ព្រះនាងតូច នរោត្តម ជេនណា ត្រូវបានអញ្ជើញឱ្យចូលរួមនៅក្នុងនៅក្នុងកិច្ចសម្ភាសជាមួយសារព័ត៌មាន Global Time នៅក្នុងប្រទេសចិន កាលពីពេលថ្មីៗកន្លងទៅនេះ។ ព្រះនាងក៏បានបង្ហាញជាតិសាសន៍ដទៃឱ្យបានឃើញវប្បធម៌ និងអរិយធម៌ដ៏ល្អល្អះរបស់ខ្មែរនៅលើឆាកសម្តែងរបស់ប្រទេសចិនផងដែរ។

នៅក្នុងកិច្ចសម្ភាសដោយផ្ទាល់ ទ្រង់ នរោត្តម ជេនណា បានពន្យល់ប្រាប់ពីអត្ថន័យបទចម្រៀងដែលទ្រង់បានសម្តែងនៅលើឆាកប្រទេសចិន បទចម្រៀង មាគ៌ាអង្គរ គឺជាការឧន្ទិសដល់ប្រាសាទអង្គរវត្ត ដែលជាបេតិកភណ្ឌដ៏អស្ចារ្យមួយរបស់ពិភពលោក។ ក្នុងនោះដែរ ព្រះនាងក៏បានបង្ហាញចំណាប់អារម្មណ៍រំភើប និងស្រលាញ់ពេញចិត្តចំពោះក្រុមកុមារតូចៗដែលច្រៀងរួមជាមួយព្រះនាង ថែមទាំងបានទុកវត្ថុអនុស្សាវរីយ៍ដែលពួកគេជូនទ្រង់ថែមទៀតផង។


ព្រះនាងតូចក៏បានបង្ហាញប្រាប់ពីអារម្មណ៍របស់ទ្រង់នៅពេលដែលច្រៀងចម្រៀង «Nostagia Of China» ថានៅពេលដែលច្រៀងបទចម្រៀងនេះដំបូង ទ្រង់ពិបាកនៅក្នុងការដាក់អារម្មណ៍បន្តិច ហើយក៏មិនដឹងគួរធ្វើខ្លួនបែបណាដែរ។ ប៉ុន្តែពេលដែលបានមកដល់ប្រទេសដ៏គួរឱ្យស្រលាញ់មួយនេះ ទើបទ្រង់បានឈ្វេងយល់ឃើញ និងបានដឹងថា ហេតុអ្វីបានជាសម្តេចតាស្រលាញ់ប្រទេសមួយនេះ។ គួរឱ្យដឹងថាចម្រៀង «Nostagia Of China» ជាព្រះរាជស្នាដៃនិពន្ធរបស់ព្រះបរមកោដ្ឋព្រះបាទ នរោត្តម សីហនុ ហើយព្រះនាងតូច ទ្រង់ធ្លាប់បានច្រៀងបទមួយនេះនៅក្នុងពិធីទទួលស្វាគន៍ជាតិនៅក្នុងស្ថានទូតចិនប្រចាំនៅកម្ពុជា។
ព្រះនាងតូចទ្រង់បានបន្ថែមទៀតថា «ការស្លៀកសម្លៀកបំពាក់ប្រពៃណី និងច្រៀងបទចម្រៀងរបស់ខ្មែរ នៅលើឆាកសម្តែងរបស់ប្រទេសចិនជាការបង្ហាញនូវចំណងមិត្តភាពរវាងប្រទេសទាំងពីរ»។ ការមកដល់ប្រទេសចិនលើកនេះ ក៏ជាកត្តាជំរុញបន្ថែមឱ្យទ្រង់កាន់តែចង់សិក្សា និងពង្រឹងភាសាចិនបន្ថែមផងដែរ។ បន្ថែមនៅក្នុងកិច្ចសម្ភាសព្រះនាងតូចក៏បានបង្ហើបប្រាប់ពី Idol ក្នុងចិត្តរបស់ទ្រង់ និងមានបំណងចង់ជួបដោយផ្ទាល់នោះគឺតារាសម្តែងស្រី ចាវ លូស៊ី (Zhao Lusi)។

ទ្រង់នរោត្តម ជេនណា មានវ័យត្រឹមតែ ១១ ព្រះវស្សា ប៉ុន្តែទ្រង់មានសមត្ថភាពអាចនិយាយបានរហូតដល់ទៅ ៥ ភាសា ដូចជា ខ្មែរ អង់គ្លេស បារាំង ថៃ និងចិន។ ទ្រង់ក៏ត្រូវបានគេស្គាល់ថា ជាតារាសម្តែង តារាចម្រៀង និងក្តាប់បានងារជាទូតសុឆន្ទៈរបស់ប្រ៊េនធំៗមួយចំនួនក្នុងប្រទេសផងដែរ៕























Account
Security
Favourite Content