កាលពីពេលថ្មីៗនេះ ឯកឧត្ដម សុខ សូកេន រដ្ឋមន្ត្រីក្រសួងទេសចរណ៍ បានទទួល ជួបពិភាក្សាការងារជាមួយលោកស្រី Olary Yim នាយិកាប្រតិបត្តិក្រុមហ៊ុន Catch International និងប្រតិភូ ដើម្បីពិភាក្សាការងារលើការជំរុញការរៀបចំព្រឹត្តិការណ៍នានានៅកម្ពុជា ពិសេសព្រឹត្តិការណ៍ចម្រៀងជាលក្ខណៈអន្តរជាតិ។
នាយិកាប្រតិបត្តិក្រុមហ៊ុន Catch International លោកស្រី Olary Yim បានជម្រាបជូនពីគម្រោងក្នុងការរៀបចំព្រឹត្តិការណ៍ចម្រៀង Dakini Sky Festival 2024 និងបានស្នើសុំការគាំទ្រពីក្រសួងទេសចរណ៍។
ជាការឆ្លើយតប ឯកឧត្ដមរដ្ឋមន្ត្រី បានសាទរ និងបានលើកឡើងពីសារៈសំខាន់នៃការរៀបចំព្រឹត្តិការណ៍ធំៗ ជាពិសេសព្រឹត្តិការណ៍ចម្រៀងខ្នាតអន្តរជាតិ ដែលនឹងជួយទាក់ទាញភ្ញៀវទេសចរមកកម្ពុជាបន្ថែមទៀត។ ឆ្លៀតឱកាសបានចូលពិភាក្សាការងារ Catch International បានបញ្ជាក់ពីភាពរីករាយ ដែលទទួលបានការយកចិត្តទុកដាក់ពី ឯកឧត្ដមរដ្ឋមន្ត្រី សុខ សូកេន ហើយក្រុមហ៊ុននឹងខិតខំពង្រឹង និងពង្រីកកិច្ចសហប្រតិបត្តិការជាមួយក្រសួងទេសចរណ៍បន្ថែមទៀត ហើយប្ដេជ្ញាចិត្តក្នុងការរៀបចំកម្មវិធីល្អៗពិសេសៗ ដែលផ្ដល់ផលវិជ្ជមានជាច្រើនដល់ទេសចរណ៍កម្ពុជា។
Catch International គឺជាក្រុមហ៊ុនរបស់អាមេរិកមានការិយាល័យកណ្ដាលនៅទីក្រុងញូវយ៉ក បង្កើតឡើងកាលពីឆ្នាំ ២០១៨។ Catch International ជាឧស្សាហកម្មបច្ចេកវិទ្យា ព័ត៌មាន និងសេវាកម្ម៕
រូបភាព៖ ក្រសួងទេសចរណ៍