ព័ត៌មានកម្សាន្តប្លែកៗ
រសនិយម
តន្រ្តី
ភាពយន្ត
មាតិកាឌីជីថល
បើកសោជីវិត
ចង់ដឹងរឿងគេ
វនយាត្រា
Cicada Agent
ព្រះនាងកង្កែប
ថ្មីៗនេះអាជ្ញាធរជាតិអប្សរាបានឱ្យដឹងថា អ្នកជំនាញអភិរក្សរបស់ខ្លួន បានបន្តជួសជុលស្លាបខាងត្បូងនៃខ្លោងទ្វារខាងលិចប្រាសាទបន្ទាយក្តី ដែលធ្លាប់ទទួលរងការខូចខាតទ្រុឌទ្រោមខ្លាំង ដោយសារកត្តាអាយុកាលរបស់ថ្ម ដើមឈើដុះចាក់ឬសចូលតាមថ្នេរថ្មចូលខឿន និងចូលក្នុងគ្រឹះ ជាហេតុធ្វើឱ្យថ្មរបើកគ្រេចចេញពីគ្នា។
បុរាណវិទូ និងជាអ្នកមើលការខុសត្រូវនៅការដ្ឋានជួសជុលខ្លោងទ្វារខាងលិចប្រាសាទបន្ទាយក្តី លោកស្រី នេត ស៊ីមន មានប្រសាសន៍ថា ដំណាក់កាលទី២នៃការងារជួសជុល គឺត្រូវប្រើ២ដំណាក់កាល ដោយដំណាក់កាលទី១ គឺសិក្សាទាំងរូបរាង ទម្រង់នៃស្ថានភាពរបស់ខ្លោងទ្វាររួចហើយ ព្រមទាំងបានប្រមូលព័ត៌មាន និងរៀបចំឯកសាររួចរាល់ដែរ។ ចំណែកដំណាក់កាលទី២ គឺចាប់ផ្តើមអនុវត្តគម្រោងជួសជុលតែម្តង ក្នុងនោះ គឺមានការរុះរើថ្មចាប់ពីផ្នែកដំបូលរហូតដល់គ្រឹះ ត្រូវពង្រឹងគ្រឹះរួចហើយត្រូវរៀបចំផ្គុំថ្មទាំងនោះចូលតាមស្ថានភាពដើមវិញ ដោយប្រើបច្ចេកទេសដូចសម័យបុរាណ និងប្រើជំនួយគ្រឿងចក្រចាំបាច់មួយចំនួន។
លោកស្រី នេត ស៊ីមន ឱ្យដឹងទៀតថា កាលពីឆ្នាំ២០២២ ក្រុមការងារធ្លាប់បានសិក្សាគ្រឹះ និងបានរកថ្មដែលរលុះធ្លាក់ ហើយការជួសជុលខ្លោងទ្វារប្រៀបធៀបដូចជារៀបប្រាសាទពីរនៅជិតគ្នា ហើយបញ្ចូលគ្នាតែមួយ ដោយធ្នឹមភ្ជាប់គ្នារួចទើបរៀបថ្មមានមុខ ៤ ដាក់ពីលើ។ ការងាររបៀបនេះ បានធ្វើឱ្យក្រុមការងារជួបការលំបាកមួយចំនួនដែរ។
គួរជម្រាបថា ក្រៅតែពីទទួលរងការខូចខាតទ្រុឌទ្រោមខ្លាំង ខ្លោងទ្វារខាងលិចប្រាសាទបន្ទាយក្តី ប្រឈមបញ្ហាមួយទៀត គឺសត្វកណ្តៀរ ដែលបានពាំដីចេញពីគ្រឹះ បណ្តាលឱ្យមានរន្ធប្រហោងខាងក្រោម ដែលនាំទឹកភ្លៀងហូរជ្រាបចូលតាមចន្លោះថ្មទៅក្នុងគ្រឹះ បណ្តាលឱ្យគ្រឹះខ្សោយមិនរឹងមាំ និងទ្រេតស្រុតតាមនោះដែរ៕
Account
Security
Favourite Content