បើទោះបីជាថ្មីៗនេះតារាសម្តែងស្រី សារាយ សក្ខណា មិនមានស្នាដៃសិល្បៈថ្មីក្រាស់ក្រែលដូចជំនាន់នាងប្រឡូកសិល្បៈពេញទំហឹងក៏ពិតមែន តែនាងក៏នៅឆ្លៀតបញ្ចេញសមិទ្ធផលស្នាដៃសិល្បៈខ្លះៗតាមរយៈភាពយន្ត និងការលេចមុខចូលរួមក្នុងកម្មវិធីសិល្បៈផ្សេងៗអំឡុងពេលនាងរស់នៅស្រុកខ្មែរ។
តួយ៉ាងគ្រាន់តែបើកទំព័រឆ្នាំ ២០២៤ ភ្លាម អ្នកម៉ាក់កូន ២ រូបនេះ ទម្លាក់ស្នាដៃភាពយន្តថ្មីមួយភ្លែតជូនទស្សនិកជន ចំណងជើងថា «ស្រលាញ់បងល្អពេក» ជាវណ្ណកម្មស្នាដៃផលិតរបស់ LD Entertainment។



ក្នុងថ្ងៃសម្ពោធរឿងនេះ សក្ខណា ថា រឿង «ស្រលាញ់បងល្អពេក» ជាកាដូឆ្នាំថ្មីរបស់នាងជូនទៅប្រិយមិត្តអ្នកគាំទ្រទាំងអស់ ប៉ុន្តែនាងក៏នឹងមានស្នាដៃភាពយន្តបន្តបន្ទាប់ទៀតផងដែរ ដូចជារឿង «អប្សរាមហាអង្គរ» និងរឿងខ្នាតធំមួយទៀតដែលទើបបញ្ចប់ការថតកាលពីខែធ្នូកន្លងទៅ។
តារាសម្តែងរូបនេះបន្តថា សម្រាប់រឿងខ្នាតធំក្រោយ គឺនាងផ្លាស់ប្តូររសជាតិថ្មីបន្តិច គឺជារឿងបែបភ័យរន្ធត់ មិនដូចរឿង «ស្រលាញ់បងល្អពេក» ដែលកំពុងចាក់បញ្ចាំងនេះទេ ព្រោះរឿងនោះបង្ហាញពីមនោសញ្ចេតនាស្នេហាបែបកំលោះក្រមុំស្រុកស្រែ និងទេសភាពវាលស្រូវស្រុកស្រែដ៏ខៀវស្រងាត់ ស័ក្តិសមបំផុតសម្រាប់ចំណីចក្ខុទស្សនិកជននាដើមឆ្នាំថ្មីបែបនេះ។

តារាសម្តែងស្រីលេចធ្លោរូបនេះសង្ឃឹមថា ពុកម៉ែប្អូននឹងស្រលាញ់ចូលចិត្ត ហើយមកគាំទ្ររឿង «ស្រលាញ់បងល្អពេក» ឱ្យបានច្រើនកុះករ។ ជាពិសេសគឺមកទទួលយកភាពរីករាយ សំណើចក្អាកក្អាយពីសាច់រឿងកំប្លែងមួយនេះ។ នាងបង្ហើបថា គ្រាន់តែផលិតករទាក់ទងមក ហើយបានអានសាច់រឿងភ្លាមគឺនាងសប្បាយអរតែម្តង ដោយសារប៉ះតួប្រុស ជា សុវណ្ណនរាហ៍ , ឆាយ នីតា , ង៉ែត សុវណ្ណនីតា , B I G និងតារាល្បីៗជាច្រើនរូបទៀត ដែលសុទ្ធសឹងជាកំពូលកូរ មកចូលរួមសម្តែងក្នុងរឿងនេះរឹតតែធ្វើឱ្យអ្នកមើលសើចគាំងតែម្តង។




ដោយឡែក គម្រោងវិលទៅសហរដ្ឋអាមេរិកវិញពេលណានោះ គឺនៅពុំទាន់ដឹងនៅឡើយទេ ព្រោះអ្នកនាងបានដាក់កូនទាំងពីរឱ្យចូលរៀនសាលានៅខ្មែរហើយ ដូច្នេះចង់ឱ្យពួកគេបានរៀនសូត្រសិន។ ឆ្លៀតពេលនេះ អ្នកនាងក៏ទទួលធ្វើការងារសិល្បៈផ្សេងៗតាមដែលផលិតករ និងបណ្តាក្រុមហ៊ុនទាក់ទងមក៕























Account
Security
Favourite Content