កាលពីចុងខែ ឧសភា ឆ្នាំ ២០២៤ សមាជិកក្រុមចម្រៀងនារី EXID គឺ Hani បានប្រកាសពីដំណឹងល្អដល់អ្នកគាំទ្រ អំពីគម្រោងរៀបការជាមួយមិត្ដប្រុស លោក Yang JaeWoong ជាអ្នកជំនាញផ្លូវចិត្ដ។ អ្នកទាំងពីរត្រូវបានរាយការណ៍ថា នឹងចូលរោងមង្គលនៅខែ កញ្ញា ឆ្នាំ ២០២៤ ខាងមុខ។
មែនទែនទៅ បើទោះជាមានគម្លាតអាយុខុសគ្នាដល់ទៅ ១០ ឆ្នាំ ប៉ុន្ដែទំនាក់ទំនងរបស់នាង និងអនាគតស្វាមីរបស់នាងពិតជាមានភាពផ្អែមល្ហែម និងមានការចុះសម្រុងគ្នាយ៉ាងខ្លាំង។ អ្នកទាំងពីរសម្រេចចិត្ដសាងគ្រួសារក្រោយសេពគប់មើលចិត្ដថ្លើមគ្នាអស់រយៈពេល ៤ ឆ្នាំ។
ថ្មីៗ នេះ លោក Yang JaeWoong បានចូលរួមក្នុងកម្មវិធី “Table for Four” និងបាននិយាយរំឭកដល់ Hani យ៉ាងរីករាយ។ លោកបានទម្លាយថា Hani ជាអ្នកសារភាពស្នេហ៍ដាក់លោកមុន។ ចំណុចនេះហើយទើបធ្វើឲ្យលោកចាប់អារម្មណ៍នាងខ្លាំង។
លោកបានបន្ដថា៖ Hani ជាមនុស្សស្រីម្នាក់ដែលចេះសប្បាយរីករាយចំពោះជីវិតនាង និងរស់នៅយ៉ាងមានក្ដីសុខ។ របៀបដែលនាងរៀបចំជីវិតរបស់ខ្លួន លោកពិតជាសរសើរយ៉ាងខ្លាំង លោកក៏ចង់រស់នៅដូចនាង ហើយនេះជាមូលហេតុមួយក្នុងចំណោមផ្សេងទៀតដែលលោកចង់ចំណាយពេលរបស់ខ្លួនពេញមួយជីវិតរបស់ខ្លួនជាមួយនាង។
គួរបញ្ជាក់ថា នៅក្នុងឆ្នាំ ២០២២ តារាស្រី Hani និងតារាប្រុស Yang JaeWoong បានប្រកាសពីទំនាក់ទំនងស្នេហាអ្នកទាំងពីរជាសាធារណៈ បន្ទាប់ពីសម្ងំមើលចិត្ដថ្លើមគ្នាអស់រយៈពេល ២ ឆ្នាំ។ ជារឿយៗ អ្នកទាំងពីរតែងរំឭកពីគ្នា ដែលធ្វើឲ្យមហាជនជាច្រើនសរសើរពីទំនាក់ទំនងស្នេហារបស់ពួកគេ ៕