នៅថ្ងៃទី២៩ ខែមករា ឆ្នាំ២០២៤ ប្រព័ន្ធផ្សព្វផ្សាយនៅប្រទេសកូរ៉េខាងត្បូងបានចែកចាយពាក្យចចាមអារ៉ាមជាច្រើនដោយបានលើកឡើងថាតារាសម្ដែងស្រី Park Eun Bin ទាមទារតម្លៃខ្លួនដល់ទៅ ៣០០ លានវ៉ុន (ប្រហែល ២២ ៥០០០ ដុល្លារអាមេរិក) ក្នុងការថតរឿងថ្មីមួយភាគដែលមានចំណងជើងថា Hyper Knife។

យោងតាមសារព័ត៌មានកូរ៉េ OSEN ភ្នាក់ងាររបស់នាងគឺ Namoo Actors បានចេញមកបដិសេធ និងច្រានចោលយ៉ាងដាច់អហង្ការចំពោះការផ្សព្វផ្សាយព័ត៌មានទាំងនោះដោយបញ្ជាក់ថាព័ត៌មានមិនមានប្រភពច្បាស់លាស់នោះទេ។ នៅថ្ងៃដដែលនោះក្រុមហ៊ុន Blaad Studio ក៏បានថ្លែងទៅកាន់ OSEN ដូចគ្នាទៅនឹង Namoo Actors ព្រមទាំងបានបញ្ជាក់ពីទំនាក់ទំនងល្អរវាងក្រុមហ៊ុន និងតារាសម្ដែងស្រី Park Eun Bin ផងដែរ។

ទន្ទឹមនឹងនេះ សម្រាប់ការថតរឿងថ្មីនេះផងដែរតារាស្រី Park Eun Bin ធ្លាប់បានជួបប្រជុំតែ ២ ដងប៉ុណ្ណោះគឺមួយជាមួយនឹងអ្នកដឹកនាំរឿង និងមួយទៀតជាមួយអ្នកនិពន្ធ។ មិនត្រឹមប៉ុណ្ណេះ ក្រុមហ៊ុនក៏បានសង្កត់ធ្ងន់ថាពួកគេកំពុងស្ថិតក្នុងដំណាក់កាលចរចាលក្ខខណ្ឌជាមួយភ្នាក់ងាររបស់នាងតែប៉ុណ្ណោះ ហើយក៏មិនទាន់បានសម្រេចបញ្ចប់កិច្ចសន្យាណាមួយដែរ។ ប៉ុន្តែក៏មានពាក្យចចាមអារ៉ាមអំពីតម្លៃខ្លួនរបស់តារាស្រី Park Eun Bin បានធ្វើឱ្យភាគីទាំងពីរមានអារម្មណ៍ទើសទាល់។



គួរបញ្ជាក់ផងដែរ រឿង Hyper Knife គឺជាខ្សែភាពយន្ដប្រភេទឧក្រិដ្ឋកម្មបែបវេជ្ជសាស្រ្តដែលមានវេជ្ជបណ្ឌិតមានជំងឺវិកលចរិតម្នាក់បានជួបជាមួយគ្រូបង្វឹករបស់ខ្លួន។ ក្នុងរឿងនេះផងដែរ តារាស្រី Park Eun Bin ត្រៀមបង្ហាញជាតួអង្គវេជ្ជបណ្ឌិត ហើយនេះក៏លើកទីមួយដែលនាងសម្ដែងជាតួអង្គចិត្តអាក្រក់ចាប់តាំងពីក្លាយជាតារាសម្ដែង៕




















































Account
Security
Favourite Content