ក្រុមចម្រៀងប្រុស K-pop Seventeen បានបរិច្ចាគថវិកា ២៥ ម៉ឺនដុល្លារដល់អង្គការអប់រំ វិទ្យាសាស្ត្រ និងវប្បធម៌របស់អង្គការសហប្រជាជាតិ UNESCO ដើម្បីអបអរទិវាយុវជនអន្តរជាតិ។

យោងតាម Pledis Entertainment កញ្ចប់ថវិកានេះត្រូវបានផ្តល់ទៅឱ្យទីភ្នាក់ងារអង្គការសហប្រជាជាតិកាលពីថ្ងៃអង្គារបន្ទាប់ពីត្រូវបានរៃអង្គាសតាមរយៈកម្មវិធីដេញថ្លៃសប្បុរសធម៌ “Joopiter presents: sacai x Seventeen” របស់ក្រុមចម្រៀងនេះ។ ថវិកានេះដែរនឹងត្រូវបានប្រើដើម្បីពង្រឹងនិងទ្រទ្រង់គម្រោងជំនួយសម្រាប់យុវជនសកល (Global Youth Grant Scheme) ដែល Seventeen បានរៀបចំរួមគ្នាជាមួយអង្គការយូណេស្កូ។
គួរបញ្ជាក់ថា Seventeen បច្ចុប្បន្នក៏មានតំណែងជាទូតសុច្ឆន្ទៈរបស់អង្គការយូណេស្កូសម្រាប់យុវជនផងដែរ។ នៅឆ្នាំ ២០២៣ ក្រុមចម្រៀងដែលមានសមាជិក ១៣ នាក់មួយនេះបានថ្លែងសុន្ទរកថា និងសម្តែងនៅឯវេទិកាយុវជនរបស់អង្គការយូណេស្កូលើកទី ១៣ ដែលប្រារព្ធឡើងជាមួយមហាសន្និបាតអង្គការយូណេស្កូនៅទីក្រុងប៉ារីស ធ្វើឱ្យពួកគេបានក្លាយជាតារា K-pop ដំបូងគេដែលបានថ្លែងសុន្ទរកថានៅក្នុងកិច្ចប្រជុំធំរបស់ UNESCO។



បន្ទាប់ពីត្រូវបានតែងតាំងជាទូតសុច្ឆន្ទៈដំបូងរបស់អង្គការសម្រាប់យុវជន ក្នុងឆ្នាំ២០២៤ ក្រុមចម្រៀងនេះបានបរិច្ចាគ ១ លានដុល្លារដើម្បីបង្កើតកម្មវិធីគាំទ្រយុវជនទូទាំងពិភពលោកក្នុងភាពជាដៃគូជាមួយអង្គការយូណេស្កូ។ ឥឡូវនេះមូលនិធិនេះត្រូវបានប្រើប្រាស់ដើម្បីគាំទ្រយុវជនចំនួន ១០០ ក្រុមនៅជុំវិញពិភពលោកក្នុងការអនុវត្តគម្រោងដែលយុវជនបានផ្តួចផ្តើមគំនិតដោយផ្ទាល់សម្រាប់អនាគតល្អប្រសើរ។
សមាជិក Seventeen បាននិយាយនៅក្នុងសេចក្ដីប្រកាសព័ត៌មានថា៖ “ចាប់តាំងពីការបង្ហាញខ្លួនដំបូងរហូតមកដល់ពេលនេះ ពួកយើងបានរីកចម្រើនតាមរយៈការបង្ហាញពីពេលវេលាល្អៗជាច្រើនរបស់យុវវ័យតាមរយៈតន្ត្រីដែលបញ្ចូលជាមួយនឹងបទពិសោធន៍ និងអារម្មណ៍ពិតរបស់យើង ដែលធ្វើឱ្យអត្ថន័យនៃទិវាយុវជនអន្តរជាតិកាន់តែពិសេសសម្រាប់ពួកយើង។ យើងសូមផ្ញើសារលើកទឹកចិត្តដល់យុវជនទាំងអស់ជុំវិញពិភពលោក ដែលកំពុងបន្តឈានទៅរកក្ដីសុបិនរបស់ខ្លួន” ៕
























Account
Security
Favourite Content