តារាសម្ដែង នី មុនីនាថ បំផុសគំនិតនៃការដើរដើម្បីសន្តិភាពពោលគឺដើរដោយជើងទទេ មិនមានពាក់ស្បែកជើង ដើម្បីបង្ហាញទៅកាន់ពិភពលោកឱ្យបានឃើញថាកម្ពុជាជាប្រទេសដែលចង់រស់នៅក្រោមម្លប់នៃសន្តិភាព មិនត្រូវការសង្គ្រាមនោះទេ។

កញ្ញា នី មុនីនាថ គឺជាតារាសម្ដែងស្រីមួយរូបដែលតែងឈឺឆ្អាលដល់ប្រទេសកំណើត និងប្រជាជនរបស់ខ្លួន។ ដោយឡែក ថ្មីៗនេះស្ថាបនិកនៃមូលនិធិឈាម នី មុនីនាថ រូបនេះបានបំផុសគំនិតឱ្យមានការដើរដោយជើងទទេ ដើម្បីសន្តិភាព ក្នុងខេត្តសៀមរាប។
«ការដើរដោយជើងទទេដើម្បីសន្តិភាព» គឺជាដំណើរក្បួនសន្តិភាពសាធារណៈអហិង្សា ក្នុងគោលបំណងផ្ញើសារទៅកាន់សហគមន៍អន្តរជាតិ ជនបរទេស ភ្ញៀវទេសចរក្នុងខេត្តសៀមរាប ឱ្យបានជ្រួតជ្រាបនិងដឹងថាកម្ពុជាជាប្រទេសដែលគាំទ្រសន្តិភាព សេចក្ដីថ្លៃថ្នូរ និងការពារជីវិតមនុស្ស។ មួយវិញទៀត គឺបង្ហាញពីភាពទាបខ្លួន ភាពងាយរងគ្រោះ និងការរងទុក្ខរបស់មនុស្សជាតិ។




ព្រឹត្តិការណ៍ «ការដើរដោយជើងទទេរដើម្បីសន្តិភាព» នឹងចាប់ផ្ដើមនៅថ្ងៃ ២៤ ខែធ្នូ ឆ្នាំ ២០២៥ (ពោលគឺថ្ងៃនេះ) នាវេលាម៉ោង ៧ យប់ (ជួបជុំនៅខាងមុខប៉ុស្តិ៍ចរាចរណ៍ផ្លូវគោក ម៉ោង ៤៖៣០ ល្ងាច) ដោយដើរតាមបណ្ដោយផ្លូវសាធារណៈក្នុងក្រុងសៀមរាប ចម្ងាយ ៣.៣១ គីឡូម៉ែត ហើយបញ្ចប់នៅម៉ោង ៨៖២០ យប់ (នៅទីតាំងសិល្បៈដើម្បីសន្តិភាព Art for Peace) ។
បណ្ដាពលរដ្ឋខ្មែរ ជនបរទេសកំពុងស្នាក់នៅក្នុងខេត្តសៀមរាប ភ្ញៀវជាតិ-អន្តរជាតិ អាចចូលរួមក្នុងដំណើរក្បួនសន្តិភាពនេះបានក្នុងសម្លៀកបំពាក់សមរម្យ និងផ្កាឈូក ១ ដើម ហើយមិនតម្រូវពាក់ស្បែកជើងនោះទេ។ ជាមួយគ្នានេះដែរ តារាសម្ដែង នី មុនីនាថ ក៏បានអំពាវនាវសុំឱ្យមានការចូលរួមពីសំណាក់ពលរដ្ឋខ្មែរឱ្យបានច្រើនកុះករ ដើម្បីបង្ហាញអន្តរជាតិបានឃើញនូវការពិតរបស់កម្ពុជា ដែលជាប្រទេសមួយចង់បានសន្តិភាព និងសុវត្ថិភាពដើម្បីប្រជាជន៕
រូបភាព ផ្ដល់ជូនដោយ Ny Monyneath























Account
Security
Favourite Content