តារាសម្ដែងដែលកំពូលទទួលបានការគាំទ្រខ្លាំងនាពេលបច្ចុប្បន្ន មាលា ជាកូនខ្មែរកាត់បារាំង ត្រូវបានផលិតករ និងត្រូវជាម្ចាស់ផលិតកម្ម LD លៀក លីដា សរសើរពេញៗមាត់ ព្រោះពេលលោកឲ្យដើរជាតួឯក បែរជាសុំលោកដើរតួតូចតាចបំផុតក្នុងរឿងទៅវិញ។


លៀក លីដា បានផ្ដល់សំណេះសំណាលក្នុង Podcast រៀនថត Rean Thort ដែលប្រធានបទក្នុងកម្មវិធី ពិស្ដារពីវិស័យផលិតភាពយន្តខ្មែរ។ ពិធីករ និងជាម្ចាស់កម្មវិធីលោក ឆេង សុភ័ក្រ្ត បានលើកជាសំណួរផ្សេងៗទាក់ទងការរើសតួមកសម្ដែង,ការបណ្ដុះបណ្ដាលតួ… ក្នុងភាពយន្តដែលផលិតកម្ម LD ផលិត។ សម្រាប់ចម្លើយរបស់ចាងហ្វាង LD តាមសំណួរមួយៗបានច្បាស់លាស់ ហើយក៏បាននិយាយពីជម្រើសតួអង្គដែរថា តារាក៏ចង់តែលេងជាតួឯកមានច្រើន ប៉ុន្តែមិនទាំងអស់ឡើយ។
ក្នុងនោះលោកក៏បានលើកឧទាហរណ៍ចំៗថា កញ្ញា មាលា តួស្រីរឿង «ប្រវត្តិសាស្ត្រនាងនាថ» ត្រូវបានក្រុមការងារជ្រើសរើសជាតួឯកស្រី ប៉ុន្តែពេលហៅមកជួប កញ្ញាថាមិនលេងជាតួឯកឡើយ។ លៀក លីដា បានបញ្ជាក់ថា កូនខ្មែរកាត់បារាំងដ៏ស្រស់ស្អាតនេះបែរសុំលេង Role តូចបំផុតក្នុងរឿងសិន។

នៅក្នុងបទកិច្ចសន្ទនានោះម្ចាស់ផលិតកម្មក៏បានបញ្ជាក់ថា កាលដែល មាលា ជ្រើសសុំលេងតួតូចនោះ ព្រោះខ្លាចខូចការងាររបស់លោក។ ទង្វើរបស់តារាស្រីវ័យក្មេងរូបនោះ ធ្វើឲ្យ លៀក លីដា លាន់មាត់សរសើរថា នាងជាមនុស្សបុគ្គលិកលក្ខណៈប្រកបដោយទំនួលខុសត្រូវខ្ពស់ និងគ្មាននរណាធ្វើបែបនេះពីមុនមកឡើយ។
ក្រោយ មាលា បង្ហាញពីភាពស្មោះត្រង់រួច លោកពិតជាសប្បាយចិត្តខ្លាំង និងបានប្រាប់ទៅកញ្ញាវិញថា ការកំណត់ឲ្យលេង Role ណាមិនសំខាន់ឡើយ សំខាន់ថាតើ មាលា មានចំណង់ចំណូលចិត្ត (passion) ទៅដល់ណា។ មួយវិញទៀតពីខាងម្ចាស់ផលិតកម្ម LD ប្រាប់ Mélia Constantin ថា បើនាងមានឱកាសសម្ដែងតួឯក គឺត្រូវសម្ដែងទៅ ហើយបើទៅមិនរួច លោកក៏មិនបន្តយកតទៅទៀតដែរ ដោយលោកមិនបណ្ដោយឲ្យនាងធ្លាក់ទឹក ហើយរឹតតែមិនបណ្ដោយឲ្យរឿងបរាជ័យព្រោះនាងដែរ។



សម្រាប់ជំហានបន្ទាប់លោកបានសួរទៅកាន់ មាលា ថាតើនាងអាចលះបង់បានប៉ុណ្ណា សម្រាប់រឿងនេះ។ ស្រលាញ់រឿងប៉ុណ្ណា? លះបង់ពេលវេលាបានប៉ុណ្ណា? ហ៊ានហត់ ហ៊ានលំបាកប៉ុណ្ណា? ជាការឆ្លើយតបតារាខ្មែរកាត់បារាំងរូបនេះ បញ្ជាក់ទៅកាន់ លៀក លីដា ច្បាស់ៗថា ស្រលាញ់សាច់រឿង (ប្រវត្តិសាស្ត្រនាងនាថ) ហើយនឹងធ្វើតាមការប្រាប់របស់អ្នកដឹកនាំគ្រប់យ៉ាង។ ក្រោយនិយាយស៊ីចង្វាក់គ្នា ខាងផលិតកម្មបានណែនាំទៅដល់តារាស្រីរូបនេះគ្រប់យ៉ាង។
«ប្រវត្តិសាស្ត្រនាងនាថ» គឺជាភាពយន្តដំបូងរបស់ Mélia Constantin នាងត្រូវសម្ដែង ៣ តួអង្គ និងចាយទុន ១ លានដុល្លារក្នុងការផលិត។ លៀក លីដា បានលើកឡើងថា បើទោះជាការចាយទុនច្រើនលើតួឯកស្រីថ្មីក៏ពិតមែន តែលោកច្បាស់ថាអាចបង្ហាត់បង្ហាញកញ្ញា មាលា ក្លាយជាតួឯកដ៏ល្អ។ “រឿងទី១ មិនអាច Professional តែក៏ក្បែរនោះដែរ ទីបំផុតគាត់អាចធ្វើបាន” នេះជាការបន្ថែមចុងក្រោយរបស់លោក លៀក លីដា៕




























Account
Security
Favourite Content