យ Georgia Marine Extension and Georgia Sea Grant បានប្រាប់គេហទំព័រ SELF ថា ផ្នែកខ្មៅៗដែលនៅលើខ្នងបង្គានោះ គឺជាប្រព័ន្ធរំលាយអាហារ រួមមាន ក្រពះ និងពោះវៀនជាដើម។
ដោយហេតុថា បង្គាគឺជាសត្វដែលស្វែងរកចំណីនៅឯបាតសមុទ្រ ដូច្នេះ វាអាចស៊ីប្លង់តុង សារាយ សត្វល្អិត បំណែកសត្វ រុក្ខជាតិរលួយ ប៉ារ៉ាស៊ីត និងសូម្បីតែខ្សាច់ចូលទៅក្នុងរាងកាយ។ ដូច្នេះ ក្រពះពោះវៀនរបស់បង្គាគឺជាកន្លែងរក្សាទុកនូវពពួកកាកសំណល់ទាំងនោះ។

លោក Dave Love អ្នកវិទ្យាសាស្រ្តជាន់ខ្ពស់ពីមជ្ឈមណ្ឌល Johns Hopkins Center for a Livable Future បានប្រាប់ថា ដ្បិតសរសៃខ្មៅនោះ គឺជាប្រព័ន្ធរំលាយអាហារ ឬន័យមួយទៀត គឺជាកន្លែងរក្សាទុកលាមករបស់បង្គាក៏ពិតមែន តែបើសិនជាបង្គាបានឆ្លងកាត់ការចម្អិនត្រឹមត្រូវ ពោលគឺចម្អិនលើកម្ដៅ ៦៣ អង្សាសេឡើងទៅ វាមិនអាចបង្កគ្រោះថ្នាក់ដល់សុខភាពបានទេ។
យ៉ាងណាមិញ លោកបន្ថែមថា បើសិនជាអ្នកចង់ទទួលទានបង្គាឆៅ មិនឆ្លងការចម្អិន អ្នកត្រូវដកក្រពះ និងពោះវៀនរបស់បង្គាចេញជាដាច់ខាត ព្រោះវាអាចធ្វើឱ្យអ្នកពុលបង្គាបាន ព្រោះសរសៃខ្មៅៗនោះ មានផ្ទុកប្រភេទបាក់តេរីដូចជា E. coli ជាដើម។

ប្រភពដដែលបានបញ្ជាក់ថា ក្រោមហេតុផលសុវត្ថិភាពចំណីអាហារ អ្នកអាចបរិភោគបង្គាឆ្អិនទាំងសរសៃខ្មៅបាន ដោយមិនមានគ្រោះថ្នាក់អ្វីទេ។ យ៉ាងណាមិញ បើសិនជាអ្នកមិនស្រណុកចិត្ត ពោលគឺមិនចង់ទទួលទានលាមករបស់បង្គា អ្នកអាចដកសរសៃខ្មៅនោះចេញបាន។
គួរឱ្យដឹងផងដែរថា បង្គាគឺជាអាហារដែលប្រជុំទៅដោយជីវជាតិ ព្រោះនៅក្នុងបង្គាទម្ងន់ ៨៥ក្រាម មានផ្ទុកនូវជាតិប្រូតេអ៊ីនសរុបរហូតដល់ ២០ក្រាម៕


























Account
Security
Favourite Content