លោកជំទាវបណ្ឌិត ពេជ ចន្ទមុន្នី ភរិយានាយករដ្ឋមន្រ្តីកម្ពុជាបានសរសេរជាសារលើកទឹកចិត្តអ្នកផលិតមាតិកា ហេង វិសាល ក្រោយការបង្ហោះ Status រៀបរាប់ពីកង្វល់របស់លោក និងក្រុមគ្រួសាររងសម្ពាធនៃការចោទប្រកាន់រឿងលួចកិបកេងជំនួយរបស់សប្បុរសជន។

ដូចដែលមហាជនបានជ្រាបក្នុងអំឡុងពេលដែលប្រទេសជាតិទទួលការឈ្លានពានរបស់សៀម ហេង វិសាល និងក្រុមគ្រួសារ បានចំណាយថវិកាផ្ទាល់ខ្លួនខ្ទង់ម៉ឺនដុល្លារ ព្រមទាំងបានខ្នះខ្នែងស្វែងរកជំនួយពីបណ្ដាសប្បុរសជនជិតឆ្ងាយ ដើម្បីជួយដល់កងកម្លាំងជួរមុខដែលខ្វះខាត និងជនភៀសសឹកដែលកំពុងតែជួបការលំបាកផ្សេងៗ។
ក្នុងរយៈពេលជាង ២ សប្ដាហ៍កន្លងទៅ វិសាល ភរិយាព្រមទាំងសាច់ញាតិ និងក្រុមការងារបានទុកការងាររកស៊ី១ឡែកដោយបានចំណាយពេលស្ទើតែទាំងស្រុងទៅលើការរៀបចំជំនួយ ហើយដឹកយកទៅដល់ទាហាន ជនភៀសសឹកកម្ពុជាដោយផ្ទាល់នៅតាមបណ្ដាខេត្តដែលរងការខ្វះខាត។





ជាលទ្ធផលអ្នកផលិតមាតិកា រួមទាំងក្រុមគ្រួសារបែរត្រូវមនុស្សមួយចំនួន ចោទប្រកាន់ពាក់ព័ន្ធបញ្ហាបាត់ស្បៀង។ ខណៈមានជនអគតិមួយភាគតូចបានលើកឡើងថាលោក បានកិបកេងប្រាក់ជំនួយ មិនបានទិញស្បៀងឱ្យប្រជាជនជនខ្វះខាតនោះទេ។
ការចោទប្រកាន់គ្មានមូលដ្ឋានច្បាស់លាស់ត្រូវបានលោក ហេង វិសាល បង្ហោះសាររៀបរាប់ទាំងបែបនេះថា៖ «បងប្អូនទាំងអស់គ្នា ខ្ញុំគិតថាជាទំនួលខុសត្រូវនិងការដឹងគុណ ខ្ញុំត្រូវតែចេញមកនិយាយរឿងនេះ។ ជាដំបូងខ្ញុំនិងគ្រួសារ សូមអរគុណបងប្អូន មិត្តភក្តិ និងក្រុមគ្រួសារខ្មែរទាំងអស់ដែលបានចេញមកការពារ និងលើកទឹកចិត្តដល់ពួកខ្ញុំ ខ្ញុំពិតជារំភើបមិនដឹងថាមានពាក្យអ្វីអាចរៀបរាប់អារម្មណ៍នេះបានទេ ដោយស្មោះត្រង់នៅយប់នោះអារម្មណ៍របស់ខ្ញុំពិតជាហត់ និងខកចិត្តខ្លាំងមែន ជាពិសេសនៅពេលដែលឃើញទឹកភ្នែករបស់ប្រពន្ធ ទោះបីជាខ្ញុំរៀនធម៌មែន ប៉ុន្តែចិត្តខ្ញុំនៅជាមនុស្សសុទ្ធសាទ ខាងក្នុងខ្ញុំឈឺចាប់ខ្លាំង ហើយបាក់ទឹកចិត្តខ្លាំង ប៉ុន្តែមកដល់ឥឡូវនេះពួកខ្ញុំលែងអីហើយ ហើយខ្ញុំមកនេះគឺចង់ប្រាប់បងប្អូនថាទោះខ្ញុំហត់ និងខ្លាចនៅសំពាធមែន តែបើប្រទេសជាតិយើងមានបញ្ហាខ្ញុំនិងក្រុមគ្រួសារគឺនៅតែចេញមកជួយអ្វីដែលពួកខ្ញុំជួយបាន ព្រោះនេះគឺជាប្រទេសខ្ញុំ ទឹកដីកំនើតខ្ញុំ បងប្អូនខ្មែររបស់ខ្ញុំ ដូច្នេះសូមបងប្អូនទុកចិត្ត អាចឈប់បារម្ភ ហើយបន្តរផ្តោតនិងសាមគ្គីគ្នាជាធ្លុងមួយ ពួកយើងតែមួយ ពួកយើងនឹងឈ្នះ»។
ក្រោយបង្ហោះសារមួយនេះនៅលើបណ្ដាញសង្គមស្រាប់តែលោកជំទាវបណ្ឌិត ពេជ ចន្ទមុន្នី ភរិយាសម្ដេចបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានខមិនលើកទឹកចិត្តដល់រូបលោកឱ្យបន្តការងារមួយនេះ ដោយគាំទ្ររាល់សកម្មភាពការងារដើម្បីជាតិរបស់លោកផងដែរ៕
រូបភាព ៖ Heng Sokvisal























Account
Security
Favourite Content