ព័ត៌មានកម្សាន្តប្លែកៗ
រសនិយម
តន្រ្តី
ភាពយន្ត
មាតិកាឌីជីថល
បើកសោជីវិត
ចង់ដឹងរឿងគេ
វនយាត្រា
Cicada Agent
ព្រះនាងកង្កែប
ក្នុងកិច្ចខិតខំប្រឹងប្រែងដើម្បីជំរុញកីឡាជិះទូកក្ដោងនៅកម្ពុជា ក្រុមហ៊ុន Bay of Lights Entertainment និងសហព័ន្ធកីឡាទូកក្តោងកម្ពុជា (CSF) បានអញ្ជើញម្ចាស់ជើងឯកកីឡាជិះទូកក្ដោង Lemmy Teo មកពីប្រទេសសិង្ហបុរី សម្រាប់វគ្គបណ្តុះបណ្តាលរយៈពេល ២ថ្ងៃដែលធ្វើឡើងនៅការិយាល័យក្រុមហ៊ុន Bay of Lights ។
Bay of Lights Entertainment និងសហព័ន្ធកីឡាទូកក្តោងកម្ពុជារៀបចំវគ្គបណ្តុះបណ្តាលគ្រូបង្វឹកកីឡាទូកក្តោងថ្នាក់ជាតិជាមួយលោកបណ្ឌិត Lemmy Teo
លោកបណ្ឌិត Lemmy Teo ដែលជាម្ចាស់ជើងឯកកីឡាជិះទូកក្ដោង និងជាគ្រូឧទ្ទេសពោរពេញដោយបទពិសោធន៍ជាង ៣០ឆ្នាំ ត្រូវបានអញ្ជើញឱ្យដឹកនាំវគ្គបណ្តុះបណ្តាលនេះ ដើម្បីចែករំលែកនូវជំនាញដ៏សម្បូរបែបរបស់លោកដល់គ្រូបង្វឹកកម្ពុជា ព្រមជាមួយចំណេះដឹង និងបច្ចេកទេសបង្កើតកម្មវិធីបណ្ដុះបណ្ដាល និងអភិវឌ្ឍន៍ល្អបំផុតនៅក្នុងថ្នាក់។
កម្មវិធីវគ្គបណ្តុះបណ្តាលនេះដែរក៏មានគោលបំណងផ្តល់ចំណេះដឹង និងជំនាញដ៏មានតម្លៃដល់គ្រូបង្វឹកទូកក្តោងកម្ពុជា ដើម្បីត្រៀមដឹកនាំការហ្វឹកហាត់ ដល់ក្រុមកីឡាករ កីឡាការិនីឆ្ពោះទៅចូលរួមការប្រកួតកីឡាជាតិ និងអន្តរជាតិផ្សេងៗ ក៏ដូចជាជំរុញវត្តមានរបស់កម្ពុជានៅលើឆាកកីឡាទូកក្តោងពិភពលោក។
គំនិតផ្តួចផ្តើមកិច្ចសហការនេះទទួលបានជោគជ័យយ៉ាងត្រចះត្រចង់ ដោយមានសិក្ខាកាមចូលរួម ២៥ នាក់ ដែលបានសម្តែងការសាទរ និងការកោតសរសើរជាខ្លាំងចំពោះឱកាសបានរៀនសូត្រពីលោកបណ្ឌិត Lemmy Teo ។
អ្នកចូលរួមវគ្គបណ្តុះបណ្តាលគ្រូបង្វឹកទូកក្ដោងថ្នាក់ជាតិ នៅមជ្ឈមណ្ឌលពាណិជ្ជកម្ម Bay of Lights នៅខេត្តព្រះសីហនុ
សូមបញ្ជាក់ជាថ្មីថា លោកបណ្ឌិត Lemmy Teo គឺជាអ្នកជំនាញជិះទូកក្តោងមានបទពិសោធន៍ជាង ៣០ ឆ្នាំ និងជាជើងឯក Grandmasters Champion ដែលបានឈ្នះពានក្នុងកម្មវិធីប្រកួត World RS1 Windsurfing Championship ឆ្នាំ ២០១៧ នៅទីក្រុង Hoi An ប្រទេសវៀតណាម។ លោកក៏មានតួនាទីជាប្រធានសមាគមកីឡាជិះទូកក្ដោង ប្រទេសសិង្ហបុរី និងជាទីប្រឹក្សាសហព័ន្ធកីឡាទូកក្តោងកម្ពុជា ព្រមទាំងជាទីប្រឹក្សាសហព័ន្ធកីឡាទូកក្តោងសិង្ហបុរីផងដែរ។
លោកបណ្ឌិត Lemmy Teo បានមានប្រសាសន៍ថា៖ “ការអភិវឌ្ឍប្រកបដោយនិរន្តរភាពនៃកីឡាជិះទូកក្ដោងនៅកម្ពុជាពិតជាមានសារៈសំខាន់ ដើម្បីត្រួសត្រាយផ្លូវសម្រាប់កីឡាករ កីឡាការិនី។ កីឡាករខ្លះបន្ទាប់ពីការប្រណាំងទូកក្តោង ក៏អាចនឹងចង់បន្តអាជីពជាគ្រូបង្ហាត់ ឬគ្រូបង្វឹក។ នេះហើយគឺជាគោលបំណងនៃវគ្គបណ្តុះបណ្តាលនេះ”។ លោកបន្តថា៖ “សិក្ខាកាមបានរៀនសូត្រអំពីវិធីសាស្រ្តបង្វឹកសំខាន់ៗ និងព័ត៌មានពាក់ព័ន្ធ ក្នុងការពង្រឹងចំណេះដឹង និងជំនាញជិះទូកក្ដោង។ គ្រូបង្វឹកដែលបានបញ្ចប់វគ្គបណ្ដុះបណ្ដាលនឹងទទួលបានការវាយតម្លៃ និងវិញ្ញាបនប័ត្រដើម្បីធានាបាននូវស្តង់ដារសម្រាប់ការបណ្ដុះបណ្ដាល”។
វគ្គបណ្ដុះបណ្ដាលគ្រូបង្វឹកកីឡាទូកក្តោងថ្នាក់ជាតិ ជាមួយលោកបណ្ឌិត Lemmy Teo នៅ Bay of Lights ខេត្តព្រះសីហនុ
កិច្ចសហការគ្នានេះ គឺជាជំហានដ៏សំខាន់មួយដើម្បីឆ្ពោះទៅរកការលើកកម្ពស់កីឡាជិះទូកក្ដោង ក្នុងខេត្តព្រះសីហនុ និងប្រទេសកម្ពុជា។ តាមរយៈការផ្តល់ឱកាសឱ្យកីឡាករជិះទូកក្ដោងរៀនសូត្រពីលោកបណ្ឌិត Lemmy Teo វគ្គបណ្តុះបណ្តាលនេះនឹងរួមចំណែកដល់ការរីកលូតលាស់ និងអភិវឌ្ឍន៍សហគមន៍ជិះទូកក្ដោងនៅខេត្តព្រះសីហនុ និងប្រទេសកម្ពុជា។
វគ្គបណ្តុះបណ្តាលរយៈពេល ២ ថ្ងៃ បានបញ្ចូលនូវប្រធានបទជាច្រើន រួមមានទស្សនវិជ្ជានៃការបង្វឹក ទ្រឹស្តី សុវត្ថិភាព និងការអភិវឌ្ឍន៍កម្មវិធីសិក្សា។ សិក្ខាកាមមានឱកាសទទួលបានបទពិសោធន៍ជាក់ស្តែង ក្រោមការណែនាំរបស់លោក Lemmy Teo និងទទួលបានការវាយតម្លៃ និងវិញ្ញាបនប័ត្រនៅពេលបញ្ចប់វគ្គសិក្សា។
កុំភ្លេចចូលរួមសហគមន៍កីឡាទឹកក្នុងប្រទេសកម្ពុជា និងតាមដានព័ត៌មានលម្អិតអំពីសហព័ន្ធកីឡាទូកក្តោងកម្ពុជាតាមរយៈ តំណភ្ជាប់នេះ។
អំពី Bay of Lights Entertainment
Bay of Lights Entertainment គឺជាក្រុមហ៊ុនបដិសណ្ឋារកិច្ច និងគ្រប់គ្រងទ្រព្យសកម្មឈានមុខគេរបស់កម្ពុជា ដែលជាអ្នកនៅពីក្រោយកន្លែងកម្សាន្តដ៏ពេញនិយមក្នុងខេត្តព្រះសីហនុ Sihanoukville Adventure Club, Nitro Kart Circuit និង Fly Max Reverse Bungee ។ ក្រុមហ៊ុននេះបានដំណើរការកន្លែងកម្សាន្តចម្រុះជាច្រើននៅក្នុងគម្រោងអភិវឌ្ឍន៍ទីក្រុងរណប Bay of Lights ក្នុងក្រុងរាម ដែលបានជំរុញកំណើនទេសចរណ៍របស់ខេត្តព្រះសីហនុ តាមរយៈសេវាកម្មពិសេស និងបទពិសោធន៍កម្សាន្តមិនអាចបំភ្លេចបាន។ សម្រាប់ព័ត៌មានលម្អិត និងបន្ថែម សូមចូលទៅកាន់គេហទំព័រ www.bayoflights-entertainment.com
Account
Security
Favourite Content