ផ្ទុះការចែករំលែកព្រោងព្រាតក្រោយតារាស្រីជួរមុខ ស៊ីន យូប៊ីន ស្លៀកពាក់សប្រតិបត្តិធម៌នៅក្នុងទីវត្តអារាមមួយកន្លែងក្នុងខេត្តសៀមរាប។ កន្លងមកមិនមែនមានតែ យូប៊ីន ឡើយដែលទម្លាក់ការងារសិល្បៈមួយរយៈ ហើយទៅប្រតិបត្តិធម៌នោះ នៅមានតារាស្រីប៉ុន្មានរូបដូចខាងក្រោមនេះ សុទ្ធតែធ្លាប់បានគ្រងឈុតស ជ្រះថ្លាក្នុងព្រះពុទ្ធសាសនា។
ទី១៖ ប៉ូគឹមថេង សុតធីតា



កាលពីឆ្នាំ ២០២២ បវរកញ្ញារាងខ្ពស់ស្រលះ ប៉ូគឹមថេង សុតធីតា បានធ្វើឱ្យមហាជនមានការភ្ញាក់ផ្អើលក្រោយបានឃើញស្រីស្រស់សោភារូបនេះបានស្លៀកពាក់ស បដិបត្តិធម៌ក្នុងព្រះពុទ្ធសាសនា។ Miss Grand Cambodia 2021 រូបនេះបានដកខ្លួនពីបណ្ដាញសង្គមមួយរយៈ មកជ្រកកោនក្រោមម្លប់នៃព្រះធម៌ដោយការស្លៀកពាក់ស ហូបបួស និងសមាធិ ដើម្បីឱ្យចិត្តបានស្ងប់ល្អទៅតាមគន្លងនៃព្រះធម៌។
ទី២៖ ដួង ម៉ានិច



ដូចដែលមហាជនបានដឹងរួចមកហើយថា ក្រោយរៀបការអ្នកនាង ដួង ម៉ានិច និងស្វាមីបានផ្លាស់ប្ដូរការរស់នៅមកប្រើជីវិតតាមជនបទយ៉ាងមានក្ដីសុខ។ ដ្បិតថាគូស្វាមីភរិយាទាំងពីរបានរស់នៅជួបជុំយ៉ាងសុខដុមក៏ពិតមែន ចិត្តជ្រះថ្លានៅក្នុងព្រះពុទ្ធសាសនាបានជំរុញឱ្យស្វាមីតារាស្រីរូបនេះសម្រេចចិត្តបួសក្នុងរយៈពេលដ៏ខ្លី ដើម្បីបំពេញបុណ្យកុសល។ រីឯអ្នកនាង ដួង ម៉ានិច្ច ជាភរិយាក៏បានបំពេញបំណងស្វាមីព្រមទាំងបានស្លៀកស បំបួសស្វាមីដោយផ្ទាល់ជាមួយក្រុមគ្រួសារទៀតផង។ ថ្មីៗនេះអ្នកនាង ដួង ម៉ានិច ផ្ទាល់ក៏បានគ្រងឈុតសបដិបត្តិធម៌នៅសាលាវិបស្សនាមួយផងដែរ។
ទី៣៖ ហង្ស ម៉ារីនី


អតីតតារាសម្ដែងស្រីរូបនេះធ្លាប់បានបួសដល់ទី ២ ដងគឺនៅក្នុងឆ្នាំ ២០១៣ និងលើកទី ២ ជាមួយបងស្រីអ្នកនាង ហង្ស ម៉ារីណា ក្នុងឆ្នាំ ២០១៦។ ការសម្រេចចិត្តសាងផ្នួសរយៈពេលខ្លីរបស់តារាស្រីរូបនេះក្នុងគោលបំណងរក្សាចិត្តឱ្យបានស្ងប់ និងសន្សំបុណ្យកុសលនៅក្នុងព្រះពុទ្ធសាសនា។
ទី៤៖ ស៊ីន យូប៊ីន






ក្រោយផ្អាកសកម្មភាពនៅក្នុងវិស័យសិល្បៈ ស៊ីន យូប៊ីន បានស្លៀកឈុតសបដិបត្តិធម៌ក្នុងទីវត្តអារាមមួយកន្លែងក្នុងខេត្តសៀមរាប។ ប្រមាណជា ១ ខែមកនេះតារាសម្ដែងស្រីជួរមុខ យូប៊ីន បានសម្ងំពួនជ្រកក្រោមព្រះធម៌ដោយការស្លៀកពាក់សប្រតិបត្តិធម៌ និងរស់នៅយ៉ាងសាមញ្ញ ដោយគ្មានសម្ភារៈនិយម។ យូប៊ីន បានប្រើជីវិតរស់នៅយ៉ាងស្ងប់ស្ងាត់ជាមួយធម្មជាតិ ជួយបោសសម្អាតទីវត្តអារាម លាងចានក្បាន និងបង្រៀនភាសាដល់ក្មេងៗ៕


















































Account
Security
Favourite Content