ក្រោយមានបញ្ហាសុខភាពធ្ងន់ធ្ងររហូតបាត់បង់សមត្ថភាពនិយាយ ឈរ និងដើរ នៅពេលនេះស្ថានភាពសុខភាពរបស់ Zhao Lusi មានលក្ខណៈប្រសើរជាងមុនខ្លះហើយ។
យោងតាមការបកប្រែរបស់ Lovekpop95 ទៅលើអត្ថបទរបស់ Sina ដែលបានចុះផ្សាយកាលពីថ្ងៃទី២៨ ខែធ្នូកន្លងទៅ នាង Wei Xiao ដែលត្រូវជាមិត្តភក្ដិ បានចេញមកបង្ហើបពីស្ថានភាពសុខភាពបច្ចុប្បន្នរបស់តារាសម្ដែងជនជាតិចិនរូបនេះ។ ក្នុងសភាពដែលល្អជាងមុន Wei Xiao បានរៀបរាប់ថា៖ “Zhao Lusi បានប្រាប់ខ្ញុំឱ្យផ្ដល់ដំណឹងទៅអ្នកទាំងអស់គ្នាពីស្ថានភាពរបស់នាងដែលចាប់ផ្ដើមប្រសើរជាងមុន និងសង្ឈឹមថា នេះជាដំណឹងមួយដែលអាចជួយកាត់បន្ថយការកង្វល់របស់អ្នកទាំងអស់គ្នា។ ថ្មីៗនេះ នាងអាចចាប់ផ្ដើមនិយាយបានម្ដងទៀត និងអាចក្រោកមកធ្វើលំហាត់ប្រាណដើម្បីស្តារនីតិសម្បទាឡើងមកវិញខ្លះហើយ”។
មិត្តរូបដដែលនេះ បានប្រាប់បន្តថា ដំបូងឡើយ គ្រូពេទ្យបានសន្និដ្ឋានថា ការព្យាបាលអាចនឹងមានរយៈពេលយូរ តែបើយោងតាមការសហការយ៉ាងសកម្មរបស់តារាស្រីវ័យ២៦ឆ្នាំក្នុងពេលប៉ុន្មានថ្ងៃចុងក្រោយនេះ គម្រោងដើមអាចនឹងប្រែប្រួល ដោយសង្ឈឹមថានឹងទទួលបានលទ្ធផលវិជ្ជមាននៅទីបញ្ចប់។
Wei Xiao បានអធិប្បាយបន្ថែមថា នាងបានសង្កេតឃើញពីភាពខុសប្រក្រតីទាំងសុខភាពផ្លូវចិត្ត និងផ្លូវកាយរបស់មិត្ត តាំងតែពួកនាងបានជួបគ្នានៅក្នុងថ្ងៃខួបកំណើតរបស់ Zhao Lusi កាលពីថ្ងៃទី៩ ខែវិច្ឆិកាមកម៉្លេះ។ រហូតមកដល់ថ្ងៃទី១៨ ខែធ្នូនេះ បញ្ហាមួយនេះកាន់តែធ្ងន់ធ្ងររហូតដល់តារាស្រីរូបនេះមិនអាចឈរ ដើរ ឬសូម្បីតែនិយាយបាន ដែលអាចកើតមកពីការដាច់សរសៃឈាមខួរក្បាលកម្រិតស្រាល។
សម្រាប់ដើមហេតុជាក់ស្ដែងកើតចេញពីអ្វី មិត្តរូបដដែលនេះសុំមិនធ្វើការបកស្រាយនោះទេ ដោយយល់ថា នាងគួរទុកឱ្យសាមីខ្លួនជាអ្នកស្រាយបំភ្លឺនៅពេលក្រោយទៅចុះ។ ដោយឡែក ត្បិតនៅមិនទាន់ដឹងដើមចមជាក់លាក់ក៏ពិតមែន តែអ្នកគាំទ្រមួយចំនួនធំបានយល់ឃើញស្របគ្នាថា បញ្ហាសុខភាពរបស់ Zhao Lusi អាចនឹងកើតចេញពីសម្ពោធការងារពីរឿងថ្មី ដែលទើបតែចាប់ផ្ដើមថតនៅដើមខែធ្នូនេះ៕