Miss Planet Cambodia 2024 កញ្ញា ដេត ស្រីនាឌ បានចូលសម្រាកនៅមន្ទីរពេទ្យ ទោះកំពុងប្រកួត Miss Planet International 2024 ដោយសារបវរកញ្ញារូបស្រស់ហត់នឿយគ្មានពេលសម្រាក ព្រោះត្រូវចូលរួមគ្រប់សកម្មភាពដែលកម្មវិធីដាក់មក នាប៉ុន្មានថ្ងៃមកនេះ។
បន្ទាប់ពីចូលសម្រាកនៅមន្ទីរពេទ្យរួចមក ដេត ស្រីនាឌ បានឲ្យដឹងកាលពីយប់មិញថា ឥឡូវនាងបានធូរស្រាលខ្លះហើយ តែត្រូវការសម្រាកបន្តិច ដើម្បីឲ្យសុខភាពល្អឡើងវិញ សម្រាប់ថ្ងៃប្រកួតផ្ដាច់ព្រ័ត្រដែលមកដល់នៅប៉ុន្មានថ្ងៃទៀត។ ស្រីនាឌ បានសរសេររៀបរាប់លើបណ្ដាញទំនាក់ទំនងសង្គមថា «សួស្ដីអ្នកទាំងអស់គ្នា! អរគុណដែលបានសួរសុខទុក្ខពីខ្ញុំ, ខ្ញុំបានធូរស្រាល និងល្អប្រសើរជាងមុនហើយ។ ប៉ុន្តែខ្ញុំសម្រាកបន្តិច ដើម្បីធ្វើឱ្យប្រាកដថាសុខភាពរបស់ខ្ញុំមានភាពល្អប្រសើរឡើងវិញសម្រាប់ការប្រកួតវគ្គផ្ដាច់ព្រ័ត្រខាងមុខ»។
មិនត្រឹមតែជាបេក្ខភាពធម្មតាឡើយ បវរកញ្ញាខ្មែររូបនេះ បានសម្ដែងរបាំដ៏អស្ចារ្យបំផុត ដោយរាំរបាំអប្សរា បើកកម្មពិធី Miss Planet International 2024 វគ្គប្រកួតបឋមកាលពីយប់មិញថ្ងៃ ២២ ខែវិច្ឆិកា ឆ្នាំ ២០២៤ នៅខេត្តសៀមរាប។
ដោយសារតែ ស្រីនាឌ បានបំពេញភារកិច្ចនាំមុខមាត់កម្ពុជា នៅវេទិកា Miss Planet International 2024 ជាច្រើនវិញ្ញាសាប៉ុន្មានថ្ងៃមកនេះហាលខ្យល់ ហាលថ្ងៃក្ដៅ ទាំងនៅភ្នំពេញ និងខេត្តសៀមរាបយ៉ាងសកម្មបែបនេះហើយ ធ្វើឲ្យមានអាការៈហត់នឿយ និងខ្សោយបន្តិច។
គួរបញ្ជាក់ថា Miss Planet Cambodia 2024 កញ្ញា ដេត ស្រីនាឌ បានគ្រងឈុតតំណាងជាតិ “អប្សររំដួលកម្ពុជា”។ ឈុតនេះរចនាឡើងបែបសិល្បៈសហសម័យ ដោយរួមបញ្ចូលសិល្បៈខ្មែរពីបុរាណ រួមមានមកុដ និងគ្រឿងអលង្ការតួស្រីអប្សរ ច្នៃប្រតិដ្ឋយ៉ាងប្រណីត ដកស្រង់ចេញពីចម្លាក់អប្សរាតាមប្រាសាទនានាក្នុងតំបន់អង្គរ អមភ្ជាប់ដោយផ្ការំដួល ដែលជានិមិត្តរូបនៃសោភ័ណភាព ភាពឆើតឆាយ ភាពថ្លៃថ្នូររបស់កម្ពុជា ជាពិសេសផ្ការំដួលតំណាងឲ្យភាពរួសរាយរាក់ទាក់ រួមទាំងស្នាមញញឹមនៃនារីខ្មែរ និងប្រជាជនកម្ពុជាទាំងមូល។ នេះបើយោងតាមការឲ្យដឹងពីសំណាក់ ដេត ស្រីនាឌ៕
រូបភាព៖ FB Det Sreyneat