ដ្បិតកំពុងតែរងការចោទប្រកាន់ពីបទគេចពន្ធក៏ពិតមែន តែ Kim Seon-ho បានបង្ហាញពីឥទ្ធិពលក្នុងអាជីពការងារ ដោយមានគ្រឹះអ្នកគាំទ្ររឹងមាំ បញ្ជាទិញសំបុត្រចូលទស្សនាការសម្តែងល្ខោនរបស់លោកអស់គ្មានសល់។

យោងតាមការចុចផ្សាយរបស់សារព័ត៌មាន The Korea Times នៅថ្ងៃទី៥ ខែកម្ភៈ នេះ សំបុត្រចូលទស្សនាល្ខោនរឿង Interval ដែលមាន Kim Seon-ho ជាតួសម្ដែង បានលក់ចេញអស់នៅលើគេហទំព័រកក់សំបុត្រធំៗ ជាមួយនឹងអ្នកទស្សនាប្រមាណ ៤៩០ នាក់ក្នុងមួយលើក មានសរុប ១៩ លើក ចាប់ពីថ្ងៃទី ១៣ ខែកុម្ភៈ ដល់ថ្ងៃទី ២២ ខែមីនា។
Interval គឺជាល្ខោន ដែលដកស្រង់ចេញពីស្នាដៃរបស់អ្នកនិពន្ធជនជាតិជប៉ុន Tomohiro Maekawa និយាយអំពីប្រធានបទនៃជីវិត សេចក្តីស្លាប់ និងការចងចាំ។ សាច់រឿងផ្ដោតលើតួអង្គ ២ រូបដែលបានជួបគ្នាក្នុងលំហដ៏អាថ៌កំបាំងមួយ ដោយគ្មានការចងចាំពីអតីតកាល ហើយពួកគេត្រូវស្វែងយល់ពីកម្មផល និងការចាប់ជាតិជាថ្មី។ ក្នុងល្ខោននេះ តារាប្រុសវ័យ ៣៨ ឆ្នាំនឹងសម្ដែងជាតួអង្គម្នាក់ ឈ្មោះថា Dong-jae។
ដោយហេតុថា ការសម្ដែងនេះបានកើតឡើងចំពេលដែល Kim Seon-ho ស្ថិតនៅក្នុងបញ្ហាចម្រូងចម្រាស តំណាងផលិតកម្ម Fantagio បានប្រាប់សារព័ត៌មាន Xports News ថា៖ “ការសម្តែងកំពុងត្រៀមបើកសម្ពោធតាមការគ្រោងទុក។ យើងនឹងផ្ដល់ដំណឹងបន្ថែម ប្រសិនបើមានការផ្លាស់ប្តូរណាមួយ”។

គួរឱ្យដឹងផងដែរថា នៅដើមខែកុម្ភៈនេះ តួឯកប្រុសខាងលើបានជាប់សង្ស័យថា បានបង្កើតទីភ្នាក់ងារបែប Single-artist agency ជាក្រុមហ៊ុនលក្ខណៈគ្រួសារដើម្បីលាក់បាំងប្រាក់ចំណូល និងគេចពន្ធតាំងតែពីឆ្នាំ ២០២៤។
យ៉ាងណា Fantagio ដែលជាទីភ្នាក់ងារបច្ចុប្បន្នរបស់ Kim Seon-ho បានពន្យល់ថា៖ “ក្រុមហ៊ុនដែលមានសិល្បករតែម្នាក់នេះ ត្រូវបានបង្កើតឡើងសម្រាប់ការផលិតកម្មវិធីមហោស្រពប៉ុណ្ណោះ មិនមែនសម្រាប់គោលបំណងគេចពន្ធនោះទេ”។
“ចាប់តាំងពីផ្លាស់មកកាន់ផលិតកម្មបច្ចុប្បន្នកាលពីមួយឆ្នាំមុន ក្រុមហ៊ុនដែលមានបញ្ហានោះលែងដំណើរការទៀតហើយ ហើយបច្ចុប្បន្នកំពុងស្ថិតក្នុងដំណើរការរំលាយចោល» ក្រុមហ៊ុនបានឱ្យដឹងបន្ថែមដូច្នេះ៕
























Account
Security
Favourite Content