កាលពីល្ងាចថ្ងៃទី ៥ ខែ កុម្ភៈ ឆ្នាំ ២០២៤ សារព័ត៌មានកូរ៉េ Osen បានរាយការណ៍ថា តារាប្រុស Lee Seung Gi និងភរិយា Lee Da In បានក្លាយជាឳពុកម្ដាយរបស់គេហើយ។ ដោយភរិយារបស់ Lee Seung Gi បានសម្រាលបានកូនស្រីម្នាក់យ៉ាងសុវត្ថិភាព។

បើតាមភ្នាក់ងារតំណាងរបស់តារាប្រុសស្រីទាំងពីរ ក៏បានបញ្ជាក់ថា តារាស្រី Lee Da In ពិតជាបានសម្រាលកូនស្រីម្នាក់មែន ស្របពេលដែលម្ដាយ និងទារក សុទ្ធតែមានសុខភាពល្អ។ ចំណែកក្រុមគ្រួសារពិតជាមានភាពរីករាយ ចំពោះវត្ដមានកូនស្រីតូចរបស់ខ្លួន។ នេះជាកូនស្រីដំបូងរបស់គូស្វាមីភរិយាថ្មីថ្មោងមួយគូនេះ។
Lee Seung Gi និងភរិយា Lee Da In បានរៀបការនៅខែ មេសា ឆ្នាំ ២០២៣ បន្ទាប់ពីសេពគប់មើលចិត្ដថ្លើមគ្នាអស់រយៈពេលជាង ២ ឆ្នាំ។ មង្គលការរបស់អ្នកទាំងពីរត្រូវបានរាយការណ៍ថា ចាយប្រាក់ជាង ៨ ម៉ឺនដុល្លារអាមេរិក។



ជាមួយគ្នាដែរ តារាប្រុស Lee Seung Gi ធ្លាប់បានលើកឡើងថា ភរិយារបស់លោកជាមនុស្សស្រីកម្ររកបានម្នាក់ នាងជាមនុស្សម្នាក់តែងលើកទឹកចិត្ដដល់លោក និងជាមនុស្សម្នាក់ដែលនៅកំដរពេលលោកជួបបញ្ហាជាច្រើន។ លើសពីនេះ ម្ដាយរបស់តារាប្រុស Lee Seung Gi ក៏បានលើកសរសើរដល់កូនប្រសាស្រីពីអត្ដចរិតស្លូតបូត ចិត្ដល្អ និងចេះជួយយកអាសាអ្នកដទៃ ជាហេតុធ្វើឲ្យលោកស្រីពេញចិត្ដពេញថ្លើមកូនប្រសាម្នាក់នេះយ៉ាងខ្លាំង។

ក្រឡេកមកមើលអាជីពសិល្បៈរបស់អ្នកទាំងពីរវិញ អំឡុងពេលពពោះកូនស្រីដំបូង តារាស្រី Lee DaIn នៅតែបន្ដថតរឿងភាគថ្មីរបស់ខ្លួនដល់ចប់ ហើយនាងនឹងអាចវិលត្រឡប់ចូលសិល្បៈបន្ទាប់ពីសម្រាលកូនរួចមួយរយៈ។ សម្រាប់តារាប្រុស Lee SeungGi លោកនៅបន្ដអាជីពជាតារាចម្រៀង តារាសម្ដែង និងពិធីករក្នុងពិភពសិល្បៈកូរ៉េដដែល៕























Account
Security
Favourite Content