ព័ត៌មានកម្សាន្តប្លែកៗ
រសនិយម
តន្រ្តី
ភាពយន្ត
មាតិកាឌីជីថល
បើកសោជីវិត
ចង់ដឹងរឿងគេ
វនយាត្រា
Cicada Agent
ព្រះនាងកង្កែប
យ៉ាងម៉េចហើយ passport មើលៗផង អ្នកអើយ! នឹកអារម្មណ៍រៀបខោអាវដាក់ក្នុងវ៉ាលី ហើយស្អែកដើរលេងអត់? ធំៗ អស់ហើយ នៅចាំគេជូនដល់កាល់ទៀត ដាក់ម៉ាទ្រីបម្នាក់ឯងទៅ ជាពិសេសស្រីៗហ្នឹងហ្មង ។
និន្នាការនៃដើរលេងម្នាក់ឯងមានការកើនឡើងខ្លាំងនាប៉ុន្មានឆ្នាំចុងក្រោយនេះ ខណៈដែលមនុស្សមួយចំនួនចង់សាកល្បងអ្វីដែលថ្មី បែរជាមិនហ៊ានទៅ ព្រោះពួកគេខ្លាចបញ្ហាប្រឈមនៅពេលដែលពួកគេធ្វើដំណើរទៅក្រៅប្រទេសតែម្នាក់ឯង។
ឈប់បារម្ភទៀតទៅ មកស្គាល់ប្រទេសចំនួន ៥ ដែលឈរនៅលំដាប់កំពូលបើនិយាយអំពីសុវត្ថិភាពលេខ១ដល់អ្នកទេសចរ។
ប្រទេសឈរនៅលំដាប់ទី១ គឺ ប្រទេសស្លូវេនី ៖ ប្រទេសដែលសំបូរទៅដោយភ្នំ តំបន់ស្គីទឹកកក និងបឹងធម្មជាតិមួយនេះបានក្លាយជាទីចាប់អារម្មណ៍នៃនារីដែលចូលចិត្តដើរលេងម្នាក់ៗឯង ខណៈដែលតាមរយៈសន្ទស្សន៍អ្នកទេសចរថ្មីៗនេះបង្ហាញថា មានស្ត្រីជាង ៨៥ ភាគរយបង្ហាញអារម្មណ៍ថាពួកគេមានអារម្មណ៍សុវត្ដិភាព ពេលបានមកដល់ទីនេះ។
អ្នកទេសចរក្រៅស្រុកម្នាក់បានបង្ហាញអារម្មណ៍យ៉ាងដូច្នេះថា៖ “ខ្ញុំមិនមានអារម្មណ៍ថាខ្លាច ឬ ពិបាករកផ្លូវនោះទេ មួយវិញទៀតនោះគឺការប្រើប្រាស់ភាសាក្នុងប្រទេសមួយនេះក៏ងាយស្រួលក្នុងការទំនាក់ទំនងផងដែរ។ មិនតែប៉ុណ្ណោះ បើនិយាយពីផ្លូវវិញ ក៏ស្រួលក្នុងការធ្វើដំណើរ ព្រោះមានផ្លូវសម្រាប់ថ្មើរជើងច្រើន ហើយពលរដ្ឋភាគច្រើនប្រើប្រាស់មធ្យោបាយធ្វើដំណើរតាមឡានក្រុង ដែលបញ្ចៀសដល់ការកកស្ទះចរាចរណ៍ផងដែរ។”
ប្រទេសឈរនៅលំដាប់ទី២ គឺ ប្រទេសរវ៉ាន់ដា (Rwanda) ៖ ប្រទេសដែលមានសមាជិកសភាជាស្រ្តីរហូតដល់ទៅ ៥៥ ភាគរយមួយនេះ ត្រូវបានគេចាត់ចំណាត់ថ្នាក់ខ្ពស់ជាប្រទេសដែលមានសុវត្ថិភាព និងត្រូវបានអ្នកទេសចរលើកសរសើរពីសុវត្ថិភាពខាងក្នុងប្រទេសដោយមានការយាមល្បាតយ៉ាងតឹងរឹង និងការការពារស្ទើរគ្រប់ទីកន្លែងនៅក្នុងក្រុង ទាំងថ្ងៃ និងយប់ដោយក្រុមមន្ត្រីប៉ូលីស។ អ្នកអាចនឹងមានអារម្មណ៍ភ័យខ្លាចពេលដែលបានឃើញបែបនេះដំបូងៗ រហូតដល់ស៊ាំភ្នែក ពេលបានដឹងគោលបំណងរបស់ពួកគេគឺការផ្តល់សុវត្ថិភាពដល់អ្នកទេសចរដែលមកលេងក្នុងប្រទេសតែប៉ុណ្ណោះ។
ពលរដ្ឋក្នុងប្រទេសនេះរួសរាយ និងមានចិត្តល្អណាស់។ ពួកគេតែងនិយាយ សួរស្តី ទៅកាន់អ្នក បើទោះជាពួកគេមិនស្គាល់អ្នកក៏ដោយ។ នៅរវ៉ាន់ដា បើអ្នកវង្វេងផ្លូវ អ្នកអាចនឹងពិបាក ប៉ុន្តែពលរដ្ឋរបស់គេក៏មិនទុកអ្នកចោលនោះដែរ ពួកគេអាចប្រើកាយវិការចង្អុរបង្ហាញពីទិសដៅដែលអ្នកចង់ទៅ ខណៈដែលពួកគេមិនអាចប្រើប្រាស់ភាសាអង់គ្លេសបាន។ គួរបញ្ជាក់ថា ភាសាផ្លូវការក្នុងប្រទេសរវ៉ាន់ដា គឺអង់គ្លេស និងបារាំង។
ប្រទេសឈរនៅលំដាប់ទី៣ គឺ អេមីរ៉ាតអារ៉ាប់រួម ៖ ឌូបៃ ត្រូវបានជាប់ចំណាត់ថ្នាក់ជាទីក្រុង និងតំបន់សុវត្ថិភាពសម្រាប់អ្នកទេសចរដែលចូលចិត្តដំណើរកម្សាន្តបែប Solo trip។
យោងតាមសន្ទស្សន៍អ្នករស់នៅក្នុងទីក្រុង និងតំបន់ក្បែរនោះ ប្រមាណជា ៩៨.៥ ភាគរយ ជាស្ត្រី និងក្មេងស្រីដែលមានអាយុចាប់ពី ១៥ឆ្នាំ បានឲ្យដឹងថា ពួកគេមានអារម្មណ៍សុវត្ថិភាពយ៉ាងខ្លាំងចំពោះប្រទេសមួយនេះ បើសូម្បីតែពួកគេដើរតែម្នាក់ឯងនៅពេលយប់ក៏ដោយ។
ប្រទេសឈរនៅលំដាប់ទី៤ គឺ ប្រទេសជប៉ុន ៖ ស្ថិតនៅជួរមុខនៃប្រទេសដែលមានសុវត្ថិភាពបំផុតនៅលើពិភពលោក ជប៉ុនត្រូវបានគេទទួលស្គាល់ថាជាប្រទេសដែលមានអត្រាឧក្រិដ្ឋកម្ម អំពើហឹង្សា ទាបជាងគេបំផុត និងជាប្រទេសដែលកម្រឃើញមានជំលោះផ្ទៃក្នុង ឬ ជាមួយប្រទេសជិតខាងណាស់។
ប្រទេសដែលមានសុជីវធម៌ខ្ពស់មួយនេះ ក៏បានបង្កលក្ខណៈងាយស្រួលដល់ប្រជាជនជប៉ុនរបស់ខ្លួនដែលជា ស្រ្តី ដោយបង្កើត រថភ្លើងក្រោមដីសម្រាប់មនុស្សស្រី ដោយមានម៉ោង និងទីតាំងជាក់លាក់ទៅតាមតំបន់ដែលបានកំណត់។ គួរបញ្ជាក់ថា ប្រភេទរថភ្លើងខាងលើ មិនត្រូវបានអនុញ្ញាតឲ្យមនុស្សប្រុសប្រើប្រាស់នោះទេ ខណៈដែលអ្នកធ្វើដំណើរត្រូវតែជាមនុស្សស្រី។ នេះជាការរួមចំណែកមួយដែលធ្វើមនុស្សស្រីកាន់តែមានអារម្មណ៍សុវត្ថិភាពនៅពេលដែលពួកគេធ្វើដំណើរតែម្នាក់ឯង។
ប្រទេសឈរនៅលំដាប់ទី៥ គឺប្រទេសន័រវេស ៖ ប្រទេសសមភាពយែនឌ័រដែលគ្មានការរើសរើងទៅលើអ្នកទេសចរ រួមទាំងអ្នកដែលស្រលាញ់ភេទដូចគ្នា នេះដែរក៏ត្រូវបានរាប់បញ្ចូលជាប្រទេសដែលមានសុវត្ថិភាពបំផុតក្នុងការធ្វើដំណើរកំសាន្តសម្រាប់មនុស្សស្រី។ គួរឲ្យដឹងដែរថា ន័រវេស ជាប្រទេសដែលរីករាយបំផុតលើពិភពលោក និងជាប្រទេសគ្មានការរើសអើងភេទនោះទេ៕
Account
Security
Favourite Content