ពេលវេលាដើរលឿនមែនទែន…! ថ្មីៗនេះតារាសម្ដែងតៃវ៉ាន់ Jimmy Lin និង Steven Hao Shao-wen ទើបតែបានជួបគ្នាម្ដងទៀតព្រមទាំងបានថតរូបរំឭកនូវអនុស្សាវរីយ៍ដ៏ល្អរបស់ពួកគេកាលពី ៣០ឆ្នាំមុន។

ត្រលប់ទៅឆ្នាំ ១៩៩៤ អ្នកទាំងពីរបានសម្ដែងជាបងប្អូនក្នុងភាពយន្តកំប្លែងនិងក្បាច់គុន “Shaolin Popey” (កូននាគសៅលីង)។ កាលនោះ Steven Hao ទើបតែមានអាយុ ៤ ឆ្នាំប៉ុណ្ណោះ និងបានសម្តែងក្នុងរឿងនេះជារឿងដំបូងរបស់ខ្លួន ខណៈដែល Jimmy Lin ក្នុងវ័យជំទង់បានទទួលភាពល្បីល្បាញខ្លះហើយដោយមានរហស្សនាមថាជា “Little Four Heavenly Kings” របស់តៃវ៉ាន់។ ការសហការគ្នារបស់ពួកគេនៅក្នុងខ្សែភាពយន្តរឿង “Shaolin Popey” បានទទួលជោគជ័យដ៏លើសលប់ រហូតពួកគេបានថតវគ្គបន្តៗជាច្រើនទៀតរួមគ្នាជាមួយតារាសម្ដែង Ashton Chen និងតារាសម្តែង Ng Man-tat ដែលបានបាត់បង់ជីវិតទៅហើយ។
នៅពេលបង្ហោះរូបភាពថ្មីៗទាំងនោះ Jimmy Lin បាន Tag អតីតអ្នករួមសម្តែងរបស់ខ្លួនភ្ជាប់ជាមួយការរៀបរាប់ថា៖ “សង្ឃតូច A-wen មកពី កូននាគសៅលីង ពេលនេះបានក្លាយជា A-wen ធំហើយ @Hao Shaowen ហេតុអ្វីបានជាឯងនៅតែគួរឱ្យស្រលាញ់ដូច្នេះ?” ចំណែក Hao Shao-wen ក៏បានសរសេរពី Jimmy Lin វិញថា៖ “ខ្ញុំធំហើយ ហេតុអ្វីបងមិនចាស់សោះអីចឹង @Lin Chih-ying?”


កន្លងផុត ៣០ឆ្នាំ បច្ចុប្បន្ន Hao Shao-wen មានអាយុ ៣៤ ឆ្នាំនិងបានរៀបការ និងមានកូនស្រីម្នាក់ទៅហើយ ខណៈតារាសម្ដែង Jimmy Lin បច្ចុប្បន្នមានអាយុ ៤៩ ឆ្នាំ។ ក្រោយបានឃើញរូបថតថ្មីៗទាំងនេះ អ្នកលេងអ៊ីនធឺណិតជាច្រើនបានយល់ស្របថាពួកគេមើលទៅមិនចាស់ទាល់តែសោះ ជាពិសេសនៅក្នុងរូបថតដែលពួកគេធ្វើកាយវិការដូចគ្នាក្នុងភាពយន្ត។ អ្នកខ្លះបាន Comment លេងសើចថា៖ “កូនតូច Wenwen ដ៏គួរឲ្យស្រឡាញ់បានធំហើយ ប៉ុន្តែ Little Jimmy នៅតែជា Little Jimmy ដដែល” ៕


























Account
Security
Favourite Content