នៅថ្ងៃទី 3 ខែតុលា មានសេចក្ដីរាយការណ៍ថា Bang Chan មេក្រុម Stray Kids បានធ្វើការបរិច្ចាគដល់មជ្ឈមណ្ឌលវេជ្ជសាស្ត្រ Samsung និងគណៈកម្មាធិការកូរ៉េសម្រាប់ UNICEF ចំនួន 100 លានវ៉ុន (ប្រហែល 71,000 ដុល្លារ) ក្នុងមួយស្ថាប័ន ដែលសរុបចូលគ្នាគឺ 200 លានវ៉ុន (ប្រហែល 142,000 ដុល្លារ) ។

ក្នុងនោះ Samsung Medical Center នឹងប្រើប្រាស់ថវិកាបរិច្ចាគរបស់ Bang Chan ដើម្បីជួយចំណាយលើការព្យាបាលកុមារ និងអ្នកជំងឺវ័យជំទង់ ខណៈដែល UNICEF គ្រោងនឹងប្រើប្រាស់ការបរិច្ចាគរបស់លោកដើម្បីជួយកុមារនៅក្នុងតំបន់ដែលត្រូវការជំនួយជាបន្ទាន់បំផុតជុំវិញពិភពលោកទាក់ទងនឹងសុខភាព អាហារូបត្ថម្ភ ទឹកស្អាត អនាម័យ ការអប់រំ ការការពារ និងការសង្គ្រោះបន្ទាន់។ តាមរយៈការបរិច្ចាគនេះ Bang Chan ក៏បានក្លាយជាសមាជិកនៃក្លឹបកិត្តិយសរបស់ UNICEF ផងដែរ។
Bang Chan បាននិយាយថា “អរគុណចំពោះក្តីស្រលាញ់ដ៏មានតម្លៃដែលអ្នកគាំទ្រគ្រប់គ្នាបានផ្ញើមកខ្ញុំ ដោយសារទាំងអស់គ្នាទើបខ្ញុំអាចចែករំលែកនូវអារម្មណ៍កក់ក្តៅទាំងនេះនៅថ្ងៃខួបកំណើតរបស់ខ្ញុំ។ ខ្ញុំសង្ឃឹមយ៉ាងមុតមាំថាការបរិច្ចាគនេះ នឹងផ្តល់កម្លាំងបន្តិចបន្តួចដល់ក្មេងៗដែលសុបិនចង់បានភាពភ្លឺស្វាង និងភាពរីករាយនៅថ្ងៃខាងមុខរបស់ពួកគេ”។
នេះមិនមែនលើកទីមួយទេដែល Bang Chan បានចូលរួមក្នុងកិច្ចខិតខំប្រឹងប្រែងសប្បុរសធម៌។ ជាក់ស្ដែងកាលពីឆ្នាំមុន នៅថ្ងៃខួបកំណើតដូចគ្នា លោកបានបរិច្ចាគ 100 លានវ៉ុន (ប្រហែល 71,000 ដុល្លារ) ដល់ Community Chest of Korea ដើម្បីជួយដល់អត្តពលិកដែលត្រូវប្រឈមពិការភាព។
ពាក់ព័ន្ធការងារសិល្បៈ ក្នុងខែតុលានេះដែរ ក្រុម Stray Kids គ្រោងនឹងរៀបចំការប្រគំតន្ត្រីទេសចរណ៍ពិភពលោកដ៏ធំរបស់ពួកគេ ‘dominATE : celebrate’ នៅកីឡដ្ឋាន Incheon Asiad Main Stadium នៅថ្ងៃទី 18 និង 19 ៕

























Account
Security
Favourite Content