នៅថ្ងៃទី៥ ខែមិថុនា នេះ ភាគី NewJeans និងទីភ្នាក់ងារ ADOR បានចេញមកតទល់គ្នាជាថ្មីក្នុងសវនាការលើកទី ២ លើបញ្ហាបញ្ជាក់សុពលភាពនៃកិច្ចសន្យា ដោយម្ខាងៗនៅតែបន្តអះអាងហេតុផលផ្ទាល់ខ្លួន តែលទ្ធផលនៅតែអូសបន្លាយ មិនទាន់ដាច់ស្រេច។

យោងតាមសារព័ត៌មាន Allkpop នៅក្នុងសវការទី ២ដែលធ្វើឡើងនៅតុលាការកណ្ដាលទីក្រុងសេអ៊ូលនេះ សមាជិកទាំង ៥ គឺ Minji, Hanni, Danielle, Haerin និង Hyein មិនបានចូលរួមដោយផ្ទាល់នោះទេ ដោយមានតំណាងផ្លូវច្បាប់មកចូលរួមជំនួស។
នៅពេលដែលតុលាការបានចាទសួរថា តើភាគីណាមួយមានបំណងចង់មករកដំណោះស្រាយទេ? NewJeans បានឆ្លើយតបតាមរយៈអ្នកតំណាងរបស់ពួកគេថា៖ “ការជឿទុកចិត្តក្នុងទំនាក់ទំនងនេះបានបាត់បង់អស់ទាំងស្រុង ហើយពួកយើងបានដើរមកកម្រិតនេះហើយ ពួកយើងមិនអាចត្រឡប់ក្រោយវិញបានទេ”។
ដោយឡែក ទីភ្នាក់ងារ ADOR បានស្នើឱ្យ តុលាការជាអ្នកសម្រេចទៅលើរឿងនេះវិញ ដែលអាចធ្វើឱ្យបញ្ហានេះកាន់តែងាយស្រួលដោះស្រាយជាងមុន។

ក្នុងពេលជាមួយគ្នា ភាគីរបស់ NewJeans បានអះអាងថា៖ “ADOR បានបរាជ័យក្នុងការបំពេញភារកិច្ចសំខាន់របស់ខ្លួនក្នុងការគ្រប់គ្រងដូចដែលបានចែងក្នុងកិច្ចសន្យាផ្ដាច់មុខ។ បន្ទាប់ពីការបណ្តេញ Min Hee Jin (អតីត CEO របស់ ADOR) ចេញ ADOR បានទទួលការផ្លាស់ប្តូរថ្មីភ្លាមៗនៅក្នុងការគ្រប់គ្រង ហើយជាលទ្ធផល NewJeans បានបាត់បង់ឯករាជ្យភាពរបស់ខ្លួន។ ទោះបីជាក្រុមបានដាក់សំណើជាច្រើនដើម្បីកែប្រែរឿងនេះក្ដី តែ ADOR មិនបានធ្វើតាមឡើយ”។
ទោះជាក្រុមខេប៉ុបនារីបានលើកឡើងបែបនេះក្ដី ភាគីរបស់ ADOR បានអះអាងថា៖ “រាល់សវនាការ NewJeans បានផ្លាស់ប្តូរមូលហេតុដែលពួកគេសម្រេចចិត្តបញ្ចប់កិច្ចសន្យាផ្តាច់មុខនេះជារឿយៗ។ នេះបង្ហាញថាពួកគេបានសម្រេចចិត្ត បញ្ចប់កិច្ចសន្យាផ្ដាច់មុខនេះជាមុន ហើយឥឡូវនេះកំពុងព្យាយាមស្វែងរកហេតុផលដើម្បីជាអំណះអំណាង” ។
ភាគីរបស់ NewJeans បានប្រកែកភ្លាមៗវិញថា ភស្តុតាងរបស់ ADOR ដែលអះអាងថា ទីភ្នាក់ងារបានបំពេញតួនាទីរបស់ខ្លួននោះ មិនគ្រប់គ្រាន់ឡើយ។ តំណាងពួកនាង បានលើកពីការដែល ADOR អះអាងថា ខ្លួនបានណាត់ជួបជាមួយនឹងផលិតករម្នាក់ដើម្បីធ្វើការងារឱ្យ NewJeans បើសិនជាវាបានកើតឡើងមែន ទីភ្នាក់ងារប្រាកដជាអាចពន្យល់ថា កិច្ចប្រជុំនោះចេញជាលទ្ធផលអ្វីខ្លះជាក់ជាមិនខាន។

គួររំឭកផងដែរថា កាលពីចុងខែឧសភាកន្លងទៅ តុលាការទើបតែយល់ស្របតាម ADOR ក្នុងការហាមឃាត់មិនឱ្យម្ចាស់បទ Super Shy ធ្វើការងារឯករាជ្យ ដោយព្រមានថា នឹងធ្វើការផាកពិន័យចំនួន ១ពាន់លានវ៉ុន ឬប្រមាណ ៧៣ម៉ឺនដុល្លារអាមេរិកក្នុងមួយការងារ។ ទន្ទឹមគ្នានេះ សវនាការលើកទីបីរវាង NewJeans ទល់នឹង ADOR នឹងប្រព្រឹត្តទៅនៅថ្ងៃទី ២៤ ខែកក្កដា ខាងមុខនេះ ៕























Account
Security
Favourite Content