ទោះមិនបានចូលនៅក្នុង Top ណាមួយក្នុងកម្មវិធីប្រកួត MISS GLOBAL 2024-2025 បវរកញ្ញាកម្ពុជា ខុន ស្រីខួច ទទួលបានការលើកទឹកចិត្តយ៉ាងក្រាស់ក្រែលពីសំណាក់មហាជន និងបណ្ដាអ្នកគាំទ្រក្នុងវិស័យបវរកញ្ញានៅក្នុងស្រុក។

ក្រោយទទួលជយលាភីក្លាយជាម្ចាស់មកុដ Miss Global Cambodia 2024 ខុន ស្រីខួច បានបន្តបេសកកម្មរបស់ខ្លួនតំណាងឱ្យកម្ពុជាចូលរួមប្រកួត MISS GLOBAL 2024-2025 នៅឯប្រទេសថៃ និងនៅកម្ពុជា។ ចំពោះការប្រកួតនាលើកនេះ ស្រីខួច បាននាំឈុតតំណាងជាតិ «លោកតាដំបងគ្រញូង» ដែលជារូបតំណាងឱ្យខេត្តបាត់ដំបងរបស់ប្រទេសកម្ពុជា ជាឈុតមួយនេះមិនត្រឹមមានភាពទាក់ទាញ តែមានរឿងរ៉ាវប្រវត្តិសាស្ត្រខ្មែរគួរឱ្យចាប់អារម្មណ៍។
មិនតែប៉ុណ្ណោះ នៅក្នុងវគ្គ Introduction បវរកញ្ញាកម្ពុជារូបនេះបានបង្ហាញទេពកោសល្យនៃការដើរនៅលើឆាកអមជាមួយក្បាច់គុណរបស់ខ្មែរមកជាមួយផងដែរ។ ពីមួយវគ្គទៅ១វគ្គ ខុន ស្រីខួច បានសម្រិតសម្រាំងប្រមែប្រមូលសមត្ថភាពដែលខ្លួនមាន និងខិតខំព្យាយាម ដើម្បីលើកមុខមាត់របស់ប្រទេសជាតិ។
ដោយឡែក នៅក្នុងការប្រកាសលទ្ធផល ខុន ស្រីខួច ពុំទទួលបាន Top ណាមួយនៅក្នុងការប្រកួតនោះឡើយតែម្ចាស់មកុដ Miss Global Cambodia 2024 រូបនេះត្រូវបានមហាជនអ្នកគាំទ្រនៅក្នុងស្រុកលើកទឹកចិត្ត និងពោលសរសើរពីការខិតខំព្យាយាមក្នុងការប្រកួតមួយនេះ។ ហេតុនេះហើយទោះលទ្ធផលមិនគាប់ចិត្តបែបនេះក៏ដោយតែ ខុន ស្រីខួច នៅតែទទួលបានការគាំទ្រយ៉ាងក្រាស់ក្រែលពីសំណាក់មហាជននៅក្នុងស្រុក។






គួរឱ្យដឹងដែរថា ជយលាភីលេខ១ក្នុងកម្មវិធីប្រកួត MISS GLOBAL 2025 បានទៅលើបវរកញ្ញាដែលមកពីប្រទេសវៀតណាម Nguyen Dinh Nhu Van លំដាប់រៀងទី១ បានទៅលើ Keri-Ann Amanda Greenwood – Jamaica និងលំដាប់រៀងទី២ បានទៅលើ Ediris Rivera Berrios – Puerto Rico៕
រូបភាព៖ Khon SreyKhouch























Account
Security
Favourite Content